Nahali Bible
रोमीयो 3
तानकेरता बिगेर यहुदिन सामने तुमरो यहुदि एणेन काय बोड़ाय? एने तुमरा खेतनान काय फायदो? आखी बातीन जुलूम काय। पेल्लो ते ज्य काय बोगवानान बोरहावालो वचन यहुदिह होपाय जायेल। केदी थोड़ाक माणहे बुरहो नाह बी केऱ्या ते काय एनो? काय तान अविश्वास बोगवानान खेरायीह फालतुक ठेरावी? केदिस नाह! पुण बोगवान खेरलो एने एकेक माणुह जुठो ठेराय, पुस्तेक माय लिखेल हे,
“जाकेरीन तु तारी वातु माय खीरलो एने न्यायी ठेराय सिकेह,
एने नियाव केरने बुखेत तुवाह जिक जुड़ी।”
तानकेरता केदी आमरो खाराब काम बोगवानान देरमीपोणा ठेराव दिथे, ते आमु काय किज्यो? काय ज्य काय बोगवान जो राग किरेह अन्यायी हे? ज्य ते मी माणहान रितीन गेत केथु। केदिस नाह! नाह ते बोगवान दुनियान नियाव किहीक केरी?
केदी मारा जुठान वोजेसे बोगवानान खेराय तान बोड़ाय ने केरता उंजु बी वोदार देखानो, ताहार ओवतो काहा पापी माणहान गेत मी नियावान केरता ठेराय जाथु? “आपु काहा बुराय नाय किरज्यो काय बोलाय निकले?” जीहे काय आमु पोर जुठो आरोप लागाड़ाय बी जाथे, एने थोड़ाक माणहे केतेह काय न्यान ज्योस केणो हे। पुण ओहलान आरोप लागाड़नो ठिक हे।
कुण देरमी नाह
ताहार ओवतो काय एनो? काय आपु यहुदि ताह रेन हाजा हेते? केदिस नाह; काहाकाय आपु यहुदि एने बिगेर यहुदि दुयू पोर ज्यो दोस लागाड़ दियेल हेते काय ता आखान आखा पापान काबाम हेते। पुस्तेक माय इहकेरीन लिखेल हे: “कुण देरमी नाह, एक बी नाह। कुण ईकेलवालो नाह; कुण बोगवानाह होदणार नाह। आखा बोगवानाह रेन बोटकी जायेल हेते, आखान आखा उगार बोण जायेल हेते; कुण बोलाय केरनार नाह, एक बी नाह। तान गिलो उगाड़लो माहेण हे, ता तान जीब्यु केरीन कोपेट किरेल हेते, तान ओठा माय गेड़हान जेहेर हे। तान मुय हाराप एने खाराबपोणा केरीन बोरायेल हे। तान पाय लुय वोयाड़ने केरता उतवाल्यास एय जायेल हेते, तान वाटी माय खेतेम एने पिड़ा हे। ता सान्तीन वाट ओलख्या नाह। तान डोलान सामने बोगवानान बिय नाह।”2 आमु जाणतेह काय नेम जो काय किथे ताहास किथे, जो नेमान काबाम हे; ज्यानकेरता काय एकेक मुय बोंद केराय जाय एने आखी दुनिया बोगवानान नियावान लायकी ठेराय; 3काहाकाय नेमान कामा केरीन कुण बी माणुह बोगवानान सामने देरमी नाय ठेराय, ज्यानकेरता काय नेमान द्वारा पापान ओलखात ईथे।
बोरहान द्वारा देरमीपोणा
पुण एवी नेमाह रेन आंगे बोगवानान तो देरमीपोणा देखायेल हे, जान गोवाय मुसान नेम एने जाणाव केरनार देतेह। 4मतलब बोगवानान तो देरमीपोणा जो यीशु मसी पोर बुरहो केरनेन द्वारा जुड़ेह तो आखा बुरहो केरनारान केरता हे, ता माय काय फारेक नाह। ज्यानकेरता काय आखा माणहे पाप किरेल हेते एने बोगवानान बोड़ायीह रेन सेटा हेते, पुण तान गीणी केरीन ता सुटकारान द्वारा जो यीशु मसीम हे, आखान आखा फुकेट माय देरमी ठेराय जातेह। 5यीशुह बोगवान तास ने लुयीम बोरहान द्वारा ओहलो प्रायश्चित बोली ठेरायो, जो बुरहो केरने से कार्यकारी ईथे, काय जा पाप पेल केराय गीया; एने जा पोर बोगवान तान सहनशीलता माय विहराव दिनो। तान बाराम तो तान देरमी पोणाह देखाड़ी। पुण ज्यीस टेम तान देरमीपोणा देखाय काय जाकेरीन तो सोताच देरमी ठेराय, एने जो यीशु पोर बुरहो केरी तान बी देरमी ठेरावणार जुवे।
ताहार गोमेंड केरने काहरी हे? एने ज्यान गोमेंड केरनेन कारेण काय हे, नेमान पालेन केरने काय ज्य नाह सोतो? पुण ता पोर बुरहो केरने। तानकेरता आपु ज्या परिणाम पोर पोचतेह काय माणुह बोगवाना पोर बुरहो केरनेन द्वारा देरमी ठेराय जाथे, नाह काय कायदो पालेन केरनेन द्वारा। काय बोगवान फोक्तो यहुदिस ने हे? काय तो बिगेर यहुदिन बोगवान नाह? होव, बिगेर यहुदिन बी बोगवान हे। 6काहाकाय बोगवान एकुस हे, एने तो यहुदिह बोरहा केरीन एने बिगेर यहुदिह बी बोरहान द्वारा देरमी ठेरावी। ताहार ओवता काय आपु नेमाह बोरहान द्वारा बिगेर कामान ठेरावतेह? केदिस नाह! पुण बोरहान द्वारा नेमाह मोजबुत केरतेह।
Source notes (6)
- Footnote बिगेर यहुदि माय रेन हाजी देशा माय; बिलकुर नाह! बिगेर यहुदि खाराब देशा मा; पुरो नाह।
- Footnote बजन 36:1
- Cross-reference गलातीयो 2:16
- Cross-reference गलातीयो 2:16
- Footnote तान लुय केरीन; नाहते तान सोतान अर्पण किरेल मोत से।
- Cross-reference गलातीयो 3:20
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.