कलस्से 3

1तियाहा कोत तुमू ख्रिस्‍ताअरी फाशेए जिवित उठ्येहे ताहां, तुमाअ मोन होरगाआ गोठीइहें लागाड़ा, जिहीं ख्रिस्त देवोअ हाजाड़्या आथोअ वोलेहे तियाआ राजगादी पोअ बोठुहू.1 2धरती पोर्‍यीइ नाहां पोन होरगाआ गोठीपोअ मोन लागाड़ा, 3काहाके तुमू ते मोइत गोये आन तुमाअ जिवन ख्रिस्ताआ आरी देवोमेहें निकात रोयोहो. 4ताहां ख्रिस्त जो तुमाअ जिवन होय, तो देखाये, तेहलाम तुमू बी तियाअरी महिमामेहें देखाअहा.

जुनो आन नवो जिवन

5तियाहाकोत आपाअ या शरीर सोभावोहो माइत टाका, जे तुमामेहें काम कोअताहा, मोन्ज्ये सिनालोअ कामे, एठे कामे, खाराब कामे, घाण इश्शा आन लोभ जो मुर्तीपुजाअ होसुज होय.2 6यींज गोठी वाअहीं आदेश ने माननारापोअ देवोहो खोत लागत्ली. 7आन तुमू बी, जेहेलाम यीं खाराब गोठीमेहें जिवतेते ताहां तेहेंज कोइत सालतेते.

8पोन ओमे तुमू बी खोत कोइलो, जाअखो खिजवाइलो, सीस कोइलो, रोवा कोइलो आन सोबीवाअहीं गाई देअलो ए आक्खी गोठी सोड़ी द्या. 9एकमेकाहा ठोगहा मा, काहाके तुमू जुना सोभावोहो तियाआ सोवायीइरीज काडीत टाक्युहू.3 10आन नोवा सोभावोहो पोवित लेदुहू, जो आपाअ बोणावनाराआ रुपोअ होसूज ज्ञानोमेहें नोवू बोणतु जाहे. 11तियामेहें ने कोडू युनानी ने यहुदी, ने खतनावालु के ने बिगर खतनाआ, ने रानठ्यु के, ने स्कुथी, ने बांदाअलू के ने सुटलू, फक्त ख्रिस्तज आखो आन आखाजमेहें होय.

12तियाहा कोत तुमू जें देवोअ निवड़ीइल्याअ होस, पवित्र आन मेराले माहें होय, तुमू वोडी माया, आन हाजली गोठी, आन हानालाय, आन सहनसेक्ती याहां पोवित ल्या. 13जर कोडाहा एखापोअ आरोप लागाड़ुहूं जोगिही काविहीं गोठ ओय, तेबी एकमेकाहा वेंडारीत ल्या, आन एकमेकाआ सुकी माफ कोइ द्या, जेहें कोइत देवे तुमुहूं माफ कोअयेहे तेहेंज कोइत तुमू बी माफ कोआ.4 14यां रोत बी जाअखो मेर ओं एक एहेलोह बंधन होय, जों आपुहूं पाक्के बोणावेहे याहा पोवित ल्या. 15ख्रिस्ताआ होक तुमाआं मोनोम राज कोअहूं जोवे, जियाअ कोअते तुमुहूं देवे एकठेज हाद्येहे; आन तुमू आभार मानते रोवा. 16ख्रिस्ताआ वसनोहो तुमाअ मोनोम वादार वोहती कोअहूं द्या, आन पुरी ओकोल देत कोइत एकमेकाहा हिकाड़ा आन मुंदू काडीत आपा, आन जिव जिवोअ मोनोमेहें धन्यवाद कोअतेज, देवोअ काजे भजने आन स्तुतीइ गिते आन आत्मिक गिते गावा. 17आन तुमाआं गोगीइलो मेहें नेत कामोमेहें जों किबी कोअहा, तों बादो प्रभु ईसुउ नावो वाअहीं कोआ, आन तिया वाअहीं देव बाह्हाआ आभार माना.

नवा जिवनोअ कुटूंबाअ नियम

18ए बोईं, जेहें कोइत प्रभुमेहें ठीक होय, तेहेंज कोइत जिव जिवोअ माट्योअ ताबाम रोवा.

19ए माट्यों, तुमू जिवज्योअ बोईंपोअ मेर कोआ, आन तियांअरी जोराखा मा वागहा.

20ए पोर्‍यां, तुमू जिव जिवोअ आयहीन आब्हाआ गोठी माना, काहाके ओं देवोहो गोमेहें.

21ए पोर्‍यावालां, जिव जिवोअ पोर्‍याहां खिजवाहा मा, नेत तियांआं हिम्मत टुटीत सेकेहे.

22ए नौकरों, मोनवीम जो तुमाअ मालिख होय, तियांआं बादी गोठीम आखा आदेश माना, माअहुंहूं देखाड़ीइलो काजे मा, पोन खोरा मोनो वाअहीं देवोअ बिकेवाअहीं तियांआं आदेश माना. 23जों किबी तुमू कोअहा तों पुरा मोनोवाअहीं कोआ, एहेलोहो समजीत कोआ के माअहुंउं काजे नाहां, पोन देवोअ काजे कोअताहा; 24काहाके याअ बोदले तुमुहूं मालख्योपोअ रोत बक्शीस जोड़े ओं तुमुहूं मुंदू होय; तुमू मालिख ख्रिस्ताआ सेवा कोअता रोवा. 25काहाके जो बाक्तो कोए तियाआ मोजरी तियाहा जोड़े, देवोअ जागे कोडाआ भेदभाव कायनाहां.