Ngelo 24

Ulosi wa mlongo na kenda

1Usekuwaonela wivu want'hu waihile, naho usekuungisa kunda hamwenga nawo, 2kwaviya mioyo yawe yafanyanya mbuli zo lubezo, na milomo yawe yalonga mbuli ziihile.

Ulosi wa milongo miidi

3Nyumba yazengwa kwa mzungu, naho kwa sila yo umanyi yatoga. 4Kwa sila yo umanyi vyumba vakwe vamemezwa, vint'hu va yombe na va kuwagila.

Ulosi wa milongo miidi na imwenga

5Mnt'hu mta mzungu ana udahi mkulu, mnt'hu mta umanyi naye ana ludole; 6Kwaviya kutowana nk'hondo kwaunga ulongozi, na kwa walangilizi wengi uhumi wapatikana.

Ulosi wa milongo miidi na mbili

7Kwa mhezi, mzungu ni mdala kuumanya, mwo mdugano hana dyodyose dyo kulonga.

Ulosi wa milongo miidi na nt'hatu

8Mnt'hu akufanyanya kudamanya yaihile, naamanyike enga mnt'hu wa nyambi. 9Fanyanyi za mhezi ni wavu, mta lubezo aihizwa na kila mnt'hu.

Ulosi wa milongo miidi na kane

10Unafachevu mwo lupisi lwa makunt'ho, weye kuswesa ludole.

Ulosi wa milongo miidi na shano

11Myokole mnt'hu akukomigwa heebanange kint'hu, kombeka kumyokola akukomwa. 12Wadaha kugamba weye huyamanyize, mna Mnungu kamanya naho asengela lugendo lwako. Naho yehe akukaulisa, naho kamanya, ivo naakulihe viligane na ivo ukudamanya.

Ulosi wa milongo miidi na mtandatu

13Mwanangu udye uki kwaviya ni wedi, naho kivuna kina mwiile mwo mnomo, 14ivi nivo wili mzungu unamwiile mwo moyo wako, uneva kuupata nounde na kawiilo mwa mazuwa yakwiza, naho kawiilo dyako hedinde enga ivo wili.

Ulosi wa milongo miidi na mfungate

15Usekunyatila enga mwavu akukump'hukila hant'hu ha mnt'hu ywedi, naho usekugeza kuibananga nyumba yakwe, 16kwaviya mnt'hu muwagilwa agwa nk'hanana nyingi na kwinuka mna mnt'hu mwavu abanangwa na yaihile.

Ulosi wa milongo miidi na mnane

17Usekwanga kugwa kwa mnk'hondo ywako, naho usekunda ne kinyemi mwo moyo wako umwo anagwa, 18kwaviya Zumbe Mnungu anayaona ayo helelwe, adaha kuleka kumsulumiza.

Ulosi wa milongo miidi na kenda

19Usekuihiya kwajili ya want'hu waihile, naho usekuwaonela wivu waihi, 20kwaviya mnt'hu mwihi haapate kawiilo mwa mazuwa yakwiza, naho lumuli lwo ugima wakwe noluhauswe.

Ulosi wa milongo mitatu

21Mwanangu mvike Zumbe Mnungu na komwogoha seuta, naho usekunda na uhamwenga na want'hu wasaguke, 22kwaviya ubanangi wawe nouwalawile kipump'ha, naho ni ani akumanya maihi yakudaha kuhoswa ni seuta?

Milosi mit'huhu ya wata mizungu

23Iviya iviya ikutimila ni milosi ya wata mizungu,

kwazagula kwa want'hu mwo usengeelo hiyo vedi. 24Yeyose akumgamba mta masa, hana masa, want'hu nawamligite naho si neimwiihiye. 25Mna wakuwasengela waihi nawapate kinyemi, naho uvikilwa nouwazile.

26Uhituzi wa uwagilwa, ni kilagiso cha lukunde lwa kindedi.

27Bindiliza ndima zako za kuse, ziike lumwe nk'honde zako akajika izenge nyumba yako.

28Usekulava uwona wo udant'hi kwa miyao hegu kulonga lulimi mwa yehe. 29Usekulonga, “Nenimtendele enga ivo anitendele miye! Nenimlihe mnt'hu yudya kwa kiya anitendele!”

30Nombokaga hagihi ne nk'honde ya msokezi, hagihi ne nk'honde ya mizabibu ya mnt'hu mhezi. 31Nelelagwa kuona miwa mingi, mani yagubikaga hant'hu aho hose, na lukandula lwakwe lwa maiwe lwamokaga. 32Nakaulaga niyo nafanyanya yadya yalaile, name niyo napata kukehiniza kwa yadya niyaone. 33Ukagamba ugone ludodo, na kukupila ludodo, na kuhumula, 34umanyage kugamba unatenda ivo, ukiwa noukwizile enga mbavi, noukukump'hukile enga mhoki mta vitowanilo.