Skip to content
BibleKenya

Miwera

MATAYO 27

Bakɛi na Yesu ta dii Pilato

(Boindja pongono a Mal 15, 1; Luk 23, 1-2; Yoa 18, 28-32)

Amaya busa, banganga ba Ndjakomba banɛnɛnɛnɛ basusu ko na basuku ba Bayudha bakɔɔ inginda di bodia meko bɛngi bahombe mondumba moboowa Yesu. Ta tina emina bamonanga mbɔti, bakɛɛ na nde ko bamokaba ta mabɔ ma gupɛlɛnɛlɛ Pilato.

Yudhasi asakomi

(Boindja pongono a Bik 1, 18-19)

Yudhasi, iyona okaba Yesu, ehole eɛnɛ iyo bo batitedji Yesu na ikambo, aoka saya ta molema ko akɛɛ asɔmbedja pata tuku isato dji palanga ta dii banganga ba Ndjakomba banɛnɛnɛnɛ ko na basuku. Abala na bu bo: «Nakɔi pekato ta tina e bokaba makiya madii pɛpɛ boda na modjɔ!» Endelo Bamosɔmbedja bo: «Eindjaka so na ye! Eindji wɛ mɛnɛ!» Yudhasi adumba pata dji palanga ta tepelo ko asasuwa; ngɔngɔ djimina akɛe asakoma. Banganga ba Ndjakomba banɛnɛnɛnɛ baandoa pata dji palanga ko babala bo: «Mobeko motalopakadea ndjea e boisa palanga idjidji ta esika ekadedje ibo palanga dji tepelo, modjɔ mo edii palanga dji makiya.» Ngɔngɔ dji bookana, badia meko bo, basombe gbie e mokɔmeli o poke na palanga djimina, bɛngi bapusiake bakɛndɛli. Ta tina emina gbie emina ekabeame «gbie e makiya» mbunoko busɛbu. Iboa mondumba mobalama na motɛli Yilimia ekokedjama bo: «Batomba pata dji palanga tuku isato, oko motswiya motombamaka meko na bana ba Isalɛlɛ ko bamopa ta tina e gbie e mokɔmeli o poke, oko mondumba mopani Kumu mitindo1.»

Pilato awadji Yesu

(Boindja pongono a Mal 15, 2-5; Luk 23, 3-5; Yoa 18, 33-38)

Yesu asamba ta boso bo gupɛlɛnɛlɛ; ko gupɛlɛnɛlɛ amowadja bo: «Wɛ odii mokondji o Bayudha?» Yesu amosɔmbedja bo: «Edii wɛ moto osabala.» Endelo aisɔmbedja nongo eka emɔti ta pundi dji banganga ba Ndjakomba banɛnɛnɛnɛ ko na basuku ba Bayudha. Iboa Pilato amowadja bo: «Otaokakadea midjɔ misusu imimi miopundakadea na bu?» Endelo aimosɔmbedja nongo ta iwadja imɔti, ta mondumba mo bo gupɛlɛnɛlɛ akamoa bobuke.

Yesu bamotitedji na ikambo di bogwa

(Boindja pongono a Mal 15, 6-15; Luk 23, 13-25; Yoa 18, 39-19, 16)

Engi tɛkɛ e Pasika, gupɛlɛnɛlɛ adaaka na momɛsɛno mo botingoa mo bɔlɔkɔ omɔti o hɔmɔkɔ na emumu e bato. Enakoboa, badaaka na mo bɔlɔkɔ omɔti odjebamaka bobuke na kombe e Yesu Balabasi. Ehole eputoanaka emumu e bato, Pilato aso abawadja bo: «Moto opalakadea ino naotingoeni nda: Yesu Balabasi isa Yesu okabeebo Kilito?» Modjɔ mo adjebaka bo badaaka na ikuwa ta tina emina bakabaka Yesu ta mabɔ ma nde. Ta ehole edaaka Pilato adii ta kiti ekataka iyo makambo, mwali o nde amolomea bwɛndi bo: «Pɛpɛ bosaisa ta modjɔ mo moto iyona o bodju, modjɔ mo busɛbu nanɔngi bobuke na ndjɔti ta tina e nde.» Banganga ba Ndjakomba banɛnɛnɛnɛ ko na basuku ba Bayudha bapangoaka bimumu bi bato bo, bawadja batingoe Balabasi ko baowodje Yesu. Gupɛlɛnɛlɛ asɔmbɔ bobala ko abawadja bo: «Moto opalakadea ino ta tei e bobo babae naotingoeni nda?» Bamosɔmbedja bo: «Balabasi!» Pilato abasɔmbedja bo: «Ekɔkɔ mbi na Yesu, iyo okabeebo Kilito nde?» Ibo basusu basɔmbedja bo: «Abakame ta ekulusu!» Abawadja bo: «Bobe bokɔi iyo nda?» Endelo bagamaka naikina na ngulu bo: «Abakame ta ekulusu!» Ehole eɛnɛ Pilato bo, eidaaka naikina na tina, endelo mongangale mongalaka oko bongala, atomba madiba, asosa mɔmɔ ta boso bo emumu2 ko abala bo: «Makiya ma moto iyoyo matabakamadea ta molo mo mbi! Endelo makiya ma moto iyoyo mabakamadea ta melo mi bino!» Emumu e bato basusu basɔmbedja bo: «Kina bo makiya ma nde mabakame ta melo mi biso ko na baana ba biso!» Iboa Pilato abatingoa Balabasi; ko ngɔngɔ dji bobomedja Yesu ndii, abapa bɛngi abakame ta ekulusu.

Basodha Batai Yesu

(Boindja pongono a Mal 15, 16-20; Yoa 19, 2-3)

Ngɔngɔ djimina, basodha ba gupɛlɛnɛlɛ baloka Yesu bɛngi bakɛe ta esika e sambi, ko baputoanedja engbanga esusu e basodha baso bamohika. Bamoiwa bisendja ko bamolwadja mokoto mokpetu3. Bayoa egbala emɔti e ndjubɛ bamobakea ta molo mo nde, ko bamoisa mososongo momɔti ta ebɔ e baami. Ko bakwa magbunda boso bo nde bɛngi bamotae, na babala bo: «Mokondji o Bayudha, bosako!» Ko bamotsweya masɔi, batomba mososongo ko bamoboma ta molo. Ngɔngɔ dji bomotaa, bamoiwa mokoto, bamolwadji bisendja bi nde ko bamoloka bɛngi bakɛɛ amobaka ta ekulusu.

Yesu abakami ta ekulusu

(Boindja pongono a Mal 15, 21-32; Luk 23, 26-43; Yoa 19, 17-27)

Iyana aimanaka ibo, batanea moto o Silɛne okabeebo na kombe e Simona, ko bamopea na ngulu bɛngi atombe ekulusu e Yesu. Asama bo imea ta esika ekabeebo Gologota, etingodjakadea bo «Esika e Engɔngɔlɔ e molo». Iho, bapa Yesu vino eputoanedja bo na bole bo boyo4 bɛngi amwake, endelo ehole emeka iyo, alona bomwaka. Ngɔngɔ dji bomobaka ta ekulusu, bakabana bisendja bi nde na bodjiboma djeke5. Ngɔngɔ djimina, badaa ena ta tina e bomosɛndjɛlɛ. Ta diko di molo mo nde, bakoma ta ibaya makomi ma botingodja tina e modjɔ mo motitedja na bu ta bogwa bo: «Moto iyoyo edii Yesu, mokondji o Bayudha.» Bapundji babae pongono babakama ta ekulusu engbanga na Yesu, omɔti ta ebɔ e nde e baami, okina ta ebɔ e nde e bali6.

Bato banɔkɔ na ndjea badaaka bamosinga na bogbɔkɛ molo7; babalaka bo: «Okadaa Mwana o Ndjakomba, tita ta ekulusu wɛ moto obukaka tepelo ko oetonge na masu masato8, ko saheledja wɛ mɛnɛ!» Banganga ba Ndjakomba banɛnɛnɛnɛ na balehi ba mobeko ko na basuku ba Bayudha bamotaka pongono ko babalaka bo: «Aheledja bato bakina, endelo abwaniti bosaheledja iyo mɛnɛ! Akadaa mokondji o Isalɛlɛ, atite ta ekulusu edɛdiyeye bɛngi lomodhimee! Akasapɛ na Ndjakomba modjɔ mo atɔndɔ bo: “Nadii Mwana o Ndjakomba.” Naboa, ekadaa bo Ndjakomba omina akamopale, amotingoe ke edɛdiyeye9!» Bapundji babakama na nde ta ekulusu bamosingaka oko mondumba momɔti.

Bogwa bo Yesu

(Boindja pongono a Mal 15, 33-41; Luk 23, 44-49; Yoa 19, 28-30)

Banga ta ngonga e midi mbunoko ta ngonga e basato e ngɔngɔ dji midi modidi mokwa ta ngondo esusu. Ko mbunoko ta ngonga e basato ta ngɔngɔ midi, Yesu agama na moholi mopipo bo: «Eli, Eli, lema sabakatani?» Etingodjakadea bo «Ndjakomba o mba, Ndjakomba o mba tina ndani osundolini?10» Ndambo e bato badaaka iyana baoka babala bo: «Abeakadea Eliya!» Mbala emɔti omɔti o bobo apota akɛɛ atomba imbusu, adidindedja ta vino e ngai; ahangea imbusu imina ta sɔngɔ e mososongo bɛngi apɛ Yesu amwake11. Endelo bakina babala bo: «Kina, loindje Eliya akadoadea amoheledja!»

Yesu agama naikina na moholi mopipo ko asɔmbedja mwembo mo nde. Iboa esendja enɛnɛ edaaka ta ndanda e Esika Esɛnɔke ko ta Esika enɔi Esɛnɔke e tepelo12 ealeya bipasa bibae banga o diko mbunoko o nase. Kpɔtɔ djikumana, mabanga manɛnɛnɛ mabatoana, makila madipoama ko mikuku mi badhimi banɛnɛ bagwa basisoa ta bogwa. Baimana ta makila ngɔngɔ dji bosisoa bo Yesu ta bogwa, bakwea ta ngando enɛnɛ esɛnɔke ko basainedja na bato banɛnɛ. Iyana amabo ɛnɛ mokumano mo kpɔtɔ ko na midjɔ mikɔmɔ, kapita o basodha mokama ko na ibia badaaka na nde ta tina e bosɛndjɛlɛ Yesu baluma na bɔɔ bonɛnɛ ko babala bo: «Sooti mɛnɛ, Iyoyo adaaka Mwana o Ndjakomba!» Iyana, edaaka na bali banɛnɛ baindjaka na bohali: bakimanaka Yesu bodonga ta Galileya bɛngi bamokɔmedje. Ta engbanga e bobo edaaka na Malia o ngando e Magadala, Malia, nange e Djake ko na Yosepu, ko na nange o baana baami ba Djebede.

Basambei Yesu ta ikila

(Boindja pongono a Mal 15, 42-47; Luk 23, 50-56; Yoa 19, 38-42)

Moomi omɔti o modieli o kombe e Yosepu, moto o Alimatayo, adoa mɔkɔmɔkɔ. Adaaka pongono motingami o Yesu. Ko Yesepu akɛɛ ta dii Pilato amowadja mokuku mo Yesu. Iboa Pilato apa mitindo bamopɛ ta dii iyo. Yosepu atomba mokuku, ko amohua na molangiti moyeene ko amosambea ta ikila di yeene dilongedja iyo ta tina e nde ta ibanga dinɛnɛ. Ngɔngɔ djimina, ahilingodja ibanga dikina dinɛnɛ bɛngi adipe ta monɔkɔ mo ikila ko ayana. Enakoboa, Malia o ngando e Magadala ko na Malia okina badaaka badii na mobondo ta dɔɔngɔ dikina diyɛlɛmɛni na ikila.

Bosɛndjɛlɛ bo ikila

Puma sɛɛnɛ, etingodjakadea bo, ngɔngɔ dji isu di Mosɛlingo13 mo sabata, banganga ba Ndjakomba banɛnɛnɛnɛ ko na Bapalisai bakɛɛ engbanga atanea Pilato ko babala na nde bo: «Mokumi, iso lolɛdjɛkɛdea bo mokosi iyo ehole edaaka iyo na bomɔ abala bo: “Ta disu di basato, nasisoabi ta bogwa14.” Ta tina emina, pa mitindo baise basindjili ta ikila mbunoko ta isu di basato, bɛngi bo batingami ba nde basaka doa aiba mokuku ko babale na bato bo: “Asisoi ta bogwa.” Bokuta bomina bosaka doa abakana naikina bonɔ bokuta bo boso.» Pilato abasɔmbedja bo: «Indjani basindjili. Kɛɛni ko basɛndjɛledjani ikila na mondumba mo palakadea ino.» Bakɛɛ ko baɛngɛbɛnɛ mondumba mo bosɛndjɛlɛ ikila: babaisa ta ibanga di gbakasana na bu ikila bɛngi basɛndjɛlɛke.

Source notes (14)
  1. Footnote Bolangama boputoanake bo Djk 11, 12-13 na midjɔ midonga ta dii Yel 18, 2-3; 19, 1-2; 32, 6-15.
  2. Footnote Boɛngɛ Dit 21, 6-8.
  3. Footnote mokoto mokpetu: ta monɔkɔ mo Bagɛlɛki, kombe iyeye etingodjakadea bo mokoto molwaka basodha ba Loma.
  4. Footnote Boindja Ndj 69, 22.
  5. Footnote Boindja Ndj 22, 19.
  6. Footnote Boɛngɛ Isa 53, 12.
  7. Footnote Boindja 26, 61; Yoane 2, 19.
  8. Footnote Boindja 26, 61; Yoane 2, 19.
  9. Footnote Boindja Ndj 22, 9.
  10. Footnote Ndj 22, 2.
  11. Footnote Boɛngɛ Ndj 69, 22.
  12. Footnote Boindja Boi 26, 31-33.
  13. Footnote kombe iyena inedjaka isu di batano, di sɛlingoaka Bayudha tɛkɛ e sabata (Boɛngɛ Mal 15, 42; Luk 23, 54; Yoa 19, 31,42).
  14. Footnote Boindja 16, 21; 17, 23; 20, 19.

Miwera. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.