निर्ग 14

लाल दोर्‍या उनकीइलोअ

1ताहरोअ यहोवा मोशेहे कोयो: 2“इस्राएलोहो आदेश आपेए, के ते फिरीत कोइत मिग्दोल आन दोर्‍याआ विसमेहें, पिहाहिरोथोअ जागे, बालसफोनोअ सामने तियांआं पोड़ावू कोइलाआ, तियाआज आगाड़ी दोर्‍याआ टेकोपोअ पोड़ावू कोए. 3ताहां फारो इस्राएलोअ बाप्तिमेहें विसार कोए, ‘तें ओजाण्या देसोम जात कोइत पुलवात गोयेहे.’ 4ताहां आंय फारोअ मोन कठीण कोई देहीं, आन तो तियांआं फासाड़ी लागे. ताहां फारो आन तियाआ आखा सेवको वाअहीं माआ महिमा ओवे; आन मिसर देश जांइत लेय के, आंय यहोवा होय.” आन तियां तेहेंज कोअयो.

5जेहेलाम मिसरोअ राजाहा ए हाजी बातमी मिल्यी के ते माअहें गुगदे वोल्ये, ताहां फारो आन तियाआ आधिकारोअ मोन तियांआं विरोध मेहें बोदलात गोयो, आन ते कोने वोल्ये “आमुं ओं कि कोअयो के इस्राएलोहो आपाआ गुलामगिरीम रोत सोड़ीत कोइत जाअहूं देदे!” 6ताहां तिये तियाआ कोड़ाआ गाडो1 जुपाड़्यो आन तियाआ सेनाहा आरी लेदा. 7तिये सोव होव हाजाम हाजे कोड़ाआ गाडे आन मिसरोअ आखे कोड़ाआ गाडे लेत लेदे आन तियां आखापोअ आधिकारी बोहाड़्या. 8आन यहोवा मिसरोअ राजा फारोअ मोन कठीण कोइ देदो. तियाहा काजे ते इस्राएलोअ फासाड़ी लागा; पोन इस्राएल जिके वाअहीं निहीत जातेते. 9पोन फारोअ आखा कोड़ा आन गाडे, आन तें सालवीइनारा तोइत मिसर सेना तियांआं फासाड़ी लागीत कोइत तियांआं जागी, जे पिहाहिरोथोअ जागे, बालसफोनोअ आगाड़ी, दोर्‍याआ टेको पोअ पोड़ावू टाकीत रोयाते, जात पोत्या.

10जेहेलाम फारो जागे आयू, ताहां इस्राएल नजर उसे कोइत पाल्यो के मिसर आपाआ फासाड़ी आवेहे; आन इस्राएलवाले जाअखीलेहे बित गोये, आन यहोवाहा आअड़्ये; 11आन तें मोशेहे कोने वोल्ये, “तु आमुहूं मिसरोमेहें रोत माइलोअ काजे इंहीं जंगलोमेहें लेतायुहू, केहें तिहीं माहणे ने ओतो के? तु आमुहूं मिसरोमेहें रोत काडीत लेतायुहू, ओं तुमे आमाअरी कि कोअयोहो? 12केहें आमू ताहूं मिसरोमेहें ए गोठ ने कोते रोये के, ‘आमुहूं रोअहूं दे के आमू मिसरोअ सेवा कोअहूं?’ आमाआ काजे जंगलोमेहें मोइलाआ रोत हाजो मिसरोअ सेवा कोइलाआ ठिक ओतो.”2

13मोशे माअहुंहूं कोयो, “बिहा मा, उबे उबे तों तारणोअ काम पाला, जों यहोवा आज तुमाआ काजे कोए; काहाके जिया मिसरोहो तुमू आज देखतेहे, तियाहा फाशेए केदिहींज ने देखहा. 14यहोवा सोताहा तुमाआं काजे लोड़ाय कोए, तियाहा काजे तुमू ठावके रोवा.”3

15ताहां यहोवा मोशेहे कोयो, “तू माहूं रावणी काहा कोअहे? इंहीं रोत इस्राएलोहो आगाड़ी जाय तेहें काजे को. 16आन तु ताआ डेंगार विसीत कोइत ताआ आथ दोर्‍यापोअ उसू कोअ, आन तो बेन भाग ओत जाय; ताहां इस्राएल दोर्‍याआ विसमेहें ओत कोइत सालीत जाय. 17आन उनाआ, आंय सोताहा मिसरोअ मोनोहो कोठीण कोअहो, आन ते तिहीं बी तियांआं फासाड़ी लागे. ताहां फारो आन तियाआ आखा सेवक, कोड़ाआ गाडो आन कोड़ापोर्‍याआ मोइत जाय ताहां माआ महिमा ओवे. 18आन जेहेलाम फारो आन तियाआ कोड़ाआ गाडे, आन कोड़ाआ गुगदाड़नारा हारवाइलो वाअहीं माआ महिमा ओवे. ताहां मिसर जाईंत लेय, के आंय यहोवा होय.”

19ताहां देवोअ देवदूत जो इस्राएलोअ सेनाआ आगाड़ी आगाड़ी साल्या कोअतुतो, तो जात कोइत तियांआं आगाड़ी ओत गोयु; आन वाद्लाआ खांब तियांआं आगाड़ी रोत टोलीत कोइत तियांआं फासाड़ी आवीत उबू रोयू. 20एहेंकोइत तो मिसरोअ सेनाआ आन इस्राएल माअहोंअ सेनाआ विसमेहें आवीत लागू. तों वाद्लो मिसरी सेनापोअ आंदारो कोअयो आन इस्राएल माअहोंहों उजालो आप्यो तियाहा कोत ते रात पोइत एकमेकाआ जागे आवीत ने सेके.

21ताहां मोशे तियाआ आथ दोर्‍याअ उपोअ कोअयू; आन यहोवा रात पोइत जुदो वारो सोड़्यो, आन दोर्‍याआ विसमेहें बेन भाग कोइत पाईं एहलोहो वेरी देदो, जेहेलोहो तियाआ विसमेहें उगाअली धरती ओत गोयी.4 22ताहां इस्राएल दोर्‍याआ विसमेहें कोअड़ा जागाम साल्ये, आन पाईं तियांआं हाजाड़्यी आन बांगाड़्यीइ वोल भिंताआ होस उबो ओतो. 23तेहेलाम मिसरवाला ओड़ीत लागा, मोन्ज्ये फारोअ आखा कोड़ा, कोड़ाआ गाडे आन गोदड़ापोर्‍याआ सवार नेहें दोर्‍याआ विसमेहें ओत तियांआं फासोअ गोया. 24आन वेगर्‍याआ सिंजीवड़ाअरीही यहोवा वाद्ला आन आगीइ खांबामेहें रोत मिसरोअ सेनापोअ नजर टाकीत कोइत तियांहां काबरावये. 25आन तिये तियांआं कोड़ाआ गाडाआ साके काडीत टाक्ये, जिया वाअहीं तियांआं सालाड़ीलोअ कठीण ओत गोयो. ताहां मिसरवाला तियां तियांआं कोना वोल्या, “साला, आपू इंहीं रोत नाहींत जाता; काहाके यहोवा इस्राएलोअ वोगेहे रोत मिसरवालाआं विरुद्दामेहें लोड़ाय कोअहे!”

26फाश्योअ यहोवा मोशेहे कोयो, “ताआ आथ दोर्‍या पोअ नांबू कोएए, ताहां तों पाईं मिसर वाला आन तियांआं गाडो, आन कोड़ापोर्‍याआ बोहनाराहां बुडाड़ीत लेय.” 27ताहां मोशे तियाआ आथ दोर्‍याअ वोल नांबू कोअयू, आन दिही उगता-उगता दोर्‍या जेहेलुन तेहेलुज ओत गोयू; आन मिसर वाला उलटा गुगदीइलोअ कोशित कोअयी, पोन यहोवा तियांहां दोर्‍यामेहें बुडाड़ीत देदा. 28आन पाईं ओतो तेहेलोज ओत गोयो, ताहां जेतेहे रथ आन कोड़ा पोर्‍याअ सवार इस्राएलोअ फाटी दोर्‍या मेहें आयाते, आन आखा फारोअ सेयनिक नेहें तियामेहें बुडीत गोया, आन तियांमेहें रोत एक बी ने वासाअयो. 29पोन इस्राएल वाले दोर्‍याआ पोरापोर कोअड़ी वाटे पोअ सालीत कोइत एकी मेरे जाते रोये, आन तों पाईं तियांआं हाजाड़ी आन बांगाड़ी बेनू वोल भिंताआ होस ओत गोयो.

30ताहां एहें कोइत यहोवा तिये दिहे इस्राएलोहो मिसर वालाआं आथोम रोत सोड़व्ये; आन इस्राएलवालां मिसर वालाहां दोर्‍याआ मेरे मोइत रोल्ये देख्ये. 31जेहेलाम इस्राएलवालां यहोवा देवोअ मिसरोपोअ वोडे सेक्तीवाले कामे पालित कोइत बिये आन यहोवा पोअ आन तियाआ सेवक मोशे पोअ बी विश्वास कोअयू.