प्रगटी 12

बोईं आन अजगर

1ताहरोअ होरगा मेहें एक वोडी बी निशाणी देखाअयी, ते ए के एक बोईं देखाअयी, ते दिहोअ उजालो फांगीत ओती आन तियीइ गुडाआ निसे सांद आन तियीइ मुंडोपोअ बार ताराआ टोपू ओतू. 2ते पोटावाली बोईं ओती आन वेणे देत ठाल्ली पोड़ीइलाआ कोअते आअड़ीतीते.

3होरगामेहें बिहीरी एक निशाणी देखाअयी ते ए; पाला, एक वोडू बी रात्लू अजगर देखाअयू, तियाहा हांत मुन्के आन दोहो हिंगे ओते आन तियाआ मुंडोपोअ हांत टोपा ओता. 4तिया अजगरोअ सेपटी जुगोमेर्‍याआ तारामेहें रोत बाराने भागोहो ओदारीत पाड़ीत धरतीपोअ टाकी देदा, ते बोईं ठाल्ली पोड़े, ताहां तियीइ पोर्‍याहा खात जाअलोअ कोअते तो अजगर तियी बोईंइ आगाड़ी उबू रोयू. 5आखा देसोपोअ लोड़ाआ डेंगारा वाअहीं राज कोए, एहेलाहा पोर्‍याहा तियी जल्म आप्यो; पोन तिया पोर्‍याहा आखलीत कोइत देवोअ जागे आन तियाआ राजगादीइ जागे पोताड़ी देदू. 6ताहरीइ ते बोईं रानोमेहें नाहींत गोयी, तिहीं तियीही बारा होव साट दिही वारुहूं रोय तेहें काजे देवे एक जागू तियार कोअयुतो.

7फाशीइ होरगामेहें लड़ाय ओवी, मिखाएल आन तियाआ देवदुत अजगरोअरी लड़ाय कोइलाअ काजे निहींया, आन तियाअरी अजगर आन तियाआ दुत लड़ाय कोअयी; 8पोन ते तियांआं आगाड़ी टिकीत ने सेका, आन होरगामेहें तियांआं कोअते किज जागू नाहां रोयू. 9ताहां तिया वोडा जुना हापोहो, जियाहा आरोप लागाड़नारु सैतान कोतेहे, तो आखी दुन्याहां भटकाड़ेहें, तियाहा तियाआ दुतोअरी धरतीपोअ आस्टी देदू.1

10आंय होरगामेहें एका जोअहों वोडा आवाजोम एहें कोत्लाहा उनाअयू, “ओमे आमाआं देवोअ तारण, ताकत, राज्य आन तियाआ ख्रिस्ताआ आधिकार देखाअयुहू, काहाके आमाआं पाव्हीइलापोअ आरोप लागाड़नाराहा निसे टाकी देदुहू, जो रातेन दिही आमाआं देवोअ सामने तियांपोअ आरोप लागाड़्या कोअतुतो.2 11तें मेडाअ रक्तावाअहीं आन सोताआ साक्शीइ वसनोवाअहीं सैतानोहो हारवी देदू, काहाके तियां सोताआ जिवोहो मेर ने कोअयी, पोन मोत बी वेठीत लेदो. 12तियाहा काजे होरगो आन तियाम रोनारे खुशी कोआ; पोन ए धरती आन दोर्‍या तुमाआ केतीही विते! काहाके सैतान माआं थोड़ीज वेल रोयीही, ओं जाइंत कोइत जुदी खोतेम आन कावराअतुज तुमाआं जागे उतरीत आयुहू.”

13अजगरोहो मुंदू गोयू के तियाहा निसे धरतीपोअ आस्टी देदुहू, ताहरुउ तो तियी बोईंइ फाट लागू, जियी तिया पोर्‍याहा जल्म आप्योतो. 14तियी बोईंहीं वोडा मोरागाआ फाके आप्ये, ताहरीइ ते तियां फाका वाअहीं देवे वारुहूं रोय तेहें काजे बोणावल्या जागामेहें उडीत जाती रोय, जिहीं तियीही साड़े तीन वोरह्ये अजगरोअ दाके मिक्यीते. 15तिये अजगरे तियी बोईंहीं वोहाड़ीत लेत जाय एहेलोहो नोयीइ होसर्‍योअ पाईं तियीइ फासाड़ी तियाअ सोबीम रोत सोड़ी देदो. 16पोन धरती तियी बोईंइ मदत कोअयी, आन तियीइ सोब उगाड़ीत कोइत तियी नोयीही पीत गोयी, जे अजगरे तियाआ सोबीवाअहीं वोहाड़्यीते. 17ताहां अजगरोहो तियी बोईंपोअ जुदी खोत लागी आन देवोअ आदेश पालन कोअनारा आन ईसुउ बाप्तिमेहें आपल्यी साक्शीपोअ मजबुत रोनाराअरी, तो लढ़ाय कोउ गोयू. 18आन तो दोर्‍याआ रेटापोअ जात उबू रोयू.