Nahali Bible
लेव्य 14
कोढ़ा केरीन चोखो ठेरावाय जाणो
ओवतो यहोवा मुसाह केयो, कोढ़ीन चोखो ठेरावणेन नेम ज्यो हे, तो चाकऱ्या फाय पोचाड़ाय जाय; चाकऱ्याह ता माणहा फाय पाड़ावान बाहेर जाणे जुवे, चाकऱ्याह ज्य देखणेन कोसीत केरने जुवे काय तान कोढ़ान बेमारी हुदेर जायेल हे। ते चाकर्यो उकुम आपी काय हुदीरनारान केरता दुय चोखाला एने जीवताला चिड़ा, देवदारून लाकड़े, एने रातला रेंगान फाड़को एने जुफान रोप ले जाणे जुवे। एने चाकर्यो उकुम आपी काय एक चिड़ो वोयताला पाण्यान उपेर, माटड्यान ठामला माय बोली केराय जाय। तेवी तो जीवताला चिड़ाह देवदारून लाकड़े एने रातला रेंगान फाड़का एने जुफा न्या आखाह लेन एकठोस ता चिड़ान लुयीम जो वोयताला पाण्यान उपेर बोली किरेल हे बुड़ीव देय; एने कोढ़ केरीन चोखाला ठेराणारा पोर सात वार सेड़कीन ताह चोखो ठेरावे, तेवी ता जीवताला चिड़ाह चोवगानाम सोड़ देय। एने चोखो ठेराणार तान फाड़काह दोवे, एने आखा लेट्या काटाड़ीन पाण्या केरीन उंगले, तेवी तो चोखो ठेराय; तान बाद तो पाड़ावा माय जाय सेकी, पुण सात दिह वोर तान पाड़ावा रेन बाहेरूस रेय। सातवे दिह ताह तान आखा लेट्या काटाड़ लेणे जुवे, ताह तान लेट्या, दाड़ी, डोलान आखा नेवणा काटाड़ लेणे जुवे, एने तान फाड़काह दोवे, एने पाण्या केरीन उंगले, तेवी तो माणुह चोखो ठेराय।
आठवे दिह तो दुय हाजा मेंड्रान पिला एने एक वोरह्यान हाजो मेंड्रान पिलो, एने एन बेट केरता तेल बेचकेल पाच किलो फिट, एने आदो किलो तेल लावे। एने चोखो ठेरावणार चाकऱ्यो ज्यु आख्यु वोस्तु बेल ता माणहाह मिलापवाला तोम्बुन बायणा पोर यहोवान सामने उबो केरी। तेवी चाकर्यो एक मेंड्रान पिलो लेन दोसबोलीन केरता ताह एने आदो किलो तेलाह आहने लावे, एने न्या दुयाह आलाड़नेन बेटीन केरता यहोवान सामने आलाड़े; एने चाकर्यो ता मेंड्रान पिलाह तीस जागे, जाहरी तो पापबोली एने होमबोली जेनवारान बोली केऱ्या केरी, मतलब चोखाला जागाम बोली किरे; काहाकाय जोहलो पापबोली चाकर्यान ईसो रेय तिहेच केरीन दोसबोली बी तास ने ईसो ठेराय; तो जुलूम हाजो हे। तेवी चाकर्यो दोसबोलीन लुयीम रेन थोड़ीक लेन चोखो ठेराण्या माणहान जीवड्या कानान सेवटा पोर, एने तान जीवड्या आथान एने जीवड्या पायान आंठा पोर लागाड़े। तेवी चाकर्यो तीन होव ग्राम ने आस पास तेलाम रेन थोड़ोक लेन तान डाखऱ्या आथान तेलसा पोर टाके, एने चाकर्यो तान जेवड्या आथान आंगलीह तान डाखऱ्या तेलसा पोर वाला तेलाम बुड़ावीन ता तेलाम रेन थोड़ोक तान आंगली केरीन यहोवान सामने सात वार सिड़के। एने जो तेल तान तेलसा पोर रेय जाय चाकर्यो ताम रेन थोड़ोक चोखो एण्या माणहान जीवड्या कानान नेचला सेंडा पोर एने तान जीवड्या आथ एने जीवड्या पायान आंगठा पोर दोसबोलीन लुयीन उपेर लागाड़े; चाकर्यो तान तेलसाम वोचेल तेल चोखो एण्या माणहान मुंडी पोर लागाड़े, इह केरीन चाकर्यो ता माणहान पाप यहोवान सामने डापे।
तान बाद चाकर्यो पापबोली केरी एने माणहान पाप डापे, जा केरीन तो चोखो एय जाय, तान बाद चाकर्यो होमबोली जेनवारान बोली किरे, तेवी चाकर्यो होमबोली एने एन बेटीह वेदी पोर चेड़ावी, इह केरीन चाकर्यो ता माणहान पाप बोली केरीन डापे एने तो माणुह चोखो एय जाय।
पुण केदी माणुह गेरीब हे एने ताह बुकोड़ आपणेन ताकेत नाय रेय, ताहार तो तान बोली केरावणेन केरता, एने तेल बेचकायेल पाच किलो मोयदो एन बेट एने आदो किलो तेल लावे; एने दुय ओला नाहते पेरवान दुय पिला लावे, जा ता लाव सेकती; एने न्याम रेन एक ते पापबोलीन केरता एने दिहरो होमबोलीन केरता रेय। एने आठवे दिह, तो माणुह त्यु चिजुह चाकऱ्या फाय मिलापवाला तोम्बुन बायणा पोर लावे, त्युह यहोवान सामने बोली चेड़ावाय जाय, जा केरीन माणुह चोखो एय जाय। तेवी चाकर्यो आदो किलो तेल एने दोसबोलीवाला मेंड्रान पिलाह लेन आलाड़नेन बेटीन केरता यहोवान सामने आलाड़े। ओवतो दोसबोलीन मेंड्रान पिलाह बोली केराय जाय; एने चाकर्यो तान लुयीम रेन थोड़ीक लेन चोखो ठेराण्या माणहान जीवड्या कानान सेवटा पोर, एने तान जीवड्या आथ एने जीवड्या पायान आंगठा पोर लागाड़े। ओवतो चाकर्यो तेलाम रेन थोड़ोक तान डाखऱ्या आथान तेलसा पोर रोचवीन, चाकर्यो तान जीवड्या आथान आंगली केरीन, तान डाखऱ्या तेलसा पोर वाला तेलाम रेन थोड़ोक यहोवान सामने सात वार सिड़ेक। ओवतो चाकर्यो तान तेलसा पोर वालो तेलाम रेन थोड़ोक चोखो ठेरावणारान जेवड्या कानान सेवटा पोर, एने तान जीवड्यो आथ एने जीवड्या पायान आंगठा पोर, दोसबोलीन लुयीन जागे लागाड़े; एने जो तेल चाकर्यान तेलसा पोर रेय जाय ताह चोखो ठेराण्या माणहान मुंडी पोर रोचवे, इह केरीन यहोवान सामने चाकर्यो ता माणहान पाप डापे। तेवी तो ओला नाहते पेरवान पिलाम रेन जो तो लाव सिक्यो एकाह बोली केरी, मतलब जो चिड़ो तो लाव सिक्यो, ताम रेन तो एकाह पापबोलीन केरता एने एन बेट बेल दिहराह होमबोलीन केरता चेड़ावे; इह केरीन चाकर्यो चोखो ठेरनारान केरता यहोवान सामने तान पाप डापे। जाह कोढ़ान बेमारी इयेल एय, एने तान ओलीक ताकेत निह एय काय तो चोखी केरनी चिजीह लाव सेकी, ते तानकेरता ज्योस नेम हे।
गेराम लागेल कोढ़
ओवतो यहोवा मुसा एने हारूनाह ज्य केयो, जेवी तुमू कनान देसाम पोचहो, जाह मी तुमरी सोतान बुय बोणनेन केरता तुमूह आपथु, तुलबुखे केदी मी कोढ़ान बेमारी तुमरा आदिकारान एगदा गेराम देखाडु, ते ता गेरान मालीक चाकऱ्या फाय आवीन केणे जुवे काय, मी मारा गेराम कोढ़ान गेत एगदी बेमारी दिखेल हे। तेवी चाकर्यो उकुम आपी काय ता गेराम बेमारी देखणेन केरता माहु जाणेन पेल ताह खाली किरो, केदी ओहलो नाय एय काय जो काय गेराम रेय तो आखो एठो ठेराय; एने पासाण चाकर्यो गेर देखणेन माय जाय। तेवी चाकर्यो ती बेमारीह देखी; एने केदी ती बेमारी गेरान बितड़ा पोर निला निला नाहते रातलो खुदेल निसाणीन वेहाम एय, एने ता निसाणी बितड़ाम वोदार देखाथे, ताहार चाकऱ्याह गेराम रेन बाहेर निकेल आवणे जुवे एने सात दिह वोर गेर बोंद केर देणे जुवे। एने हातवे दिह चाकर्यो आवीन देखी; एने केदी ती बेमारी गेरान बितड़ा पोर पोसीर गियी एय, ताहार चाकर्यो उकुम आपी काय जा देगड़ाम बेमारी हे, ताह निकालीन गावान बाहेर एगदा एठा जागाम टाक देय; एने चाकर्यो गेरान मायतोस कावदेन उखलाड़े, एने तो उखालेल माटड्यो गावान बाहेर एगदा एठा जागाम टाकाय जाय; तेवी ता माणहाह नोवाला दिगोड़ केरीन बितड़ो बांदे एने चाकर्यो ताबालो गारो लेन बितड़ाह निपे।
एय सेकी एगदो माणुह जुनाला दिगोड़ एने गाराह निकालीन नोवाला दिगोड़ एने गाराह लागाड़े, एने एय सेकी ती बेमारी ता गेराम पोशी देखाय। तेवी चाकर्यो आवीन ता गेरान जाच केरी, एने केदी ती बेमारी गेराम पोसरी गीयीय, ताहार तो जाण लेय काय ज्यो नुकसान केरनार कोढ़ हे; तो गेर एठो हे। एने तो माणुह आखो गारा बेल दिगोड़, लाकड़े एने गेराह खोदाड़ीन ओदार देय; एने ती आखी चिजीह विसाड़ीन गावान बाहेर एगदा एठा जागाम टाकाड़ देय। एने जाह वोर तो गेर बोंद रेय ताह वोर केदी एगदो गेराम जाय, ताहार तो हांज पोर वोर एठो रेय; केदी एगदो माणुह ता गेराम खाणो खाते नाहते ताम हुवेह, ताहार तो माणुह तान फाड़काह दोवे।
पुण गेराम नोवाला दिगोड़ एने गारो लागाड़नेन बाद चाकऱ्याह गेरान चोकसी केरने जुवे, केदी बेमारी गेराम नाह पोसरेल सोती, ताहार ज्य जाणीन काय ती बेमारी सेटी एय जायेल हे, ते गेराह चोखो ठेरावे। एने ता गेराह चोखालनेन केरता दुय चिड़ा, देवदारून लाकड़े, रातला रेंगान फाड़का एने जुफान रोप लावे, एने चाकर्यो एक चिड़ाह वोयताला पाण्यान उपेर माटड्यान ठामला माय बोली किरे, तेवी चाकर्यो देवदारून लाकोड़, रातला रेंगान फाड़का, जुफान रोप एने जीवताला चिड़ाह न्या आखाह लेन बोली किरेल चिड़ान लुयीम एने वोयताला पाण्याम बुड़ीव देय, एने चाकर्यो ती लुयीह ता गेरा पोर सात वार सिड़के। इह केरीन चाकर्यो चिड़ान लुय एने वोयतालो पाणी एने जीवताला चिड़ा एने देवदारून लाकोड़ एने जुफान रोप एने रातला रेंगान फाड़कान द्वारा गेराह चोखो किरे; तेवी चाकर्यो जीवताला चिड़ाह गावान बाहेर चोवगानाम सोड़ देय; इह केरीन चाकर्यो गेरान केरता पासतावो किरे, तेवी गेर चोखो ठेराय।
आखी बातीन कोढ़ान बेमारी, एने खुवड़ो, फाड़का एने गेरान कोढ़, एने हुज, फुड़ा एने चोमेकण्या दोवल्या दागान बाराम, चोखो एने एठो ठेरावणेन हिक आपणेन नेम ज्योस हे। आखी बातीन कोढ़ान नेम ज्योस हे।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.