Nahali Bible
लेव्य 10
नादाब एने अबीहुन पाप
तेवी नादाब एने अबीहु नावान हारूनान दुय सोरा तान तान दुपदान1 लेदा, एने ताम आक्ठो बोऱ्या, एने ताम हालयान ढिक टाकीन आलेगुच आक्ठाह जान उकुम यहोवा नाह आपेल इतो, यहोवान सामने बोली केऱ्या। तेवी यहोवान आहने रेन आक्ठो निकेलनो एने ता दुयाह हेलगाड़ देनो, एने ता यहोवान सामने मोर गीया। तेवी मुसो हारूनाह केयो, “ज्यी तीस वात हे, जीह यहोवा कियेल इतो काय जो मार आहने आवी, जोरेवरी हे काय तो माहु चोखालो सोमजे, एने आखा माणहान सामने मारी बोड़ाय किरे।” एने हारून ठावकोस रिनो।
तेवी मुसो मीशाएल एने एलसाफनाह जा हारूनान आजालोख उज्जीएल ने सोरा एता हादिन केयो, “आहने आवो, एने तान बोतेरजाख चोखाला जागान सामने रेन विसीन पाड़ावान बाहेर ली जावो।” मुसान ज्या उकुमान गेत ता आहने जायीन ताह फाड़का बेल विसीन पाड़ावान बाहेर ली गीया। तेवी मुसो हारूनाह एने तान सोरा एलीआजर एने ईतामाराह केयो, “तुमू तुमरे मुंडान लेट्या मा वेरो, एने नाह तुमरा फाड़काह फाड़ो ओहलो नाय एय काय तुमू बी मोर जाहो, एने आखी मोंडली पोर तान राग बोड़ेक उठे; पुण तो इस्राएल ने आखा गेराणान माणहे जा तुमरा बायबोंद हेते, एने जा यहोवान लागाड़ेल आक्ठा केरीन हेलगी गीया तान केरता दुख मोणावो। एने तुमू मिलापवाला तोम्बुन बायणान बाहेर मा जाहो, ओहलो नाय एय काय तुमू मोर जावो; काहाकाय यहोवान अबिषेकान तेल तुमरी पोर लागेल हे।” मुसान ज्या वचनान गेत ता केऱ्या।
चाकर्यान केरता नेम
ओवतो यहोवा बोगवान हारूनाह केयो, “जाह वोर तु नाहते तारा सोरा मिलापवाला तोम्बुम आवती, तेवी तुमरे माय रेन कुण बी अंगुरान दारो पियेल रेय एने नाह काल्ली बातीन मद्य। केदी ओहलो नाय एय काय तुमू मोर जावो; तुमरी पिढ़ी पिढ़ीम ज्यो नेम चालते रेय, जा केरीन तुमू चोखालो एने एठाम, एने हाजालो एने खाराब माय फारेक केर सीको। एने इस्राएल ने माणहाह ता आखा नेमाह हिकाड़ सिकहो, जाह यहोवा मुसान द्वारा ताह केय दियेल हे।”
ओवतो मुसो हारूनाह एने तान वोचेल दुयू सोरा एलीआजर एने ईतामाराह बी केयो, “यहोवान आक्ठाम हेलगाड़ेल बोली माय रेन जो एन बेट वुचेल हे, ताह लेन तुमू वेदीन आहने बिगेर खमीर बेचकेल खावो, काहाकाय ती बेट जुलूम हाजी हे। एने तुमू ताह एगदा चोखाला जागाम खावो, तो यहोवाह आक्ठान द्वारा हेलगाड़ेल बोली माय रेन तारो एने तारा सोरान होक हे; काहाकाय मी ओहलोस उकुम सापड़ायेल हे। पुण आलाड़ेल बेटीन साती एने विसेल बेटीन जांगीह तुमू, मतलब तु एने तारा बेटा बेट्युख आखा एगदा हाजाला जागाम खावो; काहाकाय ता इस्राएलीन मेल मिलाप बोली माय रेन तुवाह एने तारा सोरान होक ठेराव दियेल हे। माणहाह तान जेनवेरान चेरबी आक्ठाम हेलगाड़न्यी बोलीन रूप माय लावणे जुवे, ताह मेल मिलाप बोलीन जांग एने आलाड़ेल साती यहोवान सामने आलाड़नेन केरता आया केरी; ज्या ईसा यहोवान उकुमान गेत जेलेम ने विदीन नेमा केरीन तारा एने तारा सोरान केरता हे।”
ओवतो मुसो पापबोलीन बोकड़ाह हुद्यो, ते काय दिख्यो काय तो हेलगाड़ाय जायेल हे। तानकेरता एलीआजर एने ईतामार जा हारूनान सोरा वोचेल एता, ताह तो रागा माय आवीन केणे बाज गीयो, “पापबोली जी चोखाली हे एने जाह यहोवा तुमूह ज्यानकेरता आपेल हे काय तुमू मोंडलीन गुनान बार तुमरी पोर विसीन तानकेरता यहोवान सामने पाप डापे, तुमू तान माह चोखाला जागाम काहा नाह खादा? दिखो, बोकड़ान लुय चोखाला जागान मायता नाह लावा, तुमूह ज्या बोकड़ाह चोखाला जागा पोर खाणु एतो, जिह केरीन मी उकुम आपेल हे।” 2
ज्यान जापाप हारून मुसाह इहकेरीन आप्यो; “देख, आजुस ता तान पापबोली एने होमबोलीह यहोवान सामने चेड़ाया; ओवती मार पोर ओहली पिड़ा आव पुड़ेल हे! केरीन केदी मी आज पापबोलीन माह खातो, ताहार काय ज्यी वात यहोवान सामने हाजी रेती?” जेवी मुसो ज्य होमल्यो तेवी ताह ज्यी वात हाजी लागी।
Source notes (2)
- Footnote दुपदान आरतीन तेली
- Cross-reference 10:1-2; 17
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.