YOANE 1

Mobalo mo bohu ko na bomɔ

1Ta mbangi, Mobalo modaaka; ko Mobalo modaaka na Ndjakomba, ko Mobalo adaaka Ndjakomba. 2Mobalo modaaka na Ndjakomba donga mbangi1. 3Leka losusu lokɔɔ mɔ na Mobalo, ko pɛpɛ nongo eka emɔti edaa pɛpɛ bokɔmɔ na mu2. 4Ta tei e nde edaka bomɔ, ko bomɔ bodaaka bohu bo bato. 5Ko bohu bongɛsɛkɛdea andanda e modidi, endelo modidi moihɔnɔ bomodhima. 6Ndjakomba aloma mwana o elomu omɔti, kombe e nde Yoane3. 7Iyo adoa ondingo temo, bɛngi atɔndee tati e bohu, bɛngi bo bato basusu badhime na ndjea ende. 8Yoane iyo mɛnɛ aidaka bohu, endelo adoa bɛngi adae tati e bohu. 9Bohu bo mina bodaaka bosooti, ibua bodoa a ngondo ko boɛnɛmedjamakadea ta dii bato basusu. 10Mobalo modaaka ta ngondo. Ko ngondo ekɔɔmɔ na Mu4, endelo ngondo eimodjeba. 11Adua ta ekomi e nde iyo mɛnɛ, endelo bato ba nde baimoasɔ. 12Endelo ibia bamoasɔɔ ko bato bamodhimea, abapa bokondji bo boimeya bana ba Ndjakomba5. 13Ibo baimea bana ba Ndjakomba na ndjea e bobotama bo moto, na bopala bo moto, na posa e moto, endelo na posa e Ndjakomba. 14Mobalo aimea moto, ko adaaka ta tei e biso, aluma na bwɛli ko na bosooti. Ko iso loɛnɛɛ ekumu6 e nde, ekumu e Mwana o Ndjakomba omɔti edia iyo adi Sesa. 15Yoane akɔ tati ta tina e nde; aso adumbea bo: «Edi iyoo obalaka mbi bo: “Ngɔngɔ dji mbi moto omɔti adi bodoa endelo iyo anɔini, modjɔ mo iyo adaaka ehele boso bo mbi7.” » 16Iso lobolodja ibiso ibondo na bopele bonde; lobolodja bwɛli diko di bwɛli. 17Mibeko midoa na Mose8, endelo bwɛli ko bosooti djidoa na ndjea e Yesu Kilito. 18Pɛpɛ nongo moto omɔti oɛnɛ Ndjakomba9. Endelo Mwana o onde omɔti iyoo odi Ndjakomba, okadikame mbuti na Sesa, iyo mɛnɛ amohuodja ta dii iso.

Tati e Yoane Mobatisi

(Boindja pongono a Mat 3, 1-12; Mal 1, 1-8; Luk 3, 1-18)

19Indjani tati epama na Yoane ehole edoaka bakondji ba Bayudha ibiaba Yelusalɛmɛ ko baloma banganga ba Ndjakomba ko na ba lewi bɛngi bamowadje bo: «Wɛ odi nda?» 20Ailona bosɔmbedja, endelo adhima na bosooti bo: «Naditi Masiya.» 21Bamowadja naikina bo: «Wɛ odii mɛnɛ nda? Wɛ Eliya?» – Yoane asɔmbedja: «Ngasa, mbi te Eliya.» – Bamowadja naikina bo: «Odi Motɛli?» Asɔmbedja bo10: «Pɛpɛ.» 22Iboa bamobalea bo: «Wɛ odi mɛnɛ nda? Lotungi lokɛe asɔmbedja eyano tadi bato ibia balolomi. Obali tina e wɛ mɛnɛ bo?» 23Yoane asɔmbedja bo: «Nadi

“moto odumbeakadea ta edhu bo:

Ninodjani ndjea e Kumu11!”»

Ndenge etɔndɔ motɛli Isaya.

24Tatei e bato ibia balomaka ibo, Bapalisai pongono badaaka. 25Bamowadjaka na ikina bo: «Omiti da Masiya, kaoko Eliya, kao Motɛli, tina ebatisakadea na wɛ nda?» 26Yoane abasɔmbedja bo: «Mbi, naobatisakadeani na madiba, endelo moto omɔti adi andanda e bino odaakadea ino pɛpɛ bomodjeba. 27Moto omɔti adi bodoa ngɔngɔ dji mbi, ko nabwaniti botingoa mikpulu mi sapato dji nde.» 28Midjɔ mimina misusu minɔmɔkɔ ta Betania12, ta ngunda e Yɔlɔdane, ta esika edaka Yoane abatisa bato.

Yesu, Mwana o bhata o Ndjakomba

29Aya busa, Yoane aɛnɛ yo Yesu akɛkɛdeadoe adi iyo, aso adabala bo: «Indjani Mwana o bhata o Ndjakomba odongedjakadea pekato dji ngondo13. 30Edii tina e nde ehole eotɔndeakani mbi bo: “Moto omɔti akakadoe ngɔngɔ dji mbi, endelo anoini na bokumu, modjɔ mo adaaka boso bo mbi”. 31Mbi naidjebaka moto ndani okɔkɔ iyo da, endelo na doi abatisa bɛngi namodjebedje adii bana ba Isalɛlɛ.» 32Yoane adjebedja naikina bo: «Naɛni Mwembo botita ta busa ondingo embenga ko bodikama ta diko dinde14. 33Naidjebaka naikina kaoko adaaka ndani, endelo Ndjakomba, olomani bo nabatise na madiba, atɔndeani bo: “Iyo oɛnɛdea wɛ Mwembo botita ko boda diko dinde; edii yo moto obatisadea na Mwembo Mosɛnɔke.” 34Mbi mɛnɛ naɛni modjɔ momina, ko nadhimedji bo moto iyoo adii Mwana o Ndjakomba.»

Batingami ba boso ba Yesu

35Aya busa, Yoane adaaka naikina ta esika emina, na batingami bande babae ta tei e batingami. 36Akokoledja Yesu ndelo edakaiyo akɛkɛ anɔe abala bo: «Indjani Mwana o bhata o Ndjakomba15!» 37Batingami babae ba Yoane aoka bo abala boa, bakimana Yesu. 38Yesu adumba mɛngɛ ngɔngɔ, aɛnɛ yo bo bamokimanakadea ko abawadja bo: «Ehombakadea ino nde?» Bamosɔmbedja bo: «Labi16, okadikame djɔ?» Kombe emina etingodji bo «Molehi». 39Abasɔmbedja bo: «Doani ko oɛnɛdeani.» Iboa bakɛkɛ ko baɛnɛ esika ndani edaka yo, ko badaaka na nde busa itombo. Edaka ngonga e banɛi ngɔngɔ dji midi. 40Andele, mwange Simona Petelo, adaaka omɔti atei e bato babae baoka mɛko mi Yoane, ko bakimanaka Yesu. 41Moto o boso osongana na Andele edaka mwanango Simona; amotɔndea bo: «Iso losongani na Masiya.» Kombe emina etingodji bo «Kilito». 42Ko akɛɛ na Simona ta dii Yesu. Yesu amokokoledja ko abala na nde bo: «Wɛ Simona, mwana moomi o Yoane; baobeabi; Sepasi17.» – Kombe emina einedji bo: «Ibanga».

Pilipo na Natanaɛlɛ

43Aya busa, Yesu adaaka na mbuno e bokɛ ta Galileya. Asongana na Pilipo ko abala na nde bo: «Kimanani!» 44Pilipo adaaka moto o Betesaida18, ngando enɛnɛ iyena edonga Andele na Petelo. 45Pilipo asongana na Natanaɛlɛ ko abala na nde bo: «Iso lotanei iyona obala Mose tina ende ta buku e Mibeko ko iyona o bala batɛli pongono19. Edii Yesu o Nadjaleta, mwana moomi o Yosepu.» 46Natanaɛlɛ amowadja bo: «Eka epele ndani ebwani boimana ta Nadjaleta?» Pilipo amosɔmbedja bo: «Doa ko oɛnɛdea.» 47Yana aenɛ Yesu Natanaɛlɛ okɛkɛadoe ta dii yo, abala ta tina e nde bo: «Indjani Moisalɛlɛ omopele mɛnɛ, ta tei ende bokuta boditi.» 48Natanaɛlɛ amowadja bo: «Wɛ odjebini ndenge nda?» Yesu amosɔmbedja bo: «Boso bo Pilipo aobee adaaki wɛ ta tina dji mole mo pigi20, naonɛki.» 49Iboa Natanaɛlɛ abala na nde bo: «Molehi, odii Mwana o Ndjakomba, odii mokondji o Isalɛlɛ21!» 50Yesu amosɔmbedja bo: «Iboa, odhimeini modjɔmo nabali na wɛ bo ehole edaki wɛ ta nase dji mole mo pigi naonɛki? Djeba bo oɛnɛdea mɛko mikina minɛnɛ bonɔɔ imimi!» 51Ko Yesu abakea bo: «Sooti mɛnɛ, naotɔndeakadea bo: oɛnɛdea busa bodipoamake ko bandjelu ba Ndjakomba boiwea ko botita diko di Mwana o moto22!»