Noiri
फिलि 4
सुसना
तियाहाकोत माआं मेराला पाव्हीइला, माआं तुमापोअ जास्ती जिव होय, आन आंय तुमाआं जास्ती ईत कोअहो! तुमू माहूं जाअखु खुस कोअयू! आन तुमू माआं बक्शीस होय, माआं पाव्हीइला देवोमेहें एहेंज कोइत वातड़े रोवा.
आंय युदियाहा बी समजाड़ोहो आन सुन्तुखेहे बी, के तुमू देवोमेहें एक मोन्ये रोवा. माआं खोरा हाती, आंय ताहूं विनंती कोअहो के तु तियीं बायहींइं मदत कोअ, काहाके तियीं माअरी हाजी बातमी परसार कोइलोमेहें, क्लेमेंस आन माआं बाकी आरीइ हाती मिलीत मेहेंनत कोअयी, जियांआं नावे जिवनोअ पुस्तकोम लेखाअयेहे.
प्रभुमेहें कायम खुस रोवा; आंय फाशुउ कोहो, खुस रोवा.
तुमाआं हानालाय आखा माअहूंमेहें देखाअहूं जोवे. प्रभु आहने होय. कोड्लीज बी गोठीइ सिंता मा कोअहा, पोन आखी गोठीम तुमाआं निवेदन, प्रार्थना, आन रावणी वाअहीं धन्यवाद कोइत देवोअ सामने हजर कोआ. ताहां देवोअ होक जो होमजायन्ने एतुहू होय, तो तुमाआं मोन आन तुमाआं विसारोहो ख्रिस्त ईसुमेहें वारुहूं मिके.
तियाहाकोत माआं पाव्हीइला, जे जे गोठी खोरी होय, आन जे जे गोठी मानुहूं जोगीही होय, जे जे गोठी बोराबर होय, जे जे गोठी पवित्र होय, आन जे जे गोठी स्विकारुहूं जोगीही होय, जे जे गोठी गोमे एहलिही होय, मोन्ज्ये जे बी हाजा सोभावोअ आन नाव काडुहूं जोगीही गोठी होय, तियींपोअ मोन लागाड़्या कोआ. जे गोठी तुमू मापरोत सिकाअये, स्विकार्यी, आन उनाअये, आन मामेहें देख्यी, तियींइंज पालन कोअते रोवा, ताहां देव जो होकेए उकलु होय तो तुमाअरी रोय.
भेटेए वोतीइ आभार
माहूं प्रभुमेहें जास्ती खुसी जोड़्यी. ओमें एताहा दिहोअ फासाड़ी माआं बाप्तिम तुमाआं कालजी फाशीइ जागती ओयीही; खोरीज तुमुहूं सुरवातिही बी याआ विसार ओतू, पोन तुमुहूं वेल ने जोड़्यी. माहूं काविहीं कमी पोड़्यो कोत आंय गोगोहो एहलोहो नाहां; पोन जियी दशामेहें आंय होय, तियीज दशामेहें खुस रोअलोअ आंय टेवाअयुहू. आंय हानू बोणीइलो बी जांअहों आन वोडो बोणीइलो बी जांअहों; आखी गोठी आन आखी दशामेहें खुस रोअलो, फुकल्या रोअलो, आन वोदीअलो कमी ओवीइलोअ माहूं मुंदू होय. जो माहूं ताकत आपेहे तियामेहें आंय आखोज कोइत सेकोहो.
तेबी तुमू माआं तारासोमेहें माअरी भागिदार बोण्ये हाजो कोअयो. फिलीप्पीवालां, तुमू सोताहा बी जांअतेहे के हाजी बातमी सुरुवातीमेहें, जाहां आंय मकिदुनिया रोत निहीयु, ताहां तुमाआं सिवाय बिहीरी कोड्लीज मंडड़ी लेणा-देणाअ बाप्तिमेहें माहूं मदत ने कोअयी. एंहेंज कोइत जाहां आंय थेस्सलनीकेमेहें ओतू, ताहां बी तुमू माआं गरज पुरी कोइलोअ काजेहे एकवारी सोड़ीत बेनवारी जाआं मदत कोअयी. माहूं भेट जोवे एहेलोहो नाहां, पोन माहूं तुमाआं फायदाअ काजेहे वादतो जानारो फल जोवे. मापोअ आखोज होय, भारपुर बी होय; जे वस्तु तुमू एपाप्रदितोअ आथे मोकल्यी, ते तोइत आंय ताराइत गोयुहू, ते ताम गोमे एहेलुहू वास, देवोहो मान्य ओवे एहलिही गाराहा होय, आन गोमे एहलिही भेट होय. माआं देव बी तियाआ तिया मालधनोम रोत जों महिमाअरी ख्रिस्त ईसुमेहें होय, तुमाआं आखी गरज पुरी कोए. आपाआ देव आन बाह्हाअ महिमा पिढ़ीन पिढ़ी रोअहूं जोवे! आमेन.
आखरीइ सलाम
हारेक विश्वासी पाव्हीइलाहा, जों ख्रिस्ताम होय तियाहा सलाम कोवा. जे पाही माअरी होय ते तुमुहूं सलाम कोताहा आखे देवोअ माअहें, खास कोइत जे कैसरोअ कुटूंबामेर्येए होय, तुमुहूं सलाम कोतेहे. आपाआ प्रभु ईसु ख्रिस्ताआ मेरवानी तुमाअ आत्माअरी रोये.
Noiri. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.