Nahali Bible
यहोशु 16
एप्रेम एने मनश्शे गेराणाह आपेल ईसो
ओवतो चिट्ठी टाकणेन द्वारा युसूफान सोरान ईसान एद्दी यरीहो गावान आहनेवाली यरदन जिर रेन यरीहोन पुर्वान पाण्या केरीन सुरवात एन ता जेंगला निही एने यरीहो रेन बोयड़ावाला देसाम लागती, बेतेल वोर पोचनी; ओवती बेतेल गाव रेन ती लुज ने एद्दी वोर पोचनी, एने ओंगाण वोड़तेन अरकी जातीन एद्दी लागती अतारोत ने उगे जाय निकेलनी; एने पश्चिम ने उगे यपलेती जातीन एद्दी रेन उतरीन, पोशी बुंदेवाला बेथोरोनान एद्दी लागती गेजेर पोचनी, एने देरीयान दिड़े निवरी गियी।
तेवी मनश्शे एने एप्रेम नावान युसूफान दुयू सोरान सोरा आप आपणो ईसो लेदा।
एप्रेमान ईसो
एप्रेमान एद्दी तान गेराणान पारमाणे ज्यी ठेरानी; मतलब तान ईसान एद्दी पुर्व रेन सुरवात एन अत्रोतदार लागती उपेरल्या बेथोरोन वोर पोचनी; एने उत्तरवाली एद्दी पश्चिमान उगेवाला मीकमतात रेन सुरवात एन पुर्वान उगे वोलीन तानतशीलो पोचनी, एने तान आहने लागती यानोह गाव वोर पोचनी; पोशी यानोह रेन ती अतारोत एने नाराम उतेरते लेन यरीहो माय पोचणे एने यरदन नेदीम जाथे। ओवती तीस एद्दी तप्पुह रेन पश्चिमान उगे जायीन कानान खुदेर लागती देरीयाम निकेलनी; एप्रेमी माणहान गेराणान ईसो तान गेराणान पारमाणे ज्योस ठेरानो। एने ज्या हेऱ्या मनश्शेन ईसान विचीम एप्रेमी माणहान केरता आप आपणा गावा बेल थोड़ाक हियोर आलेग केराय गीया। 1पुण ता गेजेर माय रेणाराह कनानीह नाह निकाल्या, केरीन कनानी माणहे एप्रेमीन विचीम आज वोर रेणे बाजरेनाह, एने मोंजरीन काम केरतेह।
Source notes (1)
- Cross-reference न्यायियो 1:29
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.