Skip to content
BibleKenya

Miwera

MATAYO 4

Yesu amekami

(Boindja pongono a Mal 1, 12-13; Luk 4, 1-13)

Iboa Yesu atombama na Mwembo ta etengelenge, bɛngi amekame na djabulu. Ngɔngɔ dji bokɔ mongilo mo masu tuku inɛi na bulu ko tuku inɛi na moi, aso aoka ndja. Momeki adua adii yo ko aso abala bo: «Okadaa Mwana o Ndjakomba, pa mitindo bɛngi mabanga imimi maimee mwɛmbɛ.» Yesu asɔmbedji bo: «Ekomama bo: “Moto abwaniti bohela oto na mwɛmbɛ, endelo na mobalo mosusu mokaimane ta monɔkɔ mo Ndjakomba1.”»

Iboa djabulu amotomba mbunoko ta ngando e nɛnɛ esɛnɔke, amobakea ta sɔngɔ e tepelo ko aso abala na nde bo: «Okadaa Mwana o Ndjakomba, sadumba nase; modjɔ mo ekomama bo:

“Apadea babwɛndi ba nde mitindo tina e wɛ

ko baotombadea ta mɔmɔ ma bobo

ta botiedja bo eko ewɛ esakalana na ibanga2.”»

Yesu amosɔmbedja bo: «Ekomama pongono bo: “Obwaniti bomeka Kumu Ndjakomba o wɛ3.” »

Djabulu amotomba naikina ta diko di ngomba enɔkɔ boyai, amoinedja bokondji bosusu bo ngondo ko na bikumu bi dju, ko abala na nde bo: «Naopadea leka ilulu losusu okakwa magbunda ta mako ma mbi bɛngi okumeeni.» Iboa Yesu amosɔmbedja bo: «Satana donga ena! Modjɔ mo ekomama bo: “Obwani bokwa magbunda oko ta boso bo Kumu Ndjakomba o wɛ ko boangɔnɔ oko iyo mɛnɛ4.” » Iboa djabulu amokina ko babwɛndi baso badua ko bamokɔmedjaka.

Yesu abangi mosala mo nde ta Galileya

(Boindja pongono a Mal 1, 14-15; Luk 4, 14-15)

Ta ehole eoka Yesu bo baisi Yoane ta bɔlɔkɔ5, akɛɛ ta Galileya. Akina Nadjalɛtɛ ko aso akɛɛ adaa ta Kapalanaume edii ta mokula mo ibeke di Galileya, ta ekenge e mokili mo Djabuloni ko Nepitali6. Ekɔmɔ iboa bɛngi ekokedjame mondumba mobala motɛli Isaya bo:

«Ekenge e mokili mo Djabuloni, ko na ekenge e mokili mo Nepitali,

ta pamba e ibeke, dɔɔngɔ di kina di Yɔlɔdane,

Galileya ta polo ekadikame bato ibia badii pɛpɛ bodaa Bayudha!

Bato ibia bakadae ta tei e modidi

baɛni bohu bonɛnɛ!

Ko ibia bakahelame ta tei e modidi mo ekomi e bato bago,

bohu bo baimanei7!»

Oko ta ehole emina, Yesu abanga botɔndea bo: «Sɔmbɔtɔnɔni midaa8 mi bino, modjɔ mo Bokumu bo busa bodii mbuti!»

Yesu abei batingami ba boso

(Boindja pongono a Mal 1, 16-20; Luk 5, 1-11)

Yesu adalaka ta mokula mo ibeke di Galileya, aɛnɛ menga babae, Simona iyona akabeebo Petelo, ko mwana o nango Andele; badaaka baoweli baswi ko badumbaka modjanga ta ibeke. Yesu aso abala na bu bo: «Tingamani ngɔngɔ dji mbi ko naoimedjadeani bahombeli ba bato.» Na mbala emɔti, bakina midjanga mi bobo ko baso bakimana Yesu. Asama bo dala naikina moo bohali ko Yesu aɛnɛ baami bakina babae, Djake mwana o Djebede, na Yoane mwana o nango badaaka na sangwabu ta bwato babɔngedjaka midjanga mi bobo. Yesu aso ababea; Na mbala emɔti, bakina bwato bo bobo ko na sangwabu bakimana Yesu.

Yesu alehi ko aheledji

Yesu akweanaka ta Galileya mosusu, alehaka ta ndako dji miɔngɔnɔ dji Bayudha, atɔndɔkɔ Bwɛndi Bopele bo Bokumu ko aheledjaka bato na bego dji bobo djisusu ko na biɛmɛ dji bobo djisusu. Gala e nde enangana ta ekomi e Silia mosusu, ko bamolwɛkɛ bato ba bego tungu na tungu na bato ba minɔngɔ: bato ba membo mibe, bato ba mako makatatake; ko na bato ba bego dji kpukpukpu9 basusu Yesu abaheledja. Emumu e bato banɛnɛ bamokimana, bodonga ta Galileya, ta Dekapole, ta Yelusalɛmɛ, ta Yudhea ko ekenge e mokili edii ta dɔɔngɔ di kina di Yɔlɔdane.

Source notes (9)
  1. Footnote Dit 8, 3.
  2. Footnote Ndj 91, 11-12.
  3. Footnote Dit 6, 16.
  4. Footnote Dit 6, 13.
  5. Footnote Yoane aisama ta bɔlɔkɔ: edii wɛtoko Yoane Mobatisi. Boindja ta 14, 3.
  6. Footnote Djabuloni ko Nepitali: mabota ma boso mabae ma Isalɛlɛ.
  7. Footnote Isa 8, 23–9, 1.
  8. Footnote Sɔmbɔtɔnɔni midaa: ta mobala mokina sɔmbɔtɔnɔni malɛi kaoko sɔmbɔtɔnɔni milema.
  9. Footnote epeko e kpukpukpu: moto okapeke na yogo e misisa mi molo mikasatubane ko na isiesie (Boindja Mat 4, 24 ko na nase).

Miwera. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.