Miwera
MATAYO 17
Bosɔmbɔtɔnɔ bo mokuku mo Yesu
(Boindja pongono a Mal 9, 2-13; Luk 9, 28-36)
Ngɔngɔ dji masu masamano, Yesu atomba Petelo, Djake, ko na Yoane mwanango, ko akɛɛ asabudjea na bu ta ngomba emɔti e diko. Aso asɔmbɔtɔnɔ ta boso bo bobo; mbanda e nde engɛsɛkɛ ondingo modakabusa ko bisendja bi nde bimea bipu ipɛɛ ondingo bohu1. Nambala emɔti Mose na Eliya babaimanea, ko basolanaka na Yesu. Iboa Petelo abala na Yesu bo: «Kumu, edii bopele lodikame iyaya. Okapala, napike bikpangba bisato, emɔti tina e wɛ, ekina tina Mose, ko ekina tina e Eliya.» Oko ta ehole edaaka iyo abala itute dimɔti di bohu di bakunda, ko ta itute dimina moholi momɔti mobalaka bo: «Iyoyo adii Mwana o mbi o epaeli nakasepe na nde bobuke mɛnɛ. Mookeani2!» Amabo oka moholi momina, batingami bakwa na maso ta kpɔtɔ baso baluma na bɔɔ. Endelo Yesu asalinda mbuti na bu ababɛndjɛ na ebɔ ko abala na bu bo: «Angɔni pɛpɛ bobangani.» Bangɔdjɔ miso ko baiɛnɛ moto okina oto Yesu iyo mɛnɛ. Naboa adaaka bo bakɛkɛ atite ta ngomba, Yesu abapa mitindo imimi bo: «Pɛpɛ botɔndeani moto omɔti ta tina e ndjɛnɛ iyeye mbunoko Mwana o moto akasisoa ta bogwa.»
Iboa batingami bawadja Yesu bo: «Tina ndani balehi ba mobeko bakabale bo etungi boso mɛnɛ Eliya adoe3?» Abasɔmbedja bo: «Edii oko boa etungi Eliya adoe bɛngi aise midjɔ misusu ta mwɛngi. Endelo naotɔndeakadeani bo: Eliya asia bodoa ehele, baimodjeba ko bakɔɔ na nde eka epalaka ibo. Oko mondumba momina momɔti monɔngedjadea ibo Mwana o moto.» Iboa batingami basipoa bo ababaleaka ta tina e Yoane Mobatisi.
Yesu aheledji mwana o yogo e isiesie
(Boindja pongono a Mal 9, 14-29; Luk 9, 37)
Ta ndelo eimea ibo mbuti na emumu, moto omɔti akɛɛ akwa magbunda ta boso bo Yesu ko abala bo: «Kumu, okea mwana o mbi o moomi ndjokwa. Adii na yogo e kpukpukpu4 ko apekakadea bobuke, akakwɛe engi mbala ta mosa ko engi mbala ta madiba. Namolwɛkɛ batingami ba wɛ endelo baihɔnɔ bomoheledja.» Yesu atomba kɔpi ko abala bo: «Mbota ebe ko etaka edhimeli! Nadikamadea na nu mbunoko ndelo nda? Naoikeabini molema mbunoko ndelo nda? Molwɛnini iyaya.» Yesu agamea mwembo mobe; ko moimana ta dii mwana moomi omina ko ahela oko ta ehole emina iyena. Iboa batingami bakɛɛ awadja Yesu na mbombi bo: «Tina ndani iso lobwaniti bobengana mwembo momina iso bɛɛnɛ?» Yesu abasɔmbedja bo: «Tina e bo odiini na edhimeli ekɛkɛ. Modjɔ mo, naotɔndeakadeani sooti mɛnɛ bo: okadani na edhimeli enɛnɛ ondingo mombuma mo mutalade5, obwanini bobala na ngomba iyeye: “Donga iyaya kɛɛ ibobo”, ko ebwani bodonga. Pɛpɛ nongo eka emɔti ebwani boleloa na nu. [ Endelo mondumba mo membo mibe imimi mikaimane oko na yuunga ko na mongilo6.]»
Yesu atɔndi naikina bogwa ko na bosisoa bo nde ta yogo
(Boindja pongono a Mal 9, 30-32; Luk 9, 43b-45)
Ta Galileya busa bomɔti baputoanaka iboa, Yesu abala na bu bo: «Mwana o moto akabamadea ta mabɔ ma bato, bamowadea; endelo ta disu di basato asisoadea ta bogwa.» Iboa batingami baoka ndjokwa enɛnɛ.
Yesu na Petelo baputi puti e tepelo
Ta ndelo eimea Yesu na batingami ba nde ta Kapalanaume bato ibia batombaka pata dji palanga dji puti e tepelo basalinda mbuti Petelo ko bamowadja bo: «Molehi o bino tapute puti dji tepelo7?» Petelo asɔmbedja bo: «Oko iboa, akapute.» Ta ndelo ekwea Petelo ta ndako, Yesu atomba kɔpi boso bo nde ko awadja bo: «Simona, elɛdjɛkɛdea wɛ nde? Bato batungi boputa puti ko kitasi ta dii bakondji ba ngondo ba nda? Bato ba ekomi e bobo kaoko bakɛndɛli?» Petelo asɔmbedja bo: «Bakɛndɛli.» Naboa, Yesu abala na nde bo: «Ekada iboa, bato ba ekomi babwaniti boputa. Endelo lomiti pala boisa mongangale ta malɛi ma bobo. Kɛɛ ta ibeke maa ilɔpi otubadea moswi o boso ko dipoa monɔkɔ mo nde: otaneadea pata dji palanga dji puti e tepelo otei ebwani na boputa puti e mbi ko na e wɛ; etomba ko puta puti dji biso.»
Source notes (7)
- Footnote Boɛngɛ 2Pi 1, 16-18.
- Footnote Boindja 3, 17 ko na nase.
- Footnote Boɛngɛ Mal 3, 23.
- Footnote kpukpukpu: epeko iyeye bakaebee pongono isiesie (Boindja 42, 4 ko na nase).
- Footnote Bonɛnɛ ondingo mbuma e mutalade: mbuma e mutalade edaaka eatombama ondingo mbuma enɔi na bokɛkɛ. Boindja 13, 32.
- Footnote Molɔngɔ imumu modiiti ta makomi manɛnɛ mayou.
- Footnote Boindja Boi 30, 11-16.
Miwera. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.