Nahali Bible
यहोशु 24
यहोशुन शकेम माणहान केरता सेवली हिकवोण
उवतो यहोशु इस्राएल ने आखा कुटूमाह शेकेम माय एकठा किऱ्यो, एने इस्राएल ने डावाला माणहे, एने मुखी एदमी, एने नियाव केरनारे, एने आदिकारीह हादाड्यो; एने ता बोगवानान सामने उब रेना। 1तेवी यहोशु ता आखा माणहाह केयो, “इस्राएल ने बोगवान यहोवा इहकेरीन किथे, जुनाला कालाम अब्राहाम एने नाहोरान आबोख तेरह आखा, तुमरा डायडाया फरात नेदीन ती पार रेते लेन दिहरा देवतान पुजा केरताला। 2एने मी तुमरो पेल्लो एदमी अब्राहामाह फरात नेदीन ती पार रेन लियावीन कनान देसान आखा जागाम फिरायो, एने तान वोच वोड़ायो। एने ताह इसाहाकाह आप्यो; 3ओवतो मी इसाहाकाह याकुब एने एसाव आप्यो। एने एसावाह मी सेईर नावान बोयड़ावालो ईलाको आप्यो काय तो तान आदिकारी एय जाय, पुण याकुब एने तान सोरा मिस्र देसाम जात रेना। 4ओवतो मी मुसा एने हारूनाह मुकल्यो, एने मिस्र माय मारा कामान द्वारा मिस्री माणहा पोर पिड़ा टाक्यो। बाद माय मी तुमूह तारेन निकाल लावो। 5इह केरीन मी तुमरा डायडायाह मिस्र देसाम रेन बाहेर निकाल लावो, ता देरीयान आहने पोचना; तेवी मिस्री माणहे टांगा एने गोड़ाह लेन रातला देरीये वोर तुमरा डायडायान पासाण पोड़ना। एने जेवी तुमू यहोवाह विन्ता केऱ्या तेवी तो तुमरे एने मिस्रीन विचीम आंदारो केर दिनो, एने ता पोर देरीयाह वोयाड़ीन ताह बुड़ाव दिनो; एने जो काय मी मिस्र देसाम किऱ्यो ताह तुमू तुमरा डोला केरीन देख्या।”
“ओवता तुमू जुलूम दिह वोर जेंगलाम रेना। 6तेवी मी तुमूह ता एमोरीन देसाम लेन आवो, जा यरदन नेदीन ती पार रेताला; एने ता तुमू हेऱ्या लेड़ाना एने मी ताह तुमरे ताबाम केर दिनो, एने तुमू तान देसान आदिकारी एय गीया, एने मी ताह तुमरे सामने खेतेम केर दिनो। 7ओवतो मोआब ने राजा सिप्पोर ने बिटोख बालाक उठीन इस्राएल हिऱ्यो लेड़ानो; एने तुमूह हाराप आपणेन केरता बोरान बिटोख बिलामाह हादाड्या। पुण मी बिलाम ने नाह होमल्यो; तो तुमूह बोरकेत ने बोरकेत देते गीयो; इहकेरीन मी तुमूह तान आथाम रेन वोचाड्यो। 8ओवता तुमू यरदन नेदी पार केरीन यरीहोम आवा, एने जेवी यरीहोन माणहे, एमोरी, परिज्जी, कनानी, हित्ती, गिर्गाशी, हिव्वी, एने यबूसी तुमरी हेऱ्या लेड़ाना, तेवी मी ताह तुमरे ताबाम केर दिनो। 9जेवी तुमरी सेना ओंगाण वोड़नी ते मी तान ओंगाण गेंडरा मुकल्यो, ज्या गेंड्रान टोला एमोरीन दुयू राजाह तुमरे सामने रेन नाहाड़ देना; केरीन तुमू तुमर्यु तालवार्यु एने दोंदल्युन वापेर केऱ्या बिगेर तान उपेर आदिकार केर लेदा। 10ओवतो मी तुमूह ओहलो देस आप्यो जा माय तुमू मेहनेत नाह किरेल एता, एने ओहला गावे बी आपेल हे जाह तुमूह बाणावणे नाह पोड़नो, एवी तुमू ता देसाम एने ता गावाम रेतेह; एने जा अंगुरान रूह एने जेतुनान बोगीचान फोल तुमू खातेह ताह तुमू नाह लागाड्या।”
“केरीन, एवी यहोवान बिय मानो, एने तान सेवा पुरी रिती से एने खेराय माय किरो; एने जा देवतान सेवा तुमरा डायडाया मोठली नेदीन ती पार एने मिस्र माय केरताला, ताह सेटा केरीन यहोवान सेवा किरो। एने केदी यहोवान सेवा केरने तुमूह खाराब लागे, ताहार आज निवाड़ लिवो काय तुमू कुणीन सेवा किरहो, ता देवतान जान सेवा तुमरा डायडाया मोठली नेदीन ती पार केरताला, नाहते एमोरीन देवतान जान देसाम तुमू रेतेह, पुण मी एने मारा गेरान माणहे आमु बोगवानान सेवा केरहु।”
तेवी माणहे जापाप आप्या, “ओहलो केदी नाय एय काय आमु बोगवानाह सोड़ीन दिहरा देवतान सेवा केरी; काहाकाय आपणो बोगवान यहोवा तोस हे, जो आपुह एने आपणा डायडायाह गुलामीन गेराम रेन बाहेर निकाल लावो, मतलब मिस्र देसाम रेन निकाल लावो, एने जो आपणे देखता मोटला मोटला चोमेत्कार किऱ्यो; एने जी वाटी पोर एने जा जा माणहान देसाम लागता निकल्या ताम आपणी राखवाल किऱ्यो। एने आमरे सामने रेन ज्या देसाम रेणार एमोरी आख्यु जात्युह निकाल दियेल हे; केरीन आमु बी यहोवान सेवा केरहु, काहाकाय आपणो बोगवान तोस हे।”
यहोशु माणहाह केयो, “तुमूह यहोवान सेवा नाय एय सेकी; काहाकाय तो चोखालो बोगवान हे; तो राग केरनार बोगवान हे; तो तुमरा गुना एने पाप माफ नाय केरी। केदी तुमू यहोवाह सोड़ीन दिहरा देवतान सेवा केरने बाज जाहो, ताहार तो तुमरो हाजो केरते आयेल हे तीबी तो फिरीन तुमरो बाकतो केरी एने तुमूह खेतेम बी केर देय।”
माणहे यहोशुह केया, “नाह; आमु बोगवानास ने सेवा केरहु।”
यहोशु माणहाह केयो, “तुमू सोतास तुमरा गोवा हेते काय तुमू बोगवानान सेवा केरने निवाड़ लियेल हेते।”
माणहे केया, “होव, आमु गोवा हेते।”
तेवी यहोशु केयो, “तुमरे विचीम रेन दिहरा देवताह सेटा केरीन आप आपणो मोन इस्राएल ने बोगवान यहोवान उगे लागाड़ो।”
तेवी माणहे यहोशुह केया, “आमु ते आपणो बोगवान यहोवास ने सेवा केरहु, एने तास ने वात मानहु।”
तेवी यहोशु ते दिहस माणहा हिऱ्यो वाचा बांदाड्यो, एने शेकेम माय तानकेरता नेम ठेरायो। एने यहोशु न्या वचनाह बोगवानान नेमान पुस्तेक माय लेख दिनो, एने एक मोटलो दिगोड़ लेन ता वांज जाड़ान11 बुंदे उब राखाड्यो जो यहोवान चोखाला जागाम इतो। तेवी यहोशु आखा माणहाह केयो, “हुमलो, ज्यो दिगोड़ आपणो गोवा रेय, काहाकाय जोला वचन यहोवा आपुह कियेल हे ताह ज्यो होमलेल हे; केरीन ज्यो तुमरो गोवा रेय, काय तुमू तुमरा बोगवानान बाराम लाबाड़ी नाय केरी।” तेवी यहोशु माणहाह आप आपणा सोतान ईसा पोर जाणेन केरता वाटे लागाड्यो।
यहोशु एने एलीआजर ने मोरनो
ज्यु वातुन बाद यहोवान सेवक, नुन ने बिटोख यहोशु, एक होव दोह वोरह्यान एन मोर गीयो। 12तेवी यहोशुह तीम्नातसेरह माय, जो एप्रेमान बोयड़ावाला देसाम गाश नावान बोयड़ान उत्तर माय हे, तास ने ईसाम बुज्या।
एने यहोशुन जीवाय बोर, एने जा डावाला माणहे यहोशुन मोरनेन बाद जीवताला रेना एने जाणताला काय यहोवा इस्राएल ने केरता कोहला कोहला काम किरेल इतो, तान बी जीवाय बोर इस्राएल ने माणहे यहोवास ने सेवा किरते रेना। 13
ओवता युसूफान आड़े जाह इस्राएली मिस्र रेन लेन आयेल एता ता शेकेमान बुयीन ता ईसाम गाड़ाय गीया, जाह याकुब शेकेमान आबोख हमोरान बेटाख फाय रेन एक होव चांदीन सिक्काम वेचातो लियेल इतो; केरीन तो युसूफान सोरान सोतान ईसो एय गीयो।
एने हारूनान बिटोख एलीआजर बी मोर गीयो; एने ताह एप्रेमान बोयड़ावाला देस गिबा गावाम बुज्या, जो तान बेटाख पिनहासाह आपायेल एतो।
Source notes (13)
- Cross-reference उत्पत्ती 11:27
- Cross-reference उत्पत्ती 12:1-9; 21:1-3
- Cross-reference उत्पत्ती 25:24-26; 36:8; 46:1-7; व्यवस्था 2:5
- Cross-reference निर्गमन 3:1; 12:42
- Cross-reference निर्गमन 14:1-31
- Cross-reference गिनती 21:21-35
- Cross-reference गिनती 22:1; 24:25
- Cross-reference यहोशु 3:14-17; 6:1-21
- Cross-reference निर्गमन 23:28; व्यवस्था 7:20
- Cross-reference व्यवस्था 6:10-11
- Footnote वांज जाड़ान ओक नावान जाड़
- Cross-reference यहोशु 19:49-50
- Cross-reference उत्पत्ती 33:19; 50:24-25; निर्गमन 13:19; योहान 4:5; प्रेरितान काम 7:16
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.