Izaga 19

1Ungcono umyanga ohamba ngobuqotho

kulesiwula esilezindebe ezingcolileyo.

2Kakulunganga ukutshiseka kodwa ungelalwazi,

loba ukuwalazela uze ulahlekelwe yindlela.

3Ubuwula bomuntu budiliza impilo yakhe,

ikanti inhliziyo yakhe ithukuthelela uThixo.

4Inotho iletha abangane abanengi,

kodwa umyanga ufulathelwa ngumngane wakhe weduze.

5Umfakazi wamanga uthola isijeziso,

lalowo ohutshuza amanga kayikuphunyuka.

6Banengi abazincengela ukuthandwa ngumbusi,

njalo wonke umuntu ngumngane walowo ophanayo.

7Umyanga uhlanyukelwa yizihlobo zakhe zonke,

pho abangane bakhe bona bamnina kangakanani!

Lanxa ebancenga kangakanani,

ngeke esabathola.

8Lowo ozuze ukuhlakanipha uthanda umphefumulo wakhe;

lowo ogogosa ukuzwisisa uyaphumelela.

9Umfakazi wamanga uthola isijeziso,

njalo lowo ohutshuza amanga uzabhubha.

10Kakusifanelanga isiwula ukuthi sihlale enothweni

kubi kangakanani ukuthi isigqili sibuse amakhosana.

11Ukuhlakanipha komuntu kumupha isineke;

kumupha udumo ukunganaki ukuqalwa.

12Ukuthukuthela kwenkosi kunjengokubhonga kwesilwane,

kodwa ukuthandwa yiyo kunjengamazolo etshanini.

13Indodana eyisiwula iyamchitha uyise,

lomfazi olenkani

unjengamanzi athonta ephahleni njalonje.

14Izindlu lenotho yilifa elizuzwa ebazalini,

kodwa umfazi ozwisisayo uvela kuThixo.

15Ubuvila buletha ubuthongo obukhulu,

njalo umuntu owehluleka ukuzenwaya uyalamba.

16Lowo olalela izeluleko uvikela impilo yakhe,

kodwa lowo ozedelelayo uzakufa.

17Olomusa kubayanga upha uThixo,

uzamupha umvuzo ngalokho akwenzayo.

18Qondisa indodana yakho, ngoba lokho kuzayisiza;

ungabi lengxenye yokuyibulala.

19Umuntu ololaka oluphuphumayo luyamtshayisa,

ungamlamulela, usuzahlala umlamulela njalo.

20Lalela ukucetshiswa, wamukele ukuqondiswa,

ngoba ekucineni uzahlakanipha.

21Inhliziyo yomuntu igcwele amacebo amanengi,

kodwa yisimiso sikaThixo esimayo.

22Umuntu uloyisa uthando olungaqamukiyo;

kungcono ukuba ngumyanga kulokuba lamanga.

23Ukumesaba uThixo kuholela ekuphileni:

olakho uhlala esuthisekile, engathintwa yizinhlupheko.

24Ivilavoxo litshonisa isandla salo emganwini,

liyehluleke ukubuyisa isandla emlonyeni lidle.

25Thela uswazi isideleli, abathobekileyo bazafunda ukuhlakanipha;

khuza umuntu oqedisisayo, uzazuza ulwazi.

26Lowo ontshontshela uyise, axotshe unina

yindodana ethelela inhloni lehlazo.

27Nxa uyekela ukulandela izeluleko, ndodana yami,

uzalahleka utshiye amazwi okwazi.

28Umfakazi oxhwalileyo uyawudelela umthetho,

lomlomo womubi uminza ububi.

29Izijeziso zilungiselwe izideleli,

loswazi ngolwemihlane yeziwula.