Bondjale
MATAYO 3
Eleho e Yoane Mobatisi
(Endja pongono ta Mal 1, 1-8; Luk 3, 1-18; Yoa 1, 19-28)
Oko ta ehole emina, Yoane Mobatisi adaka bodumbea ta etengelenge e Yuda1 ko abangaka boleha. Abalaka: «Hombedjani milema mi bino2, tengasa Bokumu bo diko bobatami!» Yoane adi yona obalaka buku e mbaeli o Ndjakomba Isaya:
«Edi moholi mo moto yona adumbeaka ta etengelenge:
Bɔngedjani ndjea e Kumu,
Ninodjani ndjea e nde bodjɔ3!»
Yoane adaka bolwa bisendja bikɔbo na ngungi i tito okabeebo kamela ko mosenge mokɔbo na iposo i tito ta bongo4; ayaaka ndoko ko pɔki i esika. Bato badaka bokɛ adi yo bodonga ta Yelusalɛmɛ, Yuda esusu ko na mabonga mambuti na Yolodane. Badaka bohuodja pekato i bobo ko Yoane abainaka ta duwa e Yolodane.
Elenge adaka Yoane aenɛ bapalusai ko na basadokai banɛnɛ bodua tine bodia inelo, na bea abalaka na bu: «Ibota i ndjɔ! Otɔndeini otieni kɛlɛ e Ndjakomba yena aduake nda? Botani mbuma i boinedja boo osɔmbɔtɔnini milema ko pɛ bolɛdjɛni bosabalea ta milema boo: “Abalayama adi kɔkɔ e biso5.” Tengasa nabalaka na nu soti boo Ndjakomba aboani boimedja bodonga ta mabanga mi, batitani ba Abalayama! Soka eyɛli mele tine bolena bitape na nginga: mole mosusu mopɛ bobota mbuma ipele mokwɛlɛmɛbi ko modumbamabi ta mosa. Mbi noinakani na madiba tine boinedja boo osɔmbɔtɔnini milema; endolo yona aduake ngɔngɔ i mbi, aonabini na Mwembo Mosɛnɔke ko na mosa. Anɔini na suweya: naboaniti nongo bosunama tine bolodja ngɔli i sapato i nde. Apeli ta ebɔ e nde ehɛhɛli6 tine bogbɔtodja mbuma na poso. Aboleabi mbuma ta ekenge e ndako, endolo atumbabi poso ta mosa mokadae pɛ bodimea.»
Batisimo ba Yesu
(Endja pongono ta Mal 1, 9-11; Luk 3, 21-22)
Ta ehole emina, Yesu adongaka ta mokpɔtɔ mo Galilea ko akɛkɛ ta Yolodane; aimeaka adi Yoane bɛngi ainame na nde. Endolo Yoane alonaka ko abalaka: «Edi mbi moto oboani boinama na wɛ ko wɛ odoi adi mbi!» Endolo Yesu amosɔmbedjaka: «Kina boo ekɔme bea edɛdi! Tengasa endja mondumba moboanisu bokokedja meako mi bosoti mahɔdjɔkɔ Ndjakomba.» Na bea Yoane adimaka. Oko ta ehole einamaka Yesu, aimaka ta madiba. Ta ehole emina busa bodipoamaka tina e nde: aenɛkɛ Mwembo mo Ndjakomba botita diko i nde elenge embenga. Ko kɔpi eokamaka donga ta busa bobala: «Iyo adi Mwana o mbi oepaeli; nasepi na nde mɛnɛ7.»
Source notes (7)
- Footnote Etengelenge e Yudea mokpɔtɔ moluma na bato modaka ta pakaso e molɔngɔ mo Kɛlɛte e Yelusalɛmɛ na Ebɔ ko na duwa e Bogo kaoko Yolodani e tei.
- Footnote Hombedjani milema makoma makina Hombedjani malɛi kaoko hombedjani mida mi bino.
- Footnote Isa 40, 3, elangama ta makoma mayou.
- Footnote Endja pongono ta 2 bak 1, 8.
- Footnote Kokanedja ta Yoa 8, 33, 37,39.
- Footnote Ehɛheli e bohɛhɛ: edi eka eboani na ehɛheli kaoko etanda ko ekakamoe ta bopukusa mbuma i bule tine bogbɔtodja mbuma na poso.
- Footnote Kokanedja ta Ndj 2, 7; Isa 42, 1.
Bondjale. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.