Nguu Bible Version
Zabuli 119
Miko ya Zumbe
Wavikilwa heweina lema,
wakutimila malagizo ya Zumbe. Wavikilwa wakutimila sigilizi zakwe,
wakumzungula kwa mioyo yawe yose,
hewekutenda dyodyose diihile,
lugendo lwawe ni mwe sila za Zumbe.
Kukink'ha sigilizi zako,
kukigamba kizitimile kwa uhuwilwa.
Nevinda vedi wikazi wangu wandile utoga,
mwe kutimila imiko yako.
Ivo henigeligwa soni
hazitimila zisigilizi zako.
Nohutunye weye kwa moyo wedi,
hakehiniza zisigilizi zako zina uwagilwa.
Nenitimile imiko yako,
use kunasa,
Kutimila imiko ya Zumbe Mnungu
Ni kwa vivihi mbwanga autende wikazi wakwe kunda wedi?
Ni kwa kutimila imiko yako.
Nenikuzungule kwa moyo wangu wose,
usekunileka haita hale ne miko yako.
Mbuli yako imwo mwo moyo wangu,
vileke nise kukutendela wavu.
Utunywe weye Zumbe,
unihinize zisila zako.
Kwa mnimo wangu nenisimuile
sigilizi zose ulongile.
Naonela kinyemi kutimila sigilizi zako,
enga kundilisa na ugoli.
Miye nafanyanya zisigilizi zako,
na kuzitimila zisila zako.
Naonela kinyemi zisigilizi zako,
imbuli yako nayo heniibele.
Kuonela kinyemi mwe sigilizi ya Zumbe
Nitendele ayedi mwo wikazi wangu mndima ywako,
nidahe kutimila mbuli yako.
Finyula meso yangu vileke nikaule,
mbuli zo kweheela mwe miko yako.
Miye nimwe si kwa lupisi du,
usekunifisa zisigilizi zako.
Moyo wangu wamunk'hilwa munk'hilwa,
waungisa zisigilizi zako kila lupisi.
Kuwakwank'hila wakukefenya
waligitwe ni wadya wahale ne miko yako.
Usekuwaleka wanibele na kunikalaliza,
kwaviya nazitoza zisigilizi zako,
hata uneva wakulu wekala na kunilonga yaihile,
miye mndima ywako nenifanyanye zisigilizi zako.
Miko yako yanelela,
yanink'ha ulangilizi wedi.
Ulamuzi wa kutimila miko ya Zumbe
Hilambalikwa hasi mwe sanga,
setula ugima wangu enga ivo ulagane.
Nakugambilaga ayo nitendile,
niyo weye wanink'ha uhituzi,
haluse nihinize imiko yako.
Nihinize nikombaganye miko yako,
miye nenifanyanye udamanyi wako wa kweheela.
Miye hihwa kwa kinyulu,
nigele ludole viligane ne Mbuli yako.
Niike hale na mbuli za udant'hi,
kwa uwedi wako unink'he kukombaganya imiko yako.
Hisagula sila ye kindedi,
moyo wangu utozeleza zisigilizi zako.
Zumbe Mnungu, hitozeleza zisigilizi zako,
usekuleka hagelwa soni.
Nenitimile imiko yako,
kwaviya nounink'he kukombaganyisa.
Kulombeza ukombaganyi
Zumbe Mnungu, nihinize sigilizi zako,
name nenizitoze mazuwa yose.
Nink'he ukombaganyi, nizitoze zisigilizi zako,
na kuzitimila kwa kindedindedi.
Nigendeze mwe sila ye miko yako,
kwaviya umwo numo mne kinyemi changu.
Utende moyo wangu uungise zisigilizi zako,
kujink'ha kunda ugoli.
Meso yangu yahituile hale na mbuli ziihile,
unink'he ugima kwombokela mwe mbuli yako.
Mkint'hizile mndima ywako kiya umlagane,
lagano uwenk'hile wadya wakukogoha.
Niusile zisoni zikunitisa,
kwaviya sigilizi zako ni zedi.
Naungisa kutimila imiko yako,
nink'he ugima mhya kwaviya weye umuwagilwa.
Kuhuwila miko ya Zumbe
Zumbe Mnungu, nilagise lukunde lwako holukusila,
uyokozi wako viligane na ivo walongaga.
Aho niho neni wahitule wadya wakunitendela lubezo,
kwaviya naihuwila mbuli yako.
Unink'he kulonga ikindedi mazuwa yose,
kwaviya nahuwila usengelo wako.
Nenizitimile zisigilizi zako mazuwa yose,
heiye, naho mazuwa yose.
Name nenigende kwa ulekelwa,
kwaviya natimila zisigilizi zako.
Neniilonge imiko yako kwa maseuta,
naho heninde na soni.
Naonela kinyemi imiko yako,
kwaviya naiungisa.
Naitimila naho naiunga imiko yako,
naho nenizifanyanye zisigilizi zako.
Makawiilo mwe miko ya Zumbe
Kumbukila yadya wanigambilaga miye mndima ywako.
kwaviya kunink'ha kawiiilo.
Icho nicho kikunisangalaza mwa makunt'ho yangu,
kugamba kulagana kwako kwanink'ha ugima.
Wata wefenyi wanilongesa vihile haheina mbazi,
hamwenga na ayo hikuileka sigilizi yako.
Zumbe Mnungu, miye nazikumbukila zisigilizi zako za aho kale,
zanisangalaza.
Nna maya yatendese hawakaula waihi,
awo walekile zigilizi zako.
Sigilizi zako zinda wila wangu,
kila aho huita ho utakwiza.
Zumbe, umwo nekilo, nakumbukila dizina dyako,
aho naitimila isigilizi yako.
Uno nuwo wikazi wangu,
kuzitoza zisigilizi zako.
Kogoha sigilizi ya Mnungu
Zumbe Mnungu, weye niwe upasi wangu,
nakulagana kutimila ayo ukulonga.
Nakulombeza kwa moyo wangu wose,
unionele mbazi enga ivo ulongile.
Hifanyanya mwa sila zangu,
hihituila lugendo lwangu kwe zisigilizi zako.
Nenisunguze haheina kwikalisa,
kutimila imiko yako,
hata uneva waihi wananizinganiza kwa sigi za uihi,
miye henijale zisigilizi zako.
Nenuka kilo gati hutunye,
kwaviya sigilizi zako ni uwagilwa.
Wambuya zangu ni wadya wakukuvika,
yeyose akutimila sigilizi zako. Zumbe, lukunde lwako luimemeza si,
unihinize zisigilizi zako.
Uhuwilwa we miko ya Mnungu
Mtendele uwedi mndima ywako,
Zumbe, viligane na ivo ulagane.
Nihinize kutalaula vedi,
miye nahuwila imiko yako.
Umwo nandaga nikei kusulumizwa naganikaga,
mna haluse natimila mbuli yako.
Weye uywedi naho ayo ukudamanya nayo yedi,
nihinize zisigilizi zako.
Wakukeduvya waniziga mbuli ziihile,
mna miye natoza kwa kindedi ayo yose ukulonga,
wana mioyo ya nk'hani na uhezi,
mna miye miko yako yanelela.
Masulumizo yako ni yedi kwangu,
yanihiniza kutimila imiko yako.
Sigilizi ukulonga ni kint'hu kikulu kwangu,
zijink'ha matundu yose mwe si.
Uwagilwa we zisigilizi za Zumbe
Ni weye wanitendaga miye handa uuko, weye waniumbaga.
Nink'he ukombaganyi, nikombaganye zisigilizi zako.
Wakukuvika welelwe umwo wakaniona,
miye nahuwila mwe yadya ulagane.
We Zumbe, miye himanya zisigilizi zako ni za uwagilwa,
kunigaila masulumizo kwo uhuwilwa unanawo.
Lukunde lwako holukusila lunisngalaza,
viligane na ivo unilagane mndima ywako.
Unionele mbazi ninde mgima,
kwaviya zisigilizi zako zanelela.
Wakukefenya wagelwe soni kwa kunilongeleza haheina kindedi,
mna miye neni ifanyanye imiko yako.
Wakukogoha wahitukile kwangu,
awo wose wakukombaganya imiko yako.
Niitimile imiko yako kwa moyo wangu wose,
vileke nisekugeligwa soni.
Kulombeza kuyokolwa
Miye hifachevu hagoja uyokozi wako,
mna hiika kawiilo dyangu mwe mbuli yako.
Meso yangu yakupila hagoja yadya ulagane,
hauza, “Nounambize ini?”
Hinda enga kizembe ho mosi,
mna hijaile imiko yako.
Mndima ywako nenigojele mpaka ini?
Ni ini nouwasulumize wakunisulumiza?
Wakukekweza, hewekuunga kutimila imiko yako,
wanisimbila bome tali nihubugile uumwo.
Imiko yako yose ni kindedi naho zahuwilwa.
want'hu wanisulumiza haheina lema, nambize.
Want'hu awo wandaga hagihi na kunibanaga pele mwe si,
mna miye hilekile kutimila imiko yako.
Uniyokole kwa uwedi wako houkusila,
name nenitimile zisigilizi zako.
Sigilizi ya Mnungu ni ya kuhuwilwa
Mbuli yako weye Zumbe ni ya ulo naulo,
dyakimala ngungulu kwe mbingu.
Uhuwilwa wako wagendeela kwe vyeleko vose,
kuumba si, nayo ikei iyaho mazuwa yose.
Imiko yako igendeela mpaka dielo idi,
kwaviya vint'hu vose ni wandima wako.
Vandile miko yako hayanelele
hegu nehibanika mwa makunt'ho yangu.
Heniijale imiko yako,
kwaviya kwe miko iyo kunivuzila ugima.
Miye ni ywako, uniyokole,
kwaviya nakombeka kutimila imiko yako.
Hata waihi wakanongola,
mna miye nenizifanyanye zisigilizi zako.
Hibunk'hula kugamba hahana hekiina uheelo,
mna imiko yako haina mihaka.
Kuiunga imiko ya Zumbe
Naziungisa zisigilizi zako,
nazifanyanya msi wose.
Miko yako ihamwenga na miye lupisi lwose,
initenda mta mizungu kujink'ha wank'hondo wangu.
Miye nakombaganyisa kujink'ha wahinizi wangu,
kwaviya sigilizi zako nizo huzifanyanyisa.
Nna umanyi kujink'ha wadala,
kwaviya natimila imiko yako.
Hikeika hale na wikazi wa wiihi,
vileke nitimile imbuli yako.
Hizilekile zisigilizi zako
kwaviya weye niwe unihinize.
Yadya unigambile yana mwile kwangu,
mwile wakwe mwo mnomo wangu ujink'ha mwile wo uki.
Sigilizi zako nazikombaganya,
naivo naihiya kila lugendo lwiihile.
Ung'azi ukulawa mwe Sigilizi ya Zumbe
Mbuli yako yanizangazila mwo lugendo lwangu,
ung'azi we zisila zangu.
Hikelisa kwa kindedi,
miye nenitimile sila zako zo uwagilwa.
Zumbe, miye hionesa makunt'ho,
nivuzile ugima wangu enga ivo ulagane.
Zumbe uhokele zint'hogola hukulavila kwa kuunga mwenye,
unihinize imiko yako.
Hata uneva wikazi wangu umwe kuhoswa mazua yose,
henijale zisigilizi zako.
Want'hu waihile wanitegela mitego,
mna hilekile kutimila zisigilizi zako.
Zigilizi zako zinda ukipe wangu mazuwa yose,
izo nizo kinyemi cho moyo wangu.
Hilamula kutimila zisiglizi zako,
mpaka kwo uheelo.
Mwe sigilizi ya Mnungu wiyuko wamizi
Nawaihiya want'hu watondwe,
mna naiunga isigilizi yako.
Ni weye unyilikilo wangu na nk'hindo yangu,
kawiilo dyangu dimwe mbuli yako.
Halaweni aha hangu nyuwe mkudamanya maihi,
vileke nitimile imiko ya Mnungu ywangu.
Unilele vedi viligane ne ivo ulongile, name neninde mgima,
usekuleka kawiilo dyangu dikauswa.
Nambize miye niyokolwe,
name nenizitoze zisigilizi zako lupisi lwose.
Wawalemela wose hewekutimila zisigilizi zako,
nyambi zawe hazina dyodyose.
Waihi wa mwe si wawaduula enga nt'hagata.
Ivo elo naziungisa zisigilizi zako.
Nehingila kizingizo kwa kukwogoha weye,
nogohesa sigilizi zako.
Kutimila miko ya Zumbe Mnungu
Hidamanya chedi na cha uwagilwa,
usekunileka mwo udahi wa wank'hondo wangu.
Nilagane kunambiza miye mndima ywako,
usekuwaleka wata weduvi wanihujile.
Meso yangu yahwa kwa kukawiila wambizi wo uyokozi wako,
kuuhuwila uwagilwa wako ulagane.
Unitendele miye mndima ywako viligane ne zimbazi zako,
unihinize ne miko yako.
Unink'he kukombaganya miye mndima ywako,
vileke nimanye zisigilizi zako.
Zumbe, lupisi lwo kudamanya lubula,
kwaviya want'hu hawakutimila sigilizi zako.
Naungisa imiko yako kujink'ha zahabu,
kuijink'ha zahabu isunt'hiswe.
Naho kwaviya natimila zisigilizi zako,
naziihiya zisigiizi zose zikwazaganya.
Kuungisa kutimila sigilizi ya Mnungu
Mbuli yako yakwehela,
ivo elo miye nazitimila.
Utambalisi wa mahinizo yako wegala ung'azi,
wamwink'ha ubala mnt'hu heemanyize.
Hyasama mnomo hatwetuila,
kwaviya naungisa zisigilizi zako.
Nihitukile naho nionele mbazi,
enga ivo ukuwatendelaga wose wakukuunga.
Longoza zink'hacho zangu enga ivo ulongile,
usekuleka wavu wowose unikaile.
Nikombole kulawa mwo ukwank'walu wa want'hu waihile
vileke nidahe kutimila imiko yako.
Unikaule kwa lukunde lwako,
naho unihinize zisigilizi zako.
Mito ya masozi yaseela mwa meso yangu,
kwaviya zisigilizi zako hazikutimilwa.
Kunkint'ha kwa sigilizi ya Zumbe
Weye Zumbe umuwagilwa,
zisigilizi zako hazikwazagula.
Zisigilizi zako wiikile ni za uwagilwa,
ni za kuhuililwa kwa kindedi.
Maya yanoka enga moto,
kwaviya wank'hondo wangu wabela zimbuli zako.
Lagano dyako dikukisa,
kwa ivo mndima ywako nadiungisa.
Hamwenga na kugamba miye ni mdodo naho nabeligwa,
mna hikuleka sigilizi zako.
Uwagilwa wako ni wa mazuwa yose.
sigilizi zako ni za kindedi mazua yose.
Makunt'ho na masulumizo viniziila,
mna zisigilizi zako ni kinyemi changu.
Sigilizi zako ni mazuwa yose,
unitende nikombaganye vileke ninde mgima.
Kulombeza kukombolwa
Hikwitanga kwa moyo wangu wose,
nihitule name nenitimile imiko yako weye Zumbe Mnungu.
Nakwitanga uniyokole
miye nenitimile zisigilizi zako.
Nakelauka mwo kwinuka hulombeze wambizi,
miye nakawiila yadya ulongile.
Kilo chose nanda meso,
hafanyanya yadya ulagane.
Zumbe unive diizwi dyangu,
kwa uwagilwa wako nivuzile ugima.
Wadya wakuika mizungu ya wiihi wehagihi,
awo ni want'hu hewekutoza zisigilizi zako.
Mna weye Zumbe Mnungu wihagihi,
naho imiko yako yose ni za kuhuwilwa.
Kukongela aho kale nakehinizaga malagizo yako,
ayo uyaikile yande ya mazuwa yose.
Kulombeza wambizi
Kaula dikunt'ho dyangu uniyokole,
kwaviya hijaile sigilizi yako.
Nigombele mwe dikunt'ho dyangu unikombole,
niyokole enga ivo ulongile.
Uyokozi wihale na waihi,
kwaviya hawakutimila zisigilizi zako.
Mna Zumbe Mnungu kundilisa na mbazi,
nink'he ugima naho kwa kutimila zisigilizi zako.
Want'hu wengi wanisezenga na kunisulumiza,
mna hidunduge kutimila zisigilizi zako.
Hikwelelwa hawakaula wakutenda wiihi,
kwaviya hawakutimila imiko zako.
Miye naungisa sigilizi zako,
nivuzile ugima wangu kwa lukunde lwako holukusila.
Mbuli zako zose ni za kindedi,
no usengelo wako wa uwagilwa ni wa mazuwa yose.
Kuikwa kwe miko ya Zumbe Mnungu
Wakulu wanihujila haheina lema,
mna moyo wangu wogoha zimbuli zako du.
Naonela kinyemi mbuli yako,
enga mnt'hu atahile utahigwa mwingi.
Naihiya udant'hi wose, naho nawiihiya vitendese,
mna naungisa zisigilizi zako.
Nakutogola nk'hanana mfungate kwa zuwa,
kwaviya zisigilizi zako ni za uwagilwa.
Wana utondowazi wa kindedi wose wakuziunga sigilizi yako,
naho hakihali kint'hu kikudaha kuwakobadisa.
Weye Zumbe Mnungu, naugojela uyokozi wako,
naho nadamanya viligane ne zisigilizi zako.
Natimila malagizo yako,
nayaungisa kwa moyo wangu wose.
Natimila malagizo yako ne zisigilizi zako,
kwaviya sila zangu zose kuzimanya.
Kulombeza wambizi.
Ndilo yangu ya kulombeza wambizi ikubwiile weye Zumbe,
nink'he kukombaganya viligane ne mbuli yako.
Kulombeza kwangu ukutegeleze,
uniyokole viligane ne mbuli yako.
Nohutunye mazuwa yose,
kwaviya wanihiniza zisigilizi zako,
nenikeme zisigilizi zako,
kwaviya miko yako ni za uwagilwa.
Keike lumwe unambize,
kwaviya hisagula imiko yako.
Miye nna nk'hwina na uyokozi wako weye Zumbe Mnungu,
zisigilizi zako zanink'ha kinyemi.
Nink'he ugima hutunye,
zisigilizi zako zinambize.
Nangadika enga ngoto yagile,
so unizungule mndima ywako,
kwaviya hijaile zisigilizi zako.
Nguu Bible Version. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.