Nahali Bible
फिलेपियो 4
निर्देश
तानकेरीन एय बाय बोणहा, तुमू मारा कोलाक मोंगाल्ला हेते, जी मारी खुसी एने मुकूट एय, मालीक माय इहीचकेरीन थोबीन रिवो
मी यूओदियाह एने सुन्तुखे तुमू दुयाह बी विन्ता केरथु काय मालीक माय बोणीख ने गेत एका दिहरा हेऱ्या सहमती बाणावीन रिवो। एय खेरला हाती, मी तुवा बी विन्ता केरथु काय तु त्यु बायकुन मोदेक केर, काहाकाय त्यु मार हेऱ्यु हाजाली खुबेर फेहलावणेन, क्लेमेंस एने मारा दिहरा हाती हेऱ्यु मेहनेत किरेल, जान नाव जीवणान पुस्तेक माय लिखेल हेते। मालीक माय एक एन कायेम खुस रिवो; मी पुशो केथु, खुस रिवो। तुमरी कोमलता आखा माणहा पोर देखाय। मालीक जेल्दी आवण्यो हे। काल्ली बी वातुन चिन्ता मा किरो; पुण एकेक वात माय तुमरो निवेदन, विन्ता एने विन्तान द्वारा दन्यवाद हेऱ्यो बोगवानान ओंगाण मेलाय जाय। तेवी बोगवानान हुक, जो आखा होमेजाह रेन आंगे हे, तुमरा मोनाह एने तुमरा विचाराह मसी यीशु माय एक एणेन द्वारा होमालीन मेली। ज्यानकेरीन एय बाय बोणहा, जी जी वातु खेरली, आदरणीय, हाज्यी, चोखाली, मोनाह पुटी तोहली, मतलब जी बी हाजा गुण एने स्तुतीन लायेक वातु हेत्यु, त्यु पोर द्यान लागाड्या किरो। जी वातु तुमू माह फाय रेन हिकेल हेते, एने स्वीकार किरेल हेते, त्यीह तुमरा आचारण माय लावो। एने होमलेल हेते, एने मार माय दिखेल हेते, तास ने पालेन केऱ्या किरो, तेवी बोगवान जो हुकान जिर हे, तुमरी हिऱ्यो रेय।
दान ने केरता दन्यवाद
मी मालीक माय जुलूम खुस हे काय एवी ओला दिह्यान पासाण तुमरी चिन्ता मार बारा माय पोशी देखाड़णेन गालो जुड़ेल हे; खेरीच तुमूह पेलुच बी ज्यान विचार एतो, पुण तुमूह टेम नाह जुड़नो। ज्यो नाह काय मी मारी कोमीन कारीन ज्यो केथु; काहाकाय मी ज्यो हिकेल हे काय जी हाल माय हे; तास माय खुसी केरू। मी अनुबव किरेल हे, काय कोमी काय हे एने जादा काय हे; एकेक वात एने सोब हाल माय मी बुखल्यो रेणे, एने एकेक हाल माय का बी काहरी बी सोब हाल माय आफरीन रेणो मी हिकेल हे। जो माहो ताकेत आपेह तान द्वारे मी आखो काय केर सेकथु। तीबी तुमू हाजो किरेल काय मारा दुखा माय मारा हाती बोणना। एय फिलेपियो, तु सोता बी जाणेह काय हाजाली खोबरीन पारचारान पेल, जेवी मी मकादुनिया माय रेन गीयो, तेवी तुमूह सोड़ीन उंजु काल्ली मोंडली लेणा देणान बाराम मारी मोदेक नाह केरी। 12इहकेरीन जेवी मी थिस्सलुनिक्यो माय ईथे, तेवीह बी तुमू मारी कोमी पुरी केरनेन केरता एकाह रेन जास्ती वार काय पुण मोदेक लेन मुकलेल एता। ओहलो नाह काय मी बोकसीस ने आसा केरथु, पुण मी ओहलो दान होदथु जो तुमरा तुमरा खाता माय जोमा केरू। मार फाय आखो काय हे, एने जुलूम बी हे; जी वोस्तु तुमू इपफ्रुदीतुस ने आथे ली मुकलेल एता त्युह देरीन मी आखरी गीयोह, तो ते सुखदायक सुगन्द, लेय लेणेन लायेक बोलीदान हे, जो बोगवानाह पुटीह। मारो बोगवान बी तान ता मालदेनान गेत जो बोड़ाय हेऱ्यो मसी यीशु माय हे, तुमरी एकेक कोमीह पुरो केरी। आमरो बोगवान एने आबाख ने बोड़ाय कायेम इती रेय। आमेन।
सेवल्यो नमस्कार
एकेक बोगवानान माणहाह, जा मसी यीशु माय हेते नमस्कार किवो। जा बायाख एने बोणीख मार हेऱ्या हेते, तुमूह नमस्कार केतेह। आखा बोगवानान माणहे, खास केरीन जा केसर ने गेराणान हेते, तुमूह नमस्कार केतेह। आमरा मालीक यीशु मसीन गीण तुमू माणहा पोर इती रेय
Source notes (2)
- Cross-reference प्रेरितान काम 17:1
- Cross-reference 2 कुरिंथीयो 11:9
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.