Nahali Bible
लेव्य 11
हाजाला एने बाकताला जेनवेर
(व्यवस्था 14:3-21)
ओवतो यहोवा मुसाह एने हारूनाह केयो, इस्राएल ने माणहाह किवो, जोला जेनवारे देरती पोर हेते, ता आखा माय रेन तुमू न्या जेनवेरान माह खाय सेकतेह। जेनवारा माय रेन जोला चिरायेल नाहते फाटेल खुर्यान रेतेह एने वेगेलतेह, ताह खाय सेकतेह। पुण वेगेलनारे नाहते फाटेल खुर्यावाला माय रेन न्या जेनवाराह मा खाहो, मतलब उटड़ो, जो वेगोल ते किरेह, पुण चिरायेल खुर्यान नाह रेत, तानकेरता तो तुमरी केरता एठो ठेरायेल हे। एने खोकेवड़ो, जो वेगोल ते किरेह पुण चिरायेल खुर्यान नाह रेत, तो बी तुमरी केरता एठो हे। एने हुहल्यो जो वेगोल ते किरेह पुण चिरायेल खुर्यान नाह रेत, केरीन तो बी तुमरी केरता एठो हे। एने हुवोर, जो चिरायेल खुर्यान रिथे पुण वेगोल नाह किरेत, तानकेरता तो तुमरी केरता एठो हे। न्यान माहाम रेन कायच मा खाहो, एने न्यान देड़ाह आथेलहो बी मा; ज्या ते तुमरी केरता एठा हेते।
पोशा जोला पाण्यावाला जीव हेते ताम रेन तुमू न्याह खाय सेकतेह, मतलब देरीयो नाहते नेदीन पाण्यावाला जीवजेन्तु माय रेन जोलान फाके एने खोपण्या रेतेह ताह खाय सेकतेह। एने पाण्यावाला जेनवाराम रेन जोला जीवदारी बिगेर फाकान एने खोपण्या वाला देरीयो नाहते नेदीम रेतेह, ता आखा तुमरी केरता खाराब हेते। ता तुमरी केरता खाराब ठेराना; तुमू तान माहाम रेन कायच मा खाहो, एने तान देड़ाह बी एठा जाणज्यो। पाण्याम एगदान जेन्तुन फाके एने खोपण्या नाह रेते, ता तुमरी केरता एठा हेते।
ओवता चिड़ा माय रेन न्याह एठा जाणज्यो, ज्या एठा बोणनेन वोजेसे खावाय नाय जाती, मतलब गरूड़, दाड़ी वालो गिदड़, काल्लो गुवड़ो, रातलो चिड़ो, एने बात बातीन काल्ला गुवड़ा, एने आखी बातीन कागला, शहतुर्मुर्ग, तहमास, कारा, एने बात बातीन डिंडो, डुडो, बोगल्यो, गुगदो, राजहंस, दनेश, गीद, सारस, बातीन बोगल्या, टिटेवड़ो एने वोट वागलो।
जोला फाकावाला किड़ा चार पायान बोरहे चालतेह ता आखा तुमरी केरता एठा हेते। पुण लोलनारे किड़ा एने फाकावाला जा चार पायान बोरहे चालतेह, जान बुय पोर कुदणे टांगड्या रेतेह ताह ते खाय सेकतेह, ता ज्या हेते, मतलब बात बातीन टिड्या, बुबला, मुत्रा, टिड्या पुण आखा लोलनारे एने फाकावाला बुमणावा जा चार पायावाला रेतेह ता तुमरी केरता एठा हेते।
न्यान वोजेसे तुमू एठा ठेराहो; एगदा फाय रेन न्यान देड़ सापलाय जाय तो हांज पोर वोर एठो ठेराय। एने जो कुण न्यान देड़ावालो काय बी विसे तो तान फाड़का दोवे एने हांज पोर वोर एठो रेय। ओवता जोला जेनवारे चिरायेल खुर्यान रेतेह, पुण नाह फाटेल खुर्यान एने नाह वेगोल केरनारे हेते, ता तुमरी केरता एठा हेते; जो कुण ताह सापले तो एठो ठेराय। एने चार पायान बोरहे चालनार जेन्तुम रेन जोला तेलसान बोरहे चालतेह ता आखा तुमरी केरता एठा हेते; जो कुण तान देड़ आथले तो हांज पोर वोर एठो रेय। एने जो कुण तान देड़ विसी तो तान फाड़का दोवे एने हांज पोर वोर एठो रेय; काहाकाय ता तुमरी केरता एठा हेते।
जा देरती पोर लोलतेह ताम रेन ज्या लोलनारे जेन्तु तुमरी केरता एठा हेते, मतलब नोवल्यो, उंदर्यो, एने बात बातीन गेरफेड़ो, एने हेयड्यो, मुगोर, गिरवलो, सांडा एने आलहेयड्यो। आखा लोलनारा जेन्तु माय रेन ज्यास तुमरी केरता एठा हेते; जो कुण न्यान देड़ आथले तो हांज पोर वोर एठो रेय। एने न्याम रेन एगदान देड़ एगदी चिजी पोर पोड़ जाय ती बी एठी ठेराय, केदी तो लाकड़ान एगदो ठामलो एय, केदी फाड़का, केदी चामड़ो, केदी दुख माणावणेन फाड़का, केदी एगदा कामान कोहलोक बी ठामलो सोब काहा नाय रेय; तो पाण्याम टाकाय जाय, एने हांज पोर वोर एठो रेय, तेवी चोखो सोमजाय जाय। एने केदी माटड्यान एगदो ठामलो रेय, जा माय न्या जेन्तुम रेन एगदो पोड़ी, ताहार ता ठामलाम जो काय एय तो एठो ठेराय, एने ठामलाह तुमू फोड़ दिज्यो। केदी एठा ठामलान पाणी एगदा खाणा पोर पोड़ी, ताहार खाणो एठो एय जाय; केदी ओहला ठामलाम पिणेन केरता काह एय, ताहार तो बी एठो ठेराय। एने केदी मुरेल खाराब जेनवारान एगदो ईसो एगदी चिजी पोर आव पोड़ी, ताहार ती चिज चोखी नाय रेय, तीह टुकड़ा टुकड़ा केर देणे जुवे; केदी तो तंदूर एय केदी केड़ाय, ता तुमरी केरता जेलेम एठी रेय। पुण जिर नाहते तेलो जा माय पाणी एकठो रेय, तो ते चोखोच रेय; पुण जो कुण न्यान देड़ाह सापली तो एठो ठेराय। केदी ता मुरेल जेनवारान एगदो ईसो पेरन्या बियारा पोर आव पोड़ी, तीबी तो बियारो चोखो रेय; पुण बिजाड़णेन केरता केदी तुमू थोड़ाक बियारा पोर पाणी टाकतेह, एने तेवी केदी मुरेल जेनवारान एगदो ईसो ता बियारा पोर आव पोड़ी, ताहार तो बियारो तुमरी केरता एठो हे।
“उंजु जा पालन्या जेनवाराह खाणेन उकुम तुमूह आपेल हे, केदी ताम रेन एगदो जेनवार मोरी, ताहार जो कुण तान देड़ाह सापली, तो हांज पोर वोर एठो रेय। एने तान देड़ा माय रेन जो कुण काह खाय तो तान फाड़का दोवे, एने हांज पोर वोर एठो रेय, एने जो कुण तान देड़ विसी तो बी तान फाड़का दोवे एने हांज पोर वोर एठो रेय।
“आखी बातीन देरती पोर लोलनारे जेन्तु हेते; ता खावाती नाय। देरती पोर आखा लोलनारे जेन्तु माय रेन जोला पेटान एने चार पायान बोरहे चालतेह, एने वोदार पायावाला रेतेह, ताह तुमू मा खाहो; काहाकाय ता खाराब हेते। तुमू काल्ली बातीन लोलनारा जेन्तुन द्वारा सोताह खाराब मा किरहो; एने नाह तान द्वारा सोताह खाराब केरीन एठा ठेराज्यो। काहाकाय मी तुमरो बोगवान यहोवा हे; केरीन सोताह चोखो केरीन चोखा बोणीन रिवो, काहाकाय मी चोखो हे। तानकेरता तुमू काल्ली बातीन लोलनारे जेन्तुन द्वारा जो देरती पोर चालेह, सोताह एठा मा किरहो। काहाकाय मी तो यहोवा हे, जो तुमूह मिस्र देसाम रेन ज्यानकेरता निकाल लायेल हे काय तुमरो बोगवान ठेराव; केरीन तुमू चोखाला बोणो, काहाकाय मी चोखालो हे।”
जेनवारे, चिड़ा एने आखा पाण्यावाला जेनवारे, एने देरती पोर आखा लोलनारे जेनवारान बाराम ज्योस नेम हे, काय माणहे हाजाला जेनवारे एने खाराब जेनवारा माय फारेक केर सेकती, इह केरीन माणहे जाणती काय काल्लो जेनवार खाणेन लायकी हे एने काल्लो खाणेन लायकी नाह सोतो।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.