Noiri
प्रगटी 3
सारदीस मंडड़ीही संदेश
“सारदीसोअ मंडड़ीइ दुतोहो ओं लेख:
“जियापोअ देवोअ हांत आत्मा आन हांत तारा होय, तो एहें कोहे के, ताआ कामे माहूं मुंदू होय, तु जिवतु होय एहें कोत माहें कोतेहे, पोन तू मोल्यू होय. निंदेम रोत ऊठ, आन जों वाहींज रोयोहो आन जों आरवाअहूं कोअहे, तियाहा वातड़ो तोअ; काहाके ताआ कोड्लाज कामोहों आंय माआं देवोअ नजरेम पुरो ओवत्लो नाहां देख्यो. तियाहा काजे तुमे जों शिक्शण लेदो आन उनाअयुहू, तिहींम वातड़ू रो आन मोन फिरव. जर तू निंदेम रोत ने उठही, ताहां आंय बांडोअ होस कोड्ली वेले आवीत लागिहीं तों ताहूं मुंदून्ने जाय. पोन सारदीसोमेहें ताआ जागे थोड़ेक एहलेहे माअहें बी होय, जियां सोताआ आंगड़े ने मोलव्ये, तें माअरी पांडे आंगड़े पोवित फिरे, काहाके तें याआज लायकीइ होय. जों जिके तियाहा एहेलेज पांडे आंगड़े जोड़े, आन आंय तियाआ नांव जिवनोअ पुस्तकोम रोत ने खुड़ो, पोन माआं आब्हाआ आन तियाआ देवदुतोअ सामने तियाआ नाव मानित लेहीं.
“आत्मा मंडड़ीही की कोहे तों जियाहा कान ओय तों उनाइत लेय.
फिलादेलफिया मंडड़ीही संदेश
“फिलादेलफिया मंडड़ीइ दुतोहो ओं लेख:
“जो पवित्र आन सत्य होय, जियापोअ दाविदोअ किल्ली होय, जियाआ उगाड़ल्यो कोडोज बोंद नाहां कोइत सेकतो, आन जियाआ बोंद कोअल्यो कोडोज उगाड़ीत नाहां सेकतो, तो एहें कोहे: माहूं ताआ कामोअ मुंदू होय, आंय ताआ काजे एक बाआ उगाड़ीत मिक्योहो, जियाहा कोडोज बोंद नाहां कोइत सेकतो; ताआ सेक्ती वाहीं एतीही होय, तेबी तुमे माआं शब्द पालन कोअयोहो आन माआं नावोहो नाहां नाकार्यो. पाल, जें सैतानोअ आराधनालयोअ सदस्य होय, तें सोताहा यहुदी कोतेहे, पोन तें यहुदी कायनाहां, तें ठोगतेहे, आंय एहलोहो कोअहीं के तें आवीत कोइत ताआ पागे पोड़े, आन तियांहां मुंदू जाय के आंय तापोअ मेर कोअहो. तू माआं आदेशोअ पुरमाणे मजबुत रोयु, तियाहा काजे आंय बी ताहूं तियी परिक्शाआ वेले सांबालीत मिकीहीं, जे धरतीइ आखा रोनाराहा फारकीइलाअ काजे पुरी दुन्यापोअ आवनारी होय. आंय वेगुज आवनारु होय; जे हिकवोण तापोअ होय, तियीपोअ वातड़ू रोजी; जियावाअहीं एखू तुमुहूं तुमाआ टोपा रोत सेटे ने कोअहूं जोवे. जो जिके तियाहा आंय माआ देवोअ मंदिरोमेहें एक खांबू बोणाविहीं, तो फाशुउ केदिहीं तियाआ बारथे ने जाये; आंय माआं देवोअ नाव, माआं देवोअ गांव, मोन्ज्ये नोवा येरुसालेमोअ नाव, जो माआं देवोअ जागे होरगाम रोत उतरीइनारो होय, आन माआं नोवो नाव बी तियापोअ लेखीहीं.
“जियाआ कान ओय तो उनाइत लेय के आत्मा मंडड़ीही की कोहे.
लौदीकीया मंडड़ीही संदेश
“लौदीकिया मंडड़ीइ दुतोहो ओं लेख;
“जो आमेन आन विश्वास कोअहूं जोगुहू आन खोरु साक्शी होय, आन देवोअ बोणावल्यी कोलीइ मुख्य पायू होय, तियाआ संदेश एहेंकोइत होय: माहूं ताआ कामोअ मुंदू होय, के तू नाहां हेलू आन नाहां उनू: केतोहो हाजो आवतो के तू हेलू नेत उनू रोतु. तू ते उनू बी नाहां आन हेलू बी नाहां, पोन तू कुकनू होय, तियाहा काजे आंय ताहूं माआ सोबिम रोत ओकारीत टाकुहूं कोअहो. तू एहें कोहे के, आंय कुन्बी होय आन मालदार ओत गोयुहू आन माहूं कोड्लीज गोठीइ कमी कायने; आन तू ओं नाहां समजीइतु के तू टाकाअलू, खाराब, गरीब आन आंद्लू आन उगड़ाअलुज होय. तियाहा काजे तू माआं गोठ मान, आन मापोअ रोत आगीवाअहीं सोकाटल्यो होनो वेसातो लेत लेन कुन्बी बोणीत जा, आन पांडो आंगड़ो लेत कोइत पेवित ले आन ताआ उगड़ाअला डिलोअ इज्जत टापित ले; काजली लेत कोइत ताआ डोआम हार, जियी वाअहीं तू पालीत सेकीही. आंय जियांपोअ मेर कोअहो, तियांहां हेकड़ोहो आन शिक्शा आपोहो; तियाहा काजे जागित जा आन मोन फिरव. पाल! आंय बाअपुरे उबू रोत बाअणो ठोक्या कोअहो; जर एखू माआं आवाज उनाइत कोइत बाआ उगाड़े, ताहां आंय तियाआ जागे मायते आवीत कोइत तियाअरी रोटू खाहीं आन तो माअरी खाय. जो जिके, तियाहा आंय माअरी माआं राजगादीपोअ बोहाड़ीहीं, जेहेंकोइत आंय जिकीत कोइत माआं आब्हाअरी तियाआ राजगादीपोअ बोहीत गोयुहू.
“जियाआ कान ओय, तों उनाइत लेय के आत्मा मंडड़ीही की कोहे!”
Noiri. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.