Nahali Bible
एस्तेर 1
वशती राणी राजान वात नाह मानने
क्षयर्ष नावान राजान काला माय ज्यु वातु एन्यु: ज्यो तोच क्षयर्ष हे, जो एक होव सत्तावीस ईलाका पोर, मतलब भारत रेन कुश देस1 वोर राज केरतालो। 2 राजा क्षयर्ष ने राज कालान राजदानी शूशन किल्लो इतो, एने ता राजगादी पोर बोहीन राज केरतालो।
ताहरी तो तान राज ने कालाम तीसरा वोरह्या माय तान सोब आदिकारीह एने काम केरनाराह नेवता आप्यो। फारस एने मादे देसान सेनापोती एने ईलाका ईलाकान मुखी एने आदिकारी तान सोमोर उपस्थित एता। तो ताह सोव मोयना वोर तान राज ने हाजालो मालदेन एने हाज हाज्यु मोंगाल्यु वोस्तु देखाड़ती रिनो।
ता दिह्याह जाणेन पासाण राजा आखा आतल्या मोटला माणहाह बी जा शूशन नावान राज किल्ला माय टोलवाईल एता, एने राजवाड़ान बोगीचा माय सात दिह वोर खाणो आप्यो। ताहरी वाला पोड़दा दोवल्या एने निल्ला हुतान एता, एने होण एने जामण्या रेंगान दोयड्यु केरीन चांदीन सेल्ल्या माय संगमरमर देगड़ान खांबाह लागाड़ मिलेल एता; एने ताहरी वाला पाटला होना चांदीन एता; रातला एने दोवल्या एने पेल्ला एने काल्ला संगमरमर बुणेल फोरची पोर मिलेल एती। ता खाणा माय राजान लायकीन अंगुरान रूह बात बातीन होनान ठामला माय टाकीन पिवाड़ाय जातालो। पिणे ते नेमान पारमाणे एतालो, काहाकाय राजा ते तान गेरान सोब काम केरनाराह उकुम आपेल इतो, काय जा पावणान जोहली मोरजी तोहलीच चाकरी किरज्यो।
राणी वशती बी राजा क्षयर्षान गेरा माय बायकुह खाणो आपी।
सातवे दिह, जेवी राजान मोन अंगुरान रूहा माय लागीन एतो, तेवी तो महूमान, बिजता, हर्बोना, बिगता, अबगता, जेतेर एने कर्कश नावान सातो मुखी खोजाह जा क्षयर्ष राजान सेवा केऱ्या केरताला, उकुम आप्यो, काय राणी वशतीह राजमुकुट पेरावीन राजान सोमोर लेन आवो; जा माय काय देस देसान माणहे एने आदिकारी पोर तीन सुंदरता देखाय पुड़े; काहाकाय ती देखणे माय गाटाली एती। मुखी खोजान उगे रेन राजान ज्यो उकुम लेन राणी वशती आवणेन नाकार केरी। केरीन राजा जुलूम रागा माय बोराय गीयो।
तेवी राजा टेमा टेमान वात जाणनारे कागल्याह फुशो राजा ते निती एने न्यायनिवाड़ान सोब ईकेलवाला हिऱ्यो ओहलोच केऱ्या केरतालो। ता फाय कर्शना, शेतार, अदमाता, तर्शीश, मेरेश, मर्सना, एने ममूकान नावान फारस एने मादे देसान सात मुखी एता, जा राजान देरसेन केरताला, एने राज्या माय मुखी मुखी पोदा पोर बोहाड़ाय जायेल एता। राजा फुशो, “राणी वशती राजा क्षयर्षान मुखी खोजा उगे रेन आपाय जाईल उकुमाह तोड़ी, ते कायदान गेत ती हेऱ्यो काय केराय जाय?”
तेवी ममूकान राजाह एने आदिकारीन एजुरी माय जापाप आप्यो, “राणी वशती जो खाराब काम किरेल हे, तो नाह निस्तो राजा हेऱ्योच, पुण सोब देसान माणहा हेऱ्यो बी जा राजा क्षयर्षान सोब ईलाका माय रेतेह।”
काहाकाय राणीन ज्या कामान चेरचा सोब बायकु माय एय, एने जेवी ज्य केवाय जाय, “राजा क्षयर्ष राणी वशतीह तान सोमोर लेन आवणेन उकुम आप्यो पुण ती नाह आवी, तेवी त्यु बी जिव जिवान एदम्याह खाराब सोमेजणे बाज जाती। आजीन दिह फारस एने मादि देसान आदिकारीन बायकु, त्यु राणीन ज्यी वातीन बाराम होमेलती, तेवी त्यु बी राजान आदिकाऱ्या हेऱ्यु इहीच केरीन केणे बाज जाती; इह केरीन जुलूमच नफरत एने राग आवी। केदी राजाह पुटे ते, ज्यो उकुम काड़े, एने फारसी एने मादि देसान कानुन माय लेखाय बी जाय, जा माय केदी बोदली नाय सिके, काय राणी वशती राजा क्षयर्षान सोमोर पोशी केदी आवणे नाय जुवे, एने राजा पटराणीन पोद एगदी दिहरीह आप देय ज्यी तिह रेन हाजी रेय। जेवी राजान ज्यो उकुम तान आखा राज माय होमलाड़ाय जाय, तेवी बायकु जान तान एदम्यान मान मेलती, केदी तो गेरीब एय नाहते मालदार।”
ज्यी सेला राजाह एने आदिकारीह पोटनी एने राजा ममूकान ने वात मान लिदो एने तान राज माय, मतलब आखा ईलाकान आक्षर माय आखी जातीन बाषा माय चिट्ठयु मोकल्यो, काय आखा एदमी जान तान गेरा माय आदिकार चालाड़ी, एने तान जातीन बाषा बोल्या केरी।
Source notes (2)
- Footnote कुश देस ज्यो कुश देस आज ने इथोपिया देस हे
- Cross-reference एज्रा 4:6
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.