Nahali Bible
गिनती 34
कनान देसान एद्दयु
ओवतो यहोवा मुसाह केयो, “तु इस्राएलीह ज्यो उकुम आप, जेवी तुमू कनान देसा माय पोचहो, तेवी जो देस तुमूह ईसा माय जुड़ी, तान ज्यु एद्दयु रेती। तेवी तुमरो दक्षिण ईलाको सीन नावान जेंगला माय रेन एदोम देसान दिड़े लागतो जात रेय, एने तुमरी दक्षिण वाली एद्दी खारला देरीयान सेवटा पोर चालु एन पश्चिम उगे चाले। ता रेन तुमरी एद्दी अक्रब्बीम नावान चेड़तीन दक्षिण उगे पोचीन वोले, एने सीन वोर आवी, एने कादेशबर्नेन दक्षिण उगे निकले, एने हसरद्दार वोर वोड़ीन अस्मोन वोर पोची। ओवती ती एद्दी अस्मोन रेन फिरीन मिस्र देसान खोदराम वोर पोची, एने तान सेवोट देरीयान मिरो ठेराय।”
ओवती पश्चिमी एद्दी मोटलो देरीयो रेय; तुमरी पश्चिमी एद्दी ज्यीस ठेराय।
तुमरी उत्तरी एद्दी ज्यी रेय, तुमू मोटला देरीयाम रेन होर बोयड़े वोर एद्दी बांदज्यो। एने होर बोयड़े रेन हमात ने गाटे वोर एद्दी बांदज्यो, एने ती सदाद पोर निकले; ओवती ती एद्दी जिप्रोन वोर पोची, एने हसरेनान पोर निकले; तुमरी उत्तरी एद्दी ज्यीस ठेराय।
पोशी तुमरी पुर्वी एद्दी हसरेनान माय रेन शपाम वोर बांदज्ये। एने ती एद्दी शपाम रेन रिबला वोर, जो ऐनान पुर्व उगे हे, ता रेन बुंदे उतरीन किन्नेरेत नावान देरीयान पुर्व हेऱ्यी लाग जाय। एने ती एद्दी यरदन नेदी वोर उतरीन खारला देरीयान दिड़े निकले।
“तुमरा देसान कावदेन एद्यु ज्युस ठेरान्यु।” 1
तेवी मुसा इस्राएलीह पुशो केयो, “जा देसान तुमू चिट्ठी टाकीन आदिकारी रिहो, एने यहोवा ताह साड़े नोव वोसीन माणहाह आपणेन उकुम आपेल हे, तो ज्योस हे। पुण रूबेनी एने गादीन गेराणो ते आप आपणा डायडायान गेराणान पारमाणे आप आपणो ईसो सापड़ाव लियेल हेते, एने मनश्शेन आदा गेराणान माणहे बी तान ईसो सापड़ाव लियेल हेते। ता एड़ी गेराणान माणहे यरीहोन आहने यरदन नेदीन पार पुर्व दिशा माय, जाहरी दिह उगेह, आप आपणो ईसो सापड़ाव लियेल हेते।”
बुय वाटणारे मुखी
ओवतो यहोवा मुसाह केयो, “जा एदमी तुमरी केरता ती बुयीह वाटती तान नावे ज्या हेते, एलीआजार चाकऱ्यो एने नुन ने बिटोख यहोशु। एने बुयीह वाटणे माय तान मोदेक केरनेन केरता एकेक गेराणान एक मुखी ठेरावज्ये।” एने ता एदम्यान नावे ज्या हेते, यहुदा वोसीन यपुन्नेन बिटोख कालेब, शिमोन वोसीन अम्मीहुदान बिटोख शमुएल, बिन्यामीनान वोसीन किसलोन ने बिटोख एलीदाद, दानान वोसीन मुखी योग्लीन बिटोख बुक्की, युसूफान वोसी माय रेन मनश्शेन वोसीन मुखी एपोदान बिटोख हन्नीएल, एने एप्रेमान वोसीन मुखी शिप्तानान बिटोख कमुएल, जबुलून ने वोसीन मुखी पर्नाक ने बिटोख एलीसापान, इस्साकारान वोसीन मुखी अज्जानान बिटोख पलतीएल, आशेरान वोसीन मुखी शलोमीन बिटोख अहीहुद, एने नप्तालीन वोसीन मुखी अम्मीहुदान बिटोख पदहेल। जा एदम्याह यहोवा कनान देसाह इस्राएली माणहान केरता वाटणेन उकुम आपेल ता ज्यास हेते।
Source notes (1)
- Cross-reference गिनती 26:52-56; यहोशु 14:1-5
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.