TRADUCTION BILBE EN KINYANGA
Yohana 10:11
Verse 11 is marked below, with the whole chapter around it. Read from the start
Mushinga w'emurangi wakonda
Yesu weba tu mbu: «Nibwirengi muriira mbu, kinsi mwea ingu wakime na ntwakwetere ha rubi rw'erukito rw'esamburi, ina wetere hampe, emwea ngo mwibi na munyai. Ina ewakime ha rubi nge murangi w'esamburi. Euranganga erubi umurundurenga, n'esamburi sirukiranga emurenge wae. Nae ubikiranga esamburi sae kira nima murina rayo n'isaisha to hambuka. Ukianga wamasaisha to usondoranga, n'esamburi nti samumisa bushwa mbu sosi emurenge wae. Esamburi nso sitakochi imisa mweni, ina simubekangǎ, bushwa mbu ntísosi emurenge wae.»
Yesu wakerenga bo emushinga ngo, ina ntíbateereranga ebinwa mbi byabesenga byebange we.
Yesu nge murangi mongo
Yesu weba tu mbu: «Nibwirengi muriira mbu: ani nge rubi rw'eharangwanga esamburi. Ebati mbi beyanga kubusondori nani bibí na banyai. Ina esamburi ntísarukiranga bo. Ani nge rubi. Kinsi mwea ngu wanetere mo murikime, waseshukara, wǎkime n'isaa, na wǎseshee bio. Emwibi weyanga ho kashuma, ishura n'ibishabisha. Ina ani nameya kongo ebea bashee ekaramo k'ematu ati.
«Ani murangi mongo. Emurangi mongo usiburanga ebuingo bwae bushwa n'esamburi sae. Eukorange bushwa n'ebehe ho iwe ntímurangi, n'esamburi ntísae. Ukianga wamasunga embibi y'ebusara twasia esamburi n'ikwibeke. Nampo, embibi y'ebusara njo y'itaanga muriimba n'isansabanya esamburi. Iwe ntwirae mu samburi, ukorange ho bushwa washei behe. Ani nge murangi mongo. Nosi esamburi sani, n'esamburi sani sinosi, ebosi ani Tita, nge bunosi hotu Tita. Ngebumbo hotu nasibura ebuingo bwani bushwa n'esamburi sani. Niri hotu na simpe mburi ntís'eriimba rino. Na nahwa hotu irisha to, nato siserukira emurenge wani, nampo r'isebese iimba rima na murangi uma.
«Kincho nge chasingwa Tita wanishima, bushwa mbu nasibura ebuingo bwani, kongo nashee tu bo kuruma. Kusira mwea ingu wamukocha inyaa ebuingo bwani. Ina ani kisine nge nasibura ebuingo bwani. Niri n'ebukwakare bwerikisibura ikwa, na niri na bukwakare bweribese tu nabo. Ngebumbo namaronja ebwaniraanga Tita.» Bushwa n'ebinwa mbyo, eBayuta babanyana tu. Bingi munkati nabo beba mbu: «Uno uri na kifwasi! Tuna mushire! Mbeni banu mu muteange emate bushwanki?»
Ina ebampe beba mbu: «Ewatingirwa n'ekifwasi watamukocha ieba binwa biri buno. Mbeni ekifwasi chamukocha iramya emeso ebihumihumi?»
eBayuta batina Yesu
Otu ruma, mu matu ekeme chasuma, kwabese kibimbi ch'erikandira erotu rw'eriobora eNumba ya Ongo ku Yerusaremu. Yesu wabesenga wetange mu buari bw'eNumba ya Ongo imbu bwabikirwa mbu rushu rwa Soromono. Nampo, eBayuta bamutimba, bamwire mbu: «Mbeni ushireyo kuni neri tutimbya ebwenge? Kuba ǒngo nge Kirisitu twiri eriira.»
Yesu wasako bo mbu: «Namabwire rero, ina ntímunisimira. Ebironjange ani mu bukwakare bwa Tita byeba bushwa nani. Ina ntímunisimira bushwa mbu ntíbanu mburi sani. Esamburi sani sirukirange emurenge wani, nosi to, nato sinimisange. Nininkange bo ekaramo k'ematu ati, batariminiyo na kusira mwea wamuninyaka bo mu mine yani. Tita ingu wanininkanga esamburi nsi nge mukwakare irenga ebati, na kusira mwea ngu wamukocha inyaka to mu mine ya we. Ani na Tita bate mwea uma.»
eBayuta bakianga bamarukira mbo, basombo tu makoi kongo bamurekera o. Ina Yesu were tu bo mbu: «Namabushea mikorere mingi yakonda mu bukwakare bwa Tita. Mu biti mbyo, mbeni kini kinwa nge chamasingwa mu n'ishura mwinirekera makoi?»
Bayuta bima bamusako mbu: «Ntítwashima ikushura mwikurekera makoi bushwa n'erironja byakonda, ina bushwa mbu umakamba Ongo. Ǒngo mwea ina ǒngo wibikirange mbu Ongo!» Yesu wasako bo mbu: «Raandikwa mu Myomba yinu mbu Ongo weba mbu: ‹Banu tuhombo.›1 Bate tosi mbu eMitiro Yashurukara itamunoiwa. Ongo were ebarukirange ebinwa byae mbu ‹tuhombo.› Mu'mbi ebyanikae, ani nakurondorwa na Ongo na nakutumwa nae mu chuo. Buni ke nge bwebange banu mbu namakamba Ongo bushwa mbu nakweba mbu ani Musike wa Ongo? Kuba ntínaronja emikorere ya Tita, angi munisimira. Ina kuba n'ironjange yo, nakiro mbu nti munisimira, musimire ke emikorere yani, kongo musiba mbu ani na Tita mwea uma, iwe uri kumunda nani, nani kumunda nae.» Basonda tu imina Yesu, ina wishunura. Nampo, Yesu wasoka muo mwiri w'erusi Yorondani, impi habesenga harubikenga Yohana ebea, n'irika mpo. Bea bingi bámwiere n'ieba mbu: «Yohana ntwasheanga nakiro kiteerere kima, ina ebinwa biti mbi byebanga we bushwa n'emwea uno byabesenga b'iira.» Nanko, bea bingi básimira Yesu.
Source notes (1)
- Footnote Soma Sab 82.6.
TRADUCTION BILBE EN KINYANGA. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.