Skip to content
BibleKenya

Miwera

YONA 3

Yona alehi ta Niniwe

Mobalo mo Kumu modoa ta dii Yona, naikina bo: «Angɔɔ, kɛɛ ta Niniwe, ngando enɛnɛ, ko batɔndea mobalo moopi mbi.» Yona angɔɔ, ko akɛɛ mbala iyena ta Niniwe, mondumba moo molomaka Kumu. Niniwe edaka ngando emɔti enɛnɛ, na bonɔ bɛngi oimee ta suka e ngando emina obwani bodala masu masato. Yona aimei ta Niniwe ko na busa bomɔti adala ta ngando enɛnɛ emina esusu atɔndee bato bo: «Ngɔngɔ dji masu tuku inɛi, Niniwe ebehadea.» Na mbala emɔti bato ba Niniwe baso badhima mobalo mo Ndjakomba1. Batomba meko bo bakiye boyaka mia, ko balwa bisendja bi pili, bobanga na badieli mbunoko bato ibia banɔi ikamba. Mokondji o Niniwe aoka gala emina, aangɔɔ ta edie e nde e bokumu, aiwa esendja e nde e Bokumu, ko alwa esendja e pili ko adaa diko di mihulu2. Ko mokondji o Niniwe apa mobeko bo: «Ta mitindo mi mokondji ko na matutu ma nde, edii esiamake ta dii bato na tito banɛnɛ ko na bakɛkɛkɛkɛ boyaka ko bomwaka, ko pɛpɛ bokɛɛ ayedja tito. Moto mosusu na tito atungi alwae esendja e pili. Engi moto abee Ndjakomba na ngulu e nde esusu, moto na moto atungi akine mida mi nde mibe ko midjɔ mibe mi nde misusu mikɔɔki iyo. Ekina ndelo Ndjakomba asɔmbɔtɔnɔdea malɛi ma nde, akinadea kɛlɛ e nde ko alotigoadea.» Ndjakomba aɛnɛ ndenge ekɔɔ bato ba Niniwe bɛngi bakine mida mibe: asɔmbɔtɔnɔ malɛi akina bobe bopalaka iyo bobakɔmea, ko aibokɔ naikina.

Source notes (2)
  1. Footnote Boindja ta Mat 12:41; Luka 11:30, 32.
  2. Footnote Bodaa ta mihulu: embete e ilaka kaoko ndjokwa enɛnɛ, boindja Edjek 27:30.

Miwera. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.