प्रगटी 2

इफिसोअ मंडड़ीही संदेश

1“इफिसोअ मंडड़ीइ दुतोहो ओं लेख:

“जो तियाआ हाजाड़्या आथोमेहें हांत तारा लेत होय, आन होनाअ हांत दिवाआ विसमेहें सालेहे, तो एहें कोहे: 2माहूं ताआ काम, मेहेंनत आन धिर मुंदू होय; आन ओं बी मुंदू होय के तू पापी माअहुंहूं सहन नाहां कोइत सेकतु; आन जे सोताहा प्रेशित समजीइताहा, पोन ते प्रेशित कायनाहां, तुमे तियांआं परिक्शा लेदीही आन ते ठोग निहींयाहा. 3तू धिर खेटेहे, आन माआं नावोअ काजे दुख वेठताम तु हार ने मान्यू. 4पोन माहूं ताआ विरुद्दाम ओं कोअलो होय के, तु पेल मापोअ कोअहे तेहेलीही मेर ओमे नाहां कोअतु. 5तियाहा काजे ओर कोअ के तू का रोत पोड़्युहू. मोन फिरव आन पेल कोअहे तेहलेहे कामे कोअ; जर तू मोन ने फिरावही, ताहां आंय ताआ जागे आवीत ताआ दिवू तियाआ जागे रोत फेड़ी देहीं. 6तेबी तामेहें ए हाजी गोठ होय के, माआं होस तू बी निकोलायीइ कामोहों सीस कोअहे. 71

“आत्मा मंडड़ीही की कोहे तो जियांआं कान ओय तों उनाइत ल्या!

“जो जिके, तियाहा आंय एहला जिवनोअ साड़ोअ फल खाय तेहें आपीहीं जों देवोअ होरगाआ बोगिसाम होय.2

स्मुरणा मंडड़ीही संदेश

83

“स्मुरणाआ मंडड़ीइ दुतोहो ओं लेख:

“जो पेहलु आन सेवट्युउ होय, जो मोइत गोयुतो आन फाशुउ जिवीत उठ्युहू, तो एहें कोहे: 9ताआ अड़सनी आन गरीबी माहूं मुंदू होय. तेबी तु कुन्बी होय; जें सोताहा यहुदी समजीइतेहे पोन होयज नाहां, तें निस्ते सैतानोअ आराधनालयोअ सदस्य होय, आन तें माहें ताआ केतीही बदनामी कोअतेहे तों बी माहूं मुंदू होय. 10जों दुख ताहूं वेठीइलोअ आवनारोहो, तियाहा मा बिही. काहाके सैतान तुमाआ परिक्शा लेअलाअ उद्देशोवाअहीं तुमामेर्‍याअ थोड़ाक जोअहों जेलेम टाकी देय आन तुमू दोहो दिही जाआं अड़सनीम पोड़ीत रोहा. जिव निहींत जाय ताअहूं जाआं तु इमानदार रो; ताहां आंय तुमुहूं जिवनोअ टोपू आपीहीं. 114

“आत्मा मंडड़ीही कि कोहे तो जियांआं कान ओय तों उनाइत ल्या.

“जों जिके, तियाहा दुसरा मोतोअ किज तारास ने ओवे.

पर्गम मंडड़ीही संदेश

12“पर्गम मंडड़ीइ दुतोहो ओ संदेश लेख: जियापोअ वाडाली आन बेनतारी तारवाआ होय, तो एहें कोहे, 13तु का रोहे तों माहूं मुंदू होय. जिहीं सैतानोअ गादी होय तिहीं तू माआं नाव वातड़ो तोइत रोयुहू. आन जिहीं सैतान रोहे तिहीं माआं खोरु साक्शीदार अंतिपास तुमामेहें माआंयु, तेहलाम बी तुमे मापोर्‍युउ विश्वास ने सोड़्यू. 145 पोन तेबी ताआ थोड़ीक गोठी सुकतीही ते कोअलोअ माहूं भाग होय. ते गोठी ए होय के, बालामोअ शिक्शण माननारे माहें ताआ जागे होय, तिये मुर्तीही पुंजल्‍यी वस्तुउ खाये तेहें आन सिनालो कोए तेहें इस्राएलवालाआं सामने बालाकोहो टेवाड़्यु. 15तेहलेज तुमाआ विसमेहें जें निकोलायोअ शिक्शणोहों मानतेहें एहलेहे थोड़ेक माअहें बी होय, जियांआं आंय सीस कोअहो. 16तियाहा काजे पापोअहें रोत मोन फिरव; नेते आंय ताआ जागे वेगुज आविहीं आन माआं मुखोअ तारवाइ वाअहीं तियां माअहोंअरी सुलाअहीं.

17“आत्मा मंडड़ीही की कोहे तों जियाआ कान ओय तों उनाइत ल्या! जों जिके, तियाहा आंय निकाड़ल्या मान्नाम रोत आपीहीं; आन तियाहा एक पांडू डोण बी आपीहीं; आन तिया डोणोपोअ एक नोवो नाव लेखल्यो रोय, जियाहा तो डोण जोड़े तिया सिवाय बिहीरो कोडो ने जाइंत सेके.6

थुवतीराआ मंडड़ीही संदेश

18“थुवतीराआ मंडड़ीइ दुतोहो ओ संदेश लेख:

“जियाआ डोआ आगीइ होस भोबलीइताहा, आन जियाआ गुडा इसत्लेए होस समकीइताहा, तो देवोअ बेटुह्हू एहें कोहे, 19माहूं ताआ कामोअ, ताआ मेर आन विश्वास, सेवा, आन धिरोअ बाप्तिमेहें मुंदू होय, आन ताआ सेलवार्‍येए कामे पेल्लाआ कामों रोत हाजे होय, ओं बी माहूं मुंदू होय. 207 पोन माआं ताहूं ए सुक देखाड़ीइलो भाग होय के, तू तियी इजेबेल नावोअ बोईंहीं तुमाआं विसमेहें रोअहूं देहे. जे सोताहा भविश्यवक्ती कोहे आन तियीइ शिक्शणो वाअहीं माआं सेवकोहों सिनालो कोइलाअ आन मुर्तीही पुंजल्यो माहां खाय तेहें काजे भटकाड़ेहे. 21आंय तियीही मोन फिरावे तेहें काजे वेल आप्यी, पोन सिनालो सोड़ीइलोअ तियीइ इश्शा कायनाहां. 22पाल, तियीही आंय खाट्लाम रोत ने उठे एहलिही बिमार कोइ देहीं, आन जर तियीइरी सिनालो कोअनारे तियांआं कामोअहें रोत मोन ने फिरावे, ताहां आंय तियांपोअ वोडी पिड़ा टाकीहीं. 238 आंय तियीइ पोर्‍याहां माइत टाकीहीं; ताहां आखी मंडड़ीही मुंदू जाय के दिल आन मोनोअ फारकीइनारु आंयज होय, आन आखाहा जिवज्योअ कामोअ पुरमाणे फल आपीहीं.

24“पोन थुवतीरावाले जें बाकी रोयेहे तें तुमू तियीइ शिक्शणोहों नाहां मानते आन सैतानोअ गुप्त्यी गोठी कोतेहे ते जियांहां नाहां मुंदू, तियां आखाहा आंय एहें कोहो: आंय तुमापोअ फाशुउ वोजू ने टाको. 25पोन आंय आविहीं ताअहूं जाआं जों शिक्शण तुमापोअ होय, तियाम तुमू मजबुत रोवा. 26जों जिकीत जाय आन सेवटी जाआं माआं कामोअ पुरमाणे कोअतो रोय, तियाहा आंय आखा देशोअ माअहूं पोअ माहूं जोड़्युहू तेहलुहू आधिकार आपीहीं. 27आन जेहें कोइत कुंबारोअ बासने लोड़ाआ डांडा वाअहीं सुउवात जातेहे, तेहें कोइत लोड़ाआ राजडांडू9 लेत कोइत तों तियांपोअ राज कोए. 28आन आंय तियाहा उजाल्यु तारु आपीहीं.

29“आत्मा मंडड़ीही की कोहे तों जियाआ कान ओय तों उनाइत लेय.”