Nahali Bible
रोमीयो 2
बोगवानान नियाव
केरीन एय दोस लागाड़णारे, तु एगदो काहा नाय रेय, तु निरूत्तर हे; काहाकाय जी वातीम तु दिहरा पोर दोस लागाड़ेह तीस वाती माय सोताह बी दोसी ठेरावेह, ज्यानकेरता काय तु जो दोस लागाड़ेह सोतास तो काम किरेह। काहाकाय आमु जाणतेह काय जा ओहला काम केरतेह, तान नियाव बोगवान खेरायीन गेत किरेह। पुण एय माणुह, तु जो ओहला ओहला काम केरनारा पोर दोस लागाड़ेह एने खुद तास काम किरेह; काय ज्य सोमजेह काय तु बोगवानान डेंडान नियावाह रेन वोच जाहे? काय तु तान मोटली गीण, एने सहनशीलता, एने दिरीह नेचो जाणेह? काय ज्य नाह सोमजेत काय बोगवानान गीण तुवाह मोन बोदेलनेन उगे ली जाथे? पुण तु तारो काठोपोणा एने एकएट्या मोनान वोजेसे बोगवानान रागान दिह्यान केरता, जा माय बोगवानान खेरलो नियाव देखाय, सोतान उपेर डेंड लावेह। बोगवान एकेकाह तान कामान गेत बुदलो आपी। जो हाजाला कामान दुंद माय रेयीन बोड़ाय, मान एने कायेमान होदवाल्यो हे, ताह बोगवान जेलेमक्यी जीवाय आपी। पुण जा माणहे स्वार्थी हेते एने खेरायीह नाह मानते, काहाकाय खाराब काम केर सेकती ओहला आखा माणहा पोर बोगवान तान राग टाकी। पुण दुख एने तेकलीत ता माणहा पोर आवी जो बाकतो किरेह; पेल यहुदि पोर ओवतो बिगेर यहुदि पोर; पुण बोगवान ता एकेक माणहाह जो हाजो काम किरेह, बोड़ाय मान एने सान्ती आपी, पेल यहुदिह एने ओवतो बिगेर यहुदिह। काहाकाय बोगवान बिगेर बेदबाव माय आखान नियाव किरेह।
बिगेर यहुदि फाय मुसान नेम ना सोतो, एने तान पापान नियाव बिगेर नेमान गेत एय। यहुदि फाय मुसान नेम हे एने तान किरेल पापान नियाव नेमान गेत एय; काहाकाय बोगवानान सामने नेमाह होमेलनारे देरमी नाह, पुण नेमान पालेन केरनारे देरमी ठेराय जाती। जेवी बिगेर यहुदि माणहा फाय नेम ना सोतो, पुण तीबी ता आपाप नेमा पोर चालतेह, ते तो सोता माय नेम हे, तीबी मुसान नेम ता फाय ना सोतो। तान बोलनो चालनो देखाड़ेह काय नेम तान विवेक माय लेखायेल हे एने तान मोन बी ताह किथे काय ज्य खेरी हे एने ज्याह लेन तान विचार गुनेगार एने दोसी ठेरावेह। ते दिह बोगवान मार पारचार किरेल हाजाली खोबरीन गेत यीशु मसीन द्वारा माणहान लिकायेल विचारान नियाव केरी।
यहुदि एने नेम
केदी तु सोताह यहुदि किथे, एने नेमा पोर निर्बर रीथे, एने आपणा बोगवानान माहु गोमेंड हे। एने तुवाह मालुम हे काय बोगवान तुवा फाय रेन काय केरावणे हुदेह, एने हाजाल्यु वातुह निवाड़ने तु नेमा केरीन हिकेल हे। एने सोता पोर ज्यी वातीन बुरहो मिलेह काय मी आंदलान अगुवो, एने आदारलाम रेणारान केरता उजालो, एने विण बुद्दी वालाह सोमजाड़नार, एने सोराह हिकाड़नार हे; एने तु पाको हे, एने खेरायीन नमुनो जो नेमाम हे, माहु जुड़ेल हे। जो दिहराह हिकाड़ेह, तु खुद काहा नाह लागु किरेत? तु जो चोरी नाह केरनेन हिकवोण आपेह, काय खुद चोरी नाह किरेत? तु जो किथे, “सिनालो मा किरहे,” काय सोतास सिनालो किरेह? तु जो मुरतीह विटोल मानेह, काय सोतास मोंदिराह नाह लुटेत? तु जो बोगवानान नेमान बाराम गोमेंड किरेह, काय तु बोगवानान नेम नाह मानेन अपमान किरेह? काहाकाय “तुमरे वोजेसे बोगवानान नावान चिहटा बिगेर यहुदिम केराय जाथे,” जिहकेरीन पुस्तेक माय लिखेल हे।
काहाकाय केदी तु नेमान पालेन किरहे, ताहार खेतना केरीन फायदो ते हे, पुण केदी तु नेमाह नाय माने ताहार तारो खेतना बिगेर खेतनान एणेन गेत ठेरानो। तानकेरता केदी बिगेर यहुदि जान खेतना नाह ईयेल सोतो तीबी नेमान पालेन किरेह ताहार काय तान बिगेर खेतनान एणेन बाद बी तो खेतनावालाम नाय गेणाय जाय? एने तुमू यहुदिन बिगेर यहुदिन द्वारा दोसी ठेराय जाय, जो तुमरे फाय लेखायेल नेम एने तुमरो खेतना ईयेल हे; पुण बिगेर यहुदि नेमान पालेन केरतेह, जेवी काय सारिरीक रूप माय खेतना नाह ईयेल सोतो। एक खेरलो यहुदि तो हे जान खेरीच खेतना ईयेल हे तो कुण हे? खेरलो यहुदि तो नाह जो निस्तो बाहेरल्या वेहा माय यहुदि हे, जान खेतना निस्तो सारिरीक हे। पुण खेरलो यहुदि तोस हे जो माय रेन यहुदि हे; जान मोन से खेतना ईयेल हे। एने ज्य बोगवानान जीवान काम हे, नाह काय लेखायेल नेमा केरीन; ओहला माणहे बोगवानान उगे रेन बोड़ाय सापड़ावी नाह काय माणहान उगे रेन।
Source notes (1)
- Cross-reference मत्ती 7:1; लुका 6:37
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.