Miwera
LUTA 1
Ndjokwa ta ibota di Elimɛlɛkɛ
Ta ehole edaaka ba djudji badaledja Isalɛlɛ, ndja eso ekwa ta ekomi. Iboa moomi omɔti o Bɛtɛlɛmɛ e Yudha akɛɛ na mwali o nde ko na bana ba nde baami babae; adaa moo ehole mokɛkɛ ta ekomi e Moabi1. Kombe e moomi omina Elimɛlɛkɛ, mwali o nde Naomi ko bana ba nde baami: Mahalɔni na Kiliɔni; badaaka bato ba ibota di Epalata2 iho ta Bɛtɛlɛmɛ e Yudha. Ta ehole edaaka ibo ta ekomi e Moabi, Elimɛlɛkɛ agwa ko Naomi adika iyo mɛnɛ na bana ba nde baami babae. Bana ibia baasɔ bali ba ekomi e Moabi; omɔti kombe e nde Olɔpa, okina Luta. Bayeyoa iho bokimana bianga doomi, Mahalɔni na Kiliɔni baso bagwa pongono. Naomi adika iyo mɛnɛ pɛpɛ mwana ko pɛpɛ moomi.
Luta ayani na Naomi ta Bɛtɛlɛmɛ
Iboa Naomi aoka bo Ta ekomi e Moabi Kumu akɔmedji bato ba nde ko abapa leka loboyaka. Asɛlingoa adonge ta ekomi iyena engbanga emɔti na bakio ba nde babae. Akina esika ehelamaka iyo akɛɛ engbanga na bakio bande babae bɛngi bayane ta ekomi e Yudha, endelo na ndjea, iboa Naomi abatɔndea bo: «Moto na moto ayane ta dii nange ende. Kina bo Kumu aokɔmeeni bopele mondumba mokɔmea ino mbi mɛnɛ kona ibia bagwa! Kina bo Kumu akamoe engi moto abolodje moki ko aokɔmeeni bopele ta ndako dji bono!» Ngɔngɔ djimina abadinga ekɔpi bɛngi babɔtɔe, endelo ibo baso bayea bobuke mɛnɛ ko babala na nde bo: «Ngasa! Lokɛkɛdea na wɛ engbanga emɔti tee mbunoko ta dii bato ba wɛ!» Naomi abasɔmbedja bo: «Yanani ta dii ino, bana ba mbi ba bali. Tina ekimanakadeani na nu nda? Nabwaniti bobota naikina bana baami bɛngi baosɔeni3. Yanani bana ba mba. Mbi naimei mosuku nabwaniti bokɛɛ naikina ta moki. Ko nakaisa molema bo nabwani nakɛe moki: “Oko ta bulu bo busa ibubu nadiadea moomi ko nabotadea bana baami”, Otukeadeani tee bakandoe? Olonadeani boasɔnɔ na baami bakina? Ngasa, bana ba mbi bali! Nadii na ndjokwa enɛnɛ bonɔ e bino, modjɔ mo ebɔ e Kumu eokedjini saya mɛnɛ.»
Bakio babae baso bayea naikina bobuke mɛnɛ. Ngɔngɔ djimina Olɔpa adinga bokio bo nde ekɔpi aso amoisea ndese e suka, endelo Luta alona bobɔtɔ na Naomi. Iboa Naomi abala na Luta bo: «Indja mbanda4 e wɛ ayani ta dii bato bande ko ta dii ba ndjakomba ba nde, wɛ pongono yana oko mondumba mosayana iyo.»
Luta asɔmbedja bo: «Kina bolindoanani nayane ko kina bosiani nakaokimana. Esika esusu ekɛedea wɛ, mbi nakɛɛdea; esika edaadea wɛ, mbi nadadea ena. Bato ba wɛ badaadea bato ba mbi; Ndjaokomba o wɛ adadea Ndjakomba o mbi. Esika egwadea wɛ mbi nagwadea ko napuseamadea oko ena. Kina bo Kumu apɛni etumbu enɔi na bobuke emiti daa oko yogo elobɔtodje!» Ehole eɛnɛ Naomi bo Luta akpekpea bo akɛe na nde engbanga emɔti, akina bomolindoana ko bakɛɛ engbanga emɔti mbunoko ta Bɛtɛlɛmɛ. Boimea bo bobo ngando enɛnɛ esusu eso ekumana. Bali baso bawadjaka bo: «Iyoo edii oko Naomi?» Naomi abasɔmbedja bo: « Pɛpɛ bobeanini Naomi, “Mwali o mongandi”, endelo beanini Mala “Mwali o ndjokwa”, modjɔ mo Kumu Onɔi Ngulu aokedjini ndjokwa enɛnɛ. Nakinaka iya moto mokokake ko Kumu ahuledjini mɔmɔ ngasa. Pɛpɛ bobeanini Naomi elɔkɔe bo Kumu ahombani diko di mbi ko Kumu onɔi ngulu aɛnɛdjini ndjokwa enɛnɛ.» Iyena edii mondumba mohula Naomi ta Moabi na bokiyo bo nde Luta, moto o Moabi. Baimea ta Bɛtɛlɛmɛ ta ehole ebukaka bo mbuma dji olɔdje5.
Source notes (5)
- Footnote Ta ehole edaledjaka ba djudji Isalɛlɛ: epalakadea bobala mbuti na yanga 1100 boso bo Yesu Kilito, boindja ta buku e ba Djudji. Moabi: esika ebatatake e kona ekadae ta dɔngɔ dikaimane modakabusa e dua e Monana.
- Footnote Efalata: edii mosa momɔti mo ngando modaka ta Yudha ta tei e Bɛtɛlɛmɛ, ngando ekadae ta ndambo e bakolomɛtɛlɛ ta dɔngɔ di sadiko di Yelusalɛmɛ.
- Footnote Ehole egwi moto pɛpɛ mwana, mwa nango o moomi kaoko moto edii na nde bwela bo itina, atungi boasɔ mwali o bogwa bɛngi abanee ibota di mowei. Iyena edii kokɔkɔ bokabee ibo «levila», boindja Dit 25, 5-10; Mba 38, 6-8; Mat 22, 24.
- Footnote Mbanda etingodji iya bo: Olɔpa na Luta baidaka na moomi omɔti basɔnɔkɔ na bana baami ba Naomi babae.
- Footnote Batswaka ɔlɔdje ta songe o banei na o batano.
Miwera. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.