Nahali Bible
लेव्य 13
कुष्ठ रोगान बाराम नेम
ओवतो यहोवा मुसा एने हारूनाह केयो, जेवी एगदा माणहान सेरीर ने चामड़ा पोर हुज नाहते डामसो नाहते दोवल्या दाग रेती, केदी चामड़ा पोर कोढ़ान गेत देखाय, ताहार ताह हारून चाकऱ्या फाय नाहते तान सोरा जा चाकऱ्या हेते, ताम रेन एगदा फाय जाय। जेवी चाकर्यो तान चामड़ाह देखी, केदी जेखेम ने रोचका दोवल्या एय गीया एती एने जेखेम माणहान चामड़ा से वोदार देखाय, ताहार तो सोमजी जाय काय कोढ़ रोग हे; एने चाकर्यो ता माणहाह देखीन ताह एठो ठेरावे। पुण केदी तो दाग तान चामड़ा माय दोवल्या एय जातेह, पुण चामड़ान माय वोदार नाह देखाय, एने नाह ताहरी वाला रोचका दोवल्या एय गीया एती, ताहार चाकर्यो ता माणहाह सात दिह्यान केरता दिहरा माणहाह रेन आलेग केरी। एने हातवे दिह चाकर्यो ताह जाचे, केदी चाकर्यो देखी काय रोगा माय फारेक नाह पुड़ेल सोतो, एने तो चामड़ा पोर उंजु वोदार पोसरेल नाह सोतो ते चाकर्यो उंजु सात दिह्यान केरता ताह आलेग किरे। सात दिह बाद चाकर्यो ता माणहान पोशी जाच किरे, केदी देखाय काय रोग चामड़ा पोर पोसरेल नाय रेय, ते चाकर्यो ताह चोखो ठेरावे; काहाकाय तान चामड़ा माय पापड़ी हे; एने तो तान फाड़का दोवीन चोखो एय जाय। पुण केदी चाकर्यान ती जाचीन बाद जा माय तो चोखो ठेराय जायेल इतो, तो दाग तान चामड़ा पोर जुलूम पोसीर जाय, ताहार तो पोशो चाकऱ्याह देखाड़ने जाय; केदी चाकऱ्याह देखाय काय दाग चामड़ा माय पोसीर जायेल हे, ताहार चाकर्यो ताह एठो ठेरावे; काहाकाय तो कोढुस हे।
केदी कोढ़ रोगान गेत एगदा माणहान एय, ताहार तो चाकऱ्या फाय पोचाड़ाय जाय; एने चाकर्यो ताह देखी, एने केदी ती हुज तान चामड़ा माय दोवली रेय, एने तान वोजेसे रोचका बी दोवल्या एय गीया एती, एने ती हुज माय बिगेर चामड़ान माह रेय, ते चाकर्यो सोमजे काय तान चामड़ा माय जुनालो कोढ़ हे, तानकेरता तो ताह एठो ठेरावे; एने कोंडीन नाय मेली, काहाकाय तो एठो हे। केदी कोढ़ माणहान आखा सेरीरा पोर पोसीर जाय, तो कोढ़ ता माणहान चामड़ाह मुंडे रेन पाये वोर डाप लेय हे चाकऱ्याह देखानो, तेवी चाकर्यो देखी काय कोढ़ पुरा सेरीराह इह केरीन डापेल हे, काय ता माणहान पुरो सेरीरूस दोवल्यो एय जायेल हे, ते चाकर्यो ताह चोखालो ठेरावे। पुण जेवी ताम बिगेर चामड़ान जेखेम देखाय, तेवी तो एठो ठेराय। एने चाकर्यो बिगेर चामड़ावालो माहाह देखीन ताह एठो ठेरावे; काहाकाय तोहलो बिगेर चामड़ावालो माह एठोस रिथे; तो कोढ़ हे। पुण केदी तो माह पोशो दोवल्यो एय जाय, ताहार तो माणुह चाकऱ्या फाय जाय, एने चाकर्यो ता माणहाह जाचे, एने केदी तो रोग पोशो दोवल्यो एय गीयोय, ताहार चाकर्यो दुखाऱ्याह चोखो जाणे; तो चोखो हे।
उंजु केदी एगदान चामड़ा माय फुड़ा बोणीन हुदेर गीया एती, एने फोड़ान जागे दोवली हुज नाहते लाली लेन दोवल्यो दाग रेय, ताहार तो चाकऱ्याह देखाड़ी; एने चाकर्यो ती हुजीह देखी, एने केदी तो चामड़ा से वोदार देखाय, एने तान रोचका बी दोवल्या एय गीया एती, ताहार चाकर्यो ज्य जाणीन ता माणहाह एठो ठेरावे; काहाकाय तो कोढ़ान रोग हे जो फोड़ाम रेन फुटिन निकलेल हे। पुण केदी चाकर्यो देखी काय ताम दोवल्या रोचका नाह सोता, एने तो चामड़ा से वोदार नाह, एने तान चोमेक कोम एय जायेल हे, ते चाकर्यो ता माणहाह सात दिह वोर आलेग केरीन मेली; केदी तो रोग तुलबुखे वोर चामड़ा माय खेरीच पोसरी जाय, ताहार चाकर्यो ता माणहाह एठो ठेरावे; काहाकाय तो कोढ़ान बेमारी हे। पुण केदी तो दाग नाय पोसरे एने तान जागास पोर रेय, ताहार तो फोड़ान दाग हे; चाकर्यो ता माणहाह चोखो ठेरावे।
उंजु केदी एगदान चामड़ा माय हेलेगणेन जेखेम एय, एने ता हेलेगणेन जेखेम माय बिगेर चामड़ान दाग रातला से दोवल्यो एय जाय, ते चाकर्यो ताह देखी, केदी ता दागान रोचका दोवल्या एय जायेल हेते, एने तो चामड़ा से वोदार देखाय, ताहार तो कोढ़ हे; जो ता हेलेगणेन डागाम रेन फुट निकलेल हे; चाकर्यो ता माणहाह एठो ठेरावे; काहाकाय ताम कोढ़ान रोग हे। पुण केदी चाकर्यो देखी काय डागाम दोवल्या रोचका एने नाह तो चामड़ा से थोड़ोक वोदार हे, एने तान चोमेक कोम इयेल हे, ताहार तो ताह सात दिह वोर आलेग मीले, एने हातवे दिह चाकर्यो ताह देखी, एने केदी तो चामड़ा माय पोसीर जायेल एय, ताहार तो ता माणहाह एठो ठेरावे; काहाकाय ताह कोढ़ान रोग हे। पुण केदी तो दाग चामड़ा माय नाह पोसऱ्यो एने तान जागास पोर जाहरी ताहरीस हे, एने तान चोमेक कोम इयेल हे, चाकर्यो ता माणहाह चोखो ठेरावे; काहाकाय ता दाग हेलेगणेन वोजेसे हे।
केदी एगदो एदमी एने बायकुन मुंडी पोर, नाहते एदम्यान दाड़ीम खुवड़ो रेय, ते चाकर्यो रोगाह देखी, एने केदी तो चामड़ा से वोदार देखाय, एने ता माय बोरला बारीक रोचका एती, ताहार चाकर्यो ता माणहाह एठो ठेरावे; तो रोग खुवड़ो, मतलब मुंडीन नाहते दाड़ीन कोढ़ हे। एने केदी चाकर्यो चामड़ान रोगाह देखी काय तो चामड़ा से वोदार नाह सोतो एने ताम काला रोचका नाह सोता, ताहार तो खोवड़ान दुखाऱ्याह हात दिह वोर आलेग मेली, एने सातवे दिह चाकर्यो दुखाऱ्याह देखी, तेवी केदी तो चामड़ान रोग पोसरेल नाय रेय, एने ताम पेल्ला रोचका नाय रेती, एने खुवड़ो चामड़ा से वोदार नाय देखाय, ताहार तो माणुह लेट्या काट लेणे जुवी, पुण जाहरी खुवड़ो रेय ताहरी काटाय नाय जाय; एने चाकर्यो ता चामड़ान रोगवालाह उंजु बी सात दिह वोर आलेग किरे; एने सातवे दिह चाकर्यो दादाह देखी, केदी तो खुवड़ो चामड़ा माय पोसरेल नाय रेन एने चामड़ा से वोदार नाय देखाय, ताहार चाकर्यो ता माणहाह चोखो ठेरावे; एने तो तान फाड़का दोवीन चोखो एय जाय। पुण केदी तान चोखो ठेराणेन बाद खुवड़ो चामड़ा माय काय बी पोसरे, ताहार चाकर्यो ताह देखी, एने केदी तो चामड़ा माय पोसरेल रेय, ताहार चाकर्यो बोरला रोचका नाय होदे; काहाकाय तो माणुह एठो हे। पुण केदी तान नेजरीम तो दाद जोहलो तोहलोच बोणीन रेय, एने ताम काल्ला रोचका जोम रेनाह, ताहार तो जाणे काय खुवड़ो हुदेर जायेल हे, एने तो माणुह चोखो हे; चाकर्यो ताह चोखोस ठेरावे।
उंजु केदी एगदो एदमी नाहते बायकुन चामड़ा माय दोवल्या दाग एती, ताहार चाकर्यो देखी, एने केदी तान चामड़ा माय ता दाग कोम दोवल्या एती, ताहार तो जाणे काय ताह चामड़ा माय निकलेल खुवड़ो हे; तो माणुह चोखो हे।
केदी एगदान मुंडीन लेट्या ओदरी जायेल हेते, ते जाणज्यो काय तो चांदरो ते हे पुण चोखो हे। एने जान निंडालान ओंगाणल्या लेट्या ओदीर गीया एती, ताहार तो निंडालान चांदरो ते हे, पुण चोखो हे। केदी चांदरा मुंडी पोर नाहते चांदरा निंडाला पोर रातलान गेत दोवल्यो रोग एय, ताहार जाणज्यो काय तो तान चांदरो मुंड नाहते चांदरा निंडाला पोर निकलेल कोढ़ हे। केरीन चाकर्यो ताह देखी, एने केदी दुखार्यान हुज तान चांदरा मुंड नाहते चांदरा निंडाला पोर रातलान गेत दोवल्यी रेय, जीहे चामड़ा माय कोढ़ाम रिथे, ताहार तो माणुह कोढ़ी हे एने एठो हे; एने चाकर्यो ताह जोरेवरी एठो ठेरावे; काहाकाय ती बेमारी तान मुंडी पोर हे।
जा माय तो दुखाऱ्यो रेय ता कोढ़ीन फाड़का फाटेल एने मुंडीन लेट्या वेरायेल रेती, एने तो तान ओठाह डापीन एठो, एठो आतड्या किरे। जोला दिह वोर तो दुखाऱ्यो ताम रेय, तोला दिह वोर तो एठो रेय, एने तो एठो ठेरीन रेय; केरीन तो एखालोच रेया किरे, तान पाड़ावान बाहेर रेय।
फाड़का नाहते चामड़ान चिजीन कोढ़
ओवतो जा फाड़काम कोढ़ान बेमारी रेय, केदी तो फाड़को रोचकान रेय नाहते होणीन, ती बेमारी केदी ता होणीन नाहते रोचकान फाड़कान टुकड़ा माय नाहते ती बेमारी चामड़ा माय नाहते चामड़ान बोणेल एगदी चिजी माय रेय, केदी फाड़का, चामड़ान टुकड़ा नाहते एगदा चामड़ान वोस्तु माय खास जागे निल्लो नाहते रातलो देखाय, ताहार ज्यो एठो दाग हे एने ज्याह चाकऱ्याह देखाड़ने जुवे। एने चाकर्यो दागान जाच केरी, एने बेमारीवाली चिजीह सात दिह्यान केरता आलेग जागे मेली; एने सातवे दिह चाकर्यो ता दुखाऱ्याह देखी, केदी तो फाड़कान टुकड़ा नाहते चामड़ा माय नाहते चामड़ान बोणेल एगदी चिजी माय पोसीर गीयीय, ते जाणज्यो काय दाग नुकसान केरनार कोढ़ हे, केरीन ती चिज काल्ला बी कामाम काहा नाय आवी, तीबी एठो ठेराय। तो ता फाड़काह जान टुकड़ा माय ती बेमारी एय, केदी ती रोचकान रेय केदी होणीन नाहते चामड़ान चिजीन रेय, ताह हेलगाड़ देय, ती बेमारी नुकसान केरनार कोढ़ान हे; ती चिज आक्ठाम हेलगाड़ाय जाय।
केदी चाकर्यो देखी काय ती बेमारी ता फाड़कान टुकड़ा माय, नाहते चामड़ान ती चिजीम नाह पोसर्यी, ताहार जी चिजीम रोग एय ताह दोवणेन उकुम आपी, तेवी चाकऱ्यो ताह उंजु बी सात दिह वोर आलेग मेली; एने ताह दोवणेन बाद चाकर्यो ताह देखी, एने केदी बेमारी नाहते रेंग बोदलेल एय, एने नाह बेमारी पोसरेल एय, ताहार जाणज्यो काय तो एठो हे; ताह आक्ठाम हेलगाड़ज्यो, काहाकाय केदी ती बेमारी माय केदी उपेर एय तीबी ती पोसेरनार बेमारी हे। पुण केदी चाकर्यो देखी काय ताह दोवणेन बाद बेमारीन चोमेक कोम एय गियी, ताहार तो ताह फाड़कान टुकड़ा माय नाहते चामड़ान ती चिजी माय देखाय, ताहार जाणज्यो काय तो फाड़ीन निकलेह; पुण दाग ता चामड़ा नाहते फाड़का पोर देखाय सिकेह, केदी ओहलो ईथे ताहार दाग वोदणे बाजरेनीह; ता चामड़ाह नाहते फाड़काह हेलगाड़ देणे जुवे। केदी ता फाड़कान टुकड़ा माय दाग एय, नाहते चामड़ान जी वोस्तु हे, ताह दोवणेन बाद दाग निकेल जाय, ते तो पोशो दोवाय जाय एने चोखो ठेराय।
रोचकान एने होणीन फाड़कान टुकड़ा माय, नाहते चामड़ान एगदी वोस्तु माय जो कोढ़ ने दाग हे, तान चोखो एने एठो एणेन नेम ज्योस हे।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.