प्रेशित 20

मकिदुनिया आन आसिया

1जाहां दोंगू बोंद ओवू ताहां पौलुसे सेलाहां हादाड़ीत कोइत समजाड्या, आन तिये आंय जाहो एहें कोत कोइत मकिदुनियाअहें जानु वोल्यू. 2तिया आखा मुलखोमेहें फिरतुज आन सेलाहां खुब धिर आपीत कोइत तो ग्रीस देसोमेहें आयू. 3जेहेलाम तिन मोयना रोत कोइत तो तिहीं रोत जाहाजेम सिरियाअहें जाअहूं ओतू, तेहेलाम यहुदी तियाहा माइलाअ फासाड़ी लागा, तियाहा काजे तिये ओं निर्णय लेदो के मकिदुनियाम फिरीत कोइत वोलीत जांव. 4बिरीयावालू पुर्रुसोअ पोर्‍यू सोपत्रस, थेस्सलनीमेर्‍याआ अरिस्तर्खुस आन सिकुन्दुस; दिरबेवालू गयुस; तिमथ्या आन आसिया भागोअ तुखिकुस आन त्रुफिमुस आसिया जाआं तियाअरी गोया. 5ते आगाड़ी जात कोइत त्रोआसोमेहें आमाआं वाट जोवता रोया. 6आन आमू विण खमीरोअ रोटाअ दिहोअ फासाड़ी फिलीप्पीम रोत जाहाजेम बोहीत कोइत पास दिहोम त्रोआसोमेहें तियाआ जागे पोत्या, आन हांत दिही जाआं तिहींज रोया.

त्रोआसोमेहें पौलुसोअ सेलवार्‍योअ मिलणो

7आठीवड़ाआ पेल्लेए दिहे जेहेलाम आमू रोटू मुड़ीइलाअ1 काजे टोलू वोल्या, ताहां पौलुस तियांअरी गोठी मिकू वोल्यू, काहाके तो बिहीरे दिही जानारु ओत्लू, आन तिये पोरापोर राती जाआं गोठी मिक्याज कोअयी. 8जियी उपर्‍यीइ खुलीम आमू टोलू वोलीत ओता, तिहीं जाअखीलाहा दिवा पेटाअताते. 9आन युतुखूस नावोअ एक जुवान खिड़कीपोअ बोठ-बोठू उंगाअया कोअतुतो. जेहेलाम पौलुस हांहतुहू जाआं गोठी कोअतू रोयू, तेहेलाम तो निंदेवाअहीं तिसरी तालीप रोत निसे टुटीत पोड़्यू, आन तियाहा मोल्यूज विसीत लेत गोये. 10पोन पौलुस उतरीत कोइत तियाहा गलाअरी सोपटीत लेदोन कोयो, “बिहा मा; काहाके याअ जिव याजमेहें होय.” 11आन उसे जात कोइत रोटू मुड्यू आन खात कोइत एतुहू हांहतुहू जाआं तियांअरी गोठी मिकतू रोयू के हुजीत गोयो. ताहरुउ तो जातू रोयू. 12आन ते तिया जुवानोहो जिवतुज कोअ लेताया आन तियांहां जुदू होक जोड़्यू.

त्रोआसोम रोत मिलेतुस जाआं

13आमू पेलुज जाहाजीम बोहीत कोइत या विसारोवाअहीं आगाड़ी अस्सुसोहो आवता रोया के तिहीं रोत आमू पौलुसोहो बोहाड़ीत लेंव, काहाके तिये ओं याअकाजे ठरव्योतो के तो सोताहा पागेज जानारु ओतू. 14जेहेलाम तो अस्सुसोम आमुहूं मिल्यू ताहां आमू तियाहा बोहाड़ीत कोइत मितुलेनेमेहें आया. 15तिहीं रोत जाहाज सोड़ीत कोइत आमू बिहीरे दिही खियुसोअ सामने पोता, आन आगल्येए दिही सामुसोमेहें आवित पोता; फाशाअ बिहीरे दिही मिलेतुसोमेहें आया. 16काहाके पौलुसे इफिसोअ आहने रोत जाअलाअ ठरव्योतो काहाके तियाहा आसियामेहें जाअखी वेल ने रुकाइलोअ ओतो; तिहींज वाअहीं तो तावणीम ओतू काहाके जर ओत सेके ते तो पेन्टिकास्टोअ दिही येरुसालेमोमेहें रोत सेके.

इफिसोअ डायहांहां पौलुसोअ बाशण

17पौलुसे मिलेतुस रोत इफिसोमेहें कोत मोकल्यो, आन मंडड़ीइ डायहांहां हादाड़्या. 18जाहां ते तियाआ जागे आया, ताहां तियांहां कोयो: “तुमुहूं मुंदू होय के आसियाम आवयुहू तेदर्‍युउ आंय तुमाअरी आखा दिही केहें कोइत रोयू. 19मोन्ज्ये पुरी नम्रता वाअहीं, आन रोज्ये पाड़ी-पाडीइ, तियीं परिक्शामेहें जे यहुदीइ कदरे वाअहीं मापोअ आवयी, तेबी आंय प्रभुउ सेवा कोअतूज रोयू; 20आन जे जे गोठी तुमाआं फायदाअ ओती, तियीहीं कोतापीइलाअ आन माअहोंअ सामने आन कोओं कोओं सिकाड़ीलोअ मी केदिहीं आलहाय ने कोअयी. 21पोन यहुदीइ आन बिगर यहुदीइ सामने साक्शी आपतू रोयू के पाप सोड़ीत देवोअहें मोन फिरावुहूं जोवे आन आपाअ प्रभु ईसु ख्रिस्तापोअ विश्वास कोअहूं जोवे. 22ओमे पाला, आंय आत्मामेहें बांदाअलूज येरुसालेमोमेहें जाहो, आन माहूं ने मुंदू के तिहीं माअरी की की ओवे; 23निस्त ओं के पवित्र आत्मा हारेक गांवोंमेहें साक्शी आपी आपीइ माहूं ओं कोहे के जेल आन तारास ताआ वाट जोवतेहे. 24पोन आंय माआं जिवोह किज नाहां समजीइतू के यापोअ मेर कोओ, पोन ओं के आंय माआं काम आन ते सेवा पुरी कोअहूं जोवे, जे सेवा देवोअ मेरवानीइं हाजी बातमी पोअ साक्शी आपीइलाअ काजे प्रभु ईसु माहूं आप्यीही.

25“ओमे पाला, माहूं मुंदू होय के तुमू आखा जियांमेहें आंय देवोअ राज्याआ परसार कोअतू फिर्‍यू, ओमे रोत माहूं फाशाआ ने देखहामें. 26तियाहा काजे आंय आज्युउ दिही तुमुहूं साक्शी आपी आपीइ कोहो, के आंय आखाआ रक्ताप रोत निर्दुस होंव. 27काहाके देवोअ पुरु उद्देश कोतापीइलाअ काजे मी आलहाय नाहां कोअयी. 28तियाहा काजे सोताआ आन मेडाआ गोवाराआ कालजी ल्या, जो पवित्र आत्मे तुमाआं आथम होप्युहू, के तुमू देवोअ मंडड़ीइ राखवाली कोअहूं जोवे, जियीही तिये तियाआ बेटाह्हाअ रक्ता वाअहीं वेसाती लेदीही. 29माहूं मुंदू होय के माआं जाअलाअ फासाड़ी वेतीरनारे कोलवे तुमामेहें आवे जें मेडाआं गोवाराहा ने सोडे. 30तुमाआंज विसमेहें रोत एहेले-एहेले माअहें आवे, जें सेलाहां तियांआं फासाड़ी वालीइलाअ काजे वाकड़ी तिकड़ी गोठी कोत देखाड़े. 31तियाहा काजे जागते रोवा, आन ओर कोआ के आंय तीन वोरह्ये जाआं रात दिही रोज्ये पाड़ी पाडीइ हारेक जोओंहों जाबालालित रोयतेहें कोअलाअ ने सोड्ये.

32“आन ओमे आंय तुमुहूं देवोअ आन तियाआ मेरवानीइं वसनोअ ताबाम होपी देहो; जों तुमुहूं पान्गाड़ीत सेकेहे आन आखा निवड़ीइल्या माअहूंमेहें सामिल कोइत आशिर्वाद आपीत सेकेहे. 33मी कोडाअ सांदी, होनो नेत साअकाआ लालस ने कोअयी. 34तुमुहूं मुंदू होय के यांज आथोवाअहीं माआं आन माआं जोड़ीदारोंअ गरज पुरी ओवी. 35आंय तुमुहूं आखो कोइत देखाड़ी देदोहो के यी पद्धती वाअहीं मेहेंनत कोअता जात लुलाहां मदत कोअहूं जोवे आन प्रभु ईसुउ वसन ओर मिकुहूं जोवे जो तिये सोताहाज कोयोहो: ‘मागीइला रोत आपिइलाम जाअखी खुसी रोत्ली.’”

36ओं कोत कोइत तो मांड्या पोड़्यू आन तियां आखाअरी मिलीत प्रार्थना कोअयी. 37ताहां तें आखे खुब रोड्ये आन पौलुसोअ गले लागीत कोइत तियाहा गुउं देने वोल्ये. 38तें खास कोइत यी गोठी वाअहीं दुखी ओते काहाके तिये कोयीते के तुमू माहूं फाशेए ने देखहामें. ताहराअ तियां तियाहा जाहाजेए जागे जाआं पोताड्यू.