Noiri
प्रगटी 11
बेन साक्शीदार
फाशोअ कोडे तेबी माहूं मापे तेहें काजे एक बुओं आप्यो, आन कोयो, “उठ आन देवोअ मंदिरोअ, देवान्याहां आन तिहींइं भक्ती कोअनाराहा मापीत ले. पोन मंदिरोअ बाअथेए खोली रोअहूं देजी, तियाहा मा मापीही; काहाके तो जागू पारका माअहुंउं ताबे कोइ देदुहू, आन तें सोका होयरोहो बेशाड़ीस मोयना जाआं खुंदरे. आंय माआं बेन साक्शीदारोहों मोकलिहीं, ते गोंठो फांगीत कोइत बारा होवेन साट दिही जाआं देवोअ संदेश कोत आपे.”
ए साक्शीदार तेज जेयतुनोअ ते बेन साड़े आन बेन दिवा होय, जे धरतीइ मालख्योअ सामने उबा रोताहा. जर एखू तियां साक्शीदारोअ नुकसान कोअहूं होदेहे, ताहां तियांआं मुखोम रोत आग निहेंहे आन ते तियांआं दुस्मोनोहों आरवीत टाकेहे; जो कोडो यांहां तारास देएलाआ इश्शा कोअहे, तियाहा एहेंज कोइत मोअहूं पोड़े. तियांआं भविश्यवाणीइ दिहोमेहें वोऱ्हात ने पोड़ुहूं जोवे काजे जुग बोंद कोइलाआ तियांहां ओ आधिकार होय. यांहां पाअयोंहों रक्तामेहें बोदलीइलाअ आन जाहां जाहां यांहां जोवे, ताहां ताहां धरतीपोअ वोडी मोराय मोकलीइलाअ आधिकार होय.
जाहां ते तियांआं साक्शी आपी देय, ताहां उंडा खायाराम रोत उपोअ निहीनारो जनवार तियांअरी लड़ाय कोए आन तियांहां हारवीत कोइत माईं देय.1 तियांआं तोड़ तिया वोडा होयरोअ सोवक्ड़ीमेहें पोड़ीत रोये, जे आत्मिक अर्थावाअहीं सदोम आन मिसर कोतेहे, आन जिहीं यांआं प्रभुहू क्रुसोपोअ टांग्युतो. साड़े तीन दिही जाआं हारेक जातीइ, कुल, बाशा आन देसोअ आखे माअहें तियांआं तोड़ पाले आवे, आन तियांआं तोड़ोहो ओजीइलाअ परवानगी ने आपे. यां बेन जोंअ मोत पालीत धरतीपोर्येए माअहें खुस ओवे, मोज्या कोए आन एका-मेकाहा भेट मोकले, काहाके तियां भविश्यवक्ता धरतीपोअ रोनाराहा तारास कोआड़्या कोअताते. साड़े तीन दिहोअ फासाड़ी देवोअहीं रोत तियां बेनुमेहें जिवनोअ हावा आयी, आन ते जिवीत उठ्या, ताहरेए तियांहां देखनारे आखे जुदे बित गोये. ताहां तियांहां जुगोम रोत एक आवाज एहें कोत्लाहा ते उनाअया, “इंहीं उसे आव,” आन तियांआं दुस्मोनोअ देखताइज वाद्लापोअ बोहीत जुगोम जाता रोया. तेहेलाजमेहें वोडो बी भुकंप ओवयो, आन होयरोअ दाहवू भाग खेकराइत गोयू; आन हांत हाजार माअहें मोइत गोये, आन रोल्ये माअहें बित कोइत होरगामेर्याआ देवोअ महिमा कोअयी.
दुसरी पिड़ा वितीत गोयी; आन तिसरी पिड़ा वेगीज आवनारी होय.
हांतवी तुरी
जाहां हांतवे देवदुते तुरी फुक्यी, ताहां होरगामेहें रोत आवाज आवेहे, जो वोडा आवाजोमेहें कोहें: “यी दुन्याआं राज्य आमाआं प्रभुउ आन तियाआ ख्रिस्ताआ राज्य बोणीत गोयोहो, आन तो तियापोअ हादाजलम राज कोए.” शोवीस डायहां, जे देवोअ सामने तियांआं राजगादीपोअ बोहीत रोयाहा, उब्डा पोड़ीत आन एहें कोत देवोअ आराधना कोआ वोल्या,
“ए प्रभु, आखाम रोत वोडी ताकतवाला देवा, जो होय, जो ओतू, आमू ताआ आभार मानतेहें,
काहा के ताआ वोडी ताकत तू लेत लेदीही
आन तूमे ताआ राज वापरीइलाआ सुरुवात कोअयीही.
आखी जातीइ माअहुंहूं खोत लागी,
पोन ओमे ताआ खोत कोइलोअ वेल आवीत लागीही.
मोल्याआं न्यायनिवाड़ु कोइलाआ वेल आवित लागीही,
आन ताआ सेवक, भविश्यवक्ता
आन ताआ पवित्र माअहें,
आन ताआ नावोअ बिक मिकीत सालनारे हाना वोडाहां इलाम आपिलोअ वेल आवित लागीही,
आन धरतीही बिगाड़नाराहां आरवीइलाअ वेल आवित लागीही!”
ताहां होरगामेहें देवोअ मंदिर उगड़ीत गोयो, आन मंदिरोमेहें तियाआ वायदाअ पेटी देखाअयी; आन विजल्योन गाज्यो, वोडु तुदड़ाआ आवाज आयु, भुकंप ओवो, आन वोडे-वोडे गारे पोड़्ये.2
Source notes (2)
- Cross-reference दानि 7:7,21; प्रगटी 13:5-7; 17:8
- Cross-reference प्रगटी 8:5; 16:18,21
Noiri. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.