Nahali Bible
यहोशु 15
यहुदान गेराणाह आपेल ईसो
यहुदिन गेराणान ईसो तान वोचीन पारमाणे चिट्ठी टाकणे से एदोमान एद्दी वोर, एने देक्षिणान उगे सीनान जेंगलाम वोर जो देक्षिणान एद्दी पोर हे ठेरानो। तान ईसान देक्षिण ने एद्दी खारा देरीयान देक्षिण ने सेवटे रेन सुरवात एताली। ज्यी एद्दी देक्षिणान उगे अक्रब्बीम ने चेड़ती रेन निकलीन सीन लागती कादेशबर्नेन देक्षिण वोर जायेल एती, ओवती हेस्रोन ने उगे जायीन अद्दार वोर पोचनी एने कर्कान उगे वोल गीयी। ता रेन अस्मोन लागती मिस्र देसान खोदरे वोर पोच गीयी, एने ती एद्दीन सेवेट देरीयान मीरे वोर एनी ज्यी तुमरी देक्षिण ने एद्दी रेय।
ओवती पेल्ली एद्दी खारा देरीयान देड़े रेन ता ईलाकाम वोर एती, जाहरी यरदन नेदी देरीयाम मिलाताली।
उत्तर ने एद्दी ता ईलाकाम रेन सुरवात एताली जाहरी यरदन नेदी खारा देरीयाम मिलाताली, तेवी उत्तर ने एद्दी बेथोगला रेन लागती एने बेतराबा वोर जात रियेल एती, ज्यी एद्दी रूबेन ने बिटोख बोहन नावान देगड़े वोर जायेल एती। एने तीस एद्दी आकोरान गाटे लागती दबीर वोर जायेल एती, ताहरी एद्दी उत्तर उगे वोलताली एने गीलगाल वोर जाताली; जी अदुम्मिम बोयड़ान सामने हे ती एद्दी देक्षिण उगे हे; ओवती ती एद्दी एनशेमेश नावान कुवान आहने पोचीन एनरोगेल माय निवरी गियी। ओवती ती एद्दी यबूसी हेयरान देक्षिणान उगे रेन बेन हिन्नोम बोयड़े रेन लागती जायेल एती, तो यबूसी हियोर यरूशलेम केवाय जातालो तान देक्षिणान उगे रेन वोड़ते लेन ता बोयड़ान चुटा पोर पोचनी, जी पश्चिमान उगे हिन्नोमान गाटान सामने एने रपाईम ने गाटान उत्तरवाला सेवटे हे; ओवती ती जागे रेन एद्दी नेप्तोहान पाण्यान जिरा हेऱ्यी जाताली, एने एद्दी एप्रोन बोयड़ान आहनेवाला हेयराम वोर जाताली, एने ता रेन बाला जो किर्यत्यारीम बी केवाथे पोचनी; ओवती बाला रेन एद्दी पश्चिन उगे वोलीन सेईर बोयड़े वोर एने उत्तर उगे यारीम बोयड़ान उतेरती मतलब कसालोन वोर पोचनी, ओवती बेतशेमेशान उगे उत्तर उगे तिम्ना लागती निकील गीयी। ओवती एद्दी एक्रोनान उत्तर लागती शिक्करोन ने उगे वोल गियी, एने बाला बोयड़े लागती यबनेल पोचनी एने एद्दी देरीयान दिड़े निवरी गियी। एने पश्चिम ने एद्दी मोटला देरीयान मिरो ठेरानो, यहुदा वोसीह जा ईसा तान गेराणान पारमाणे जुड़ना तान कावदेन वाली एद्दी ज्यीस एनी।
कालेबान हेब्रोन एने दबीरा पोर जिक
(न्यायियो 1:11-15)
यहोवा यहोशुह उकुम आपेल इतो काय तो यपुन्नेन बिटोख कालेबाह यहुदान जागाम रेन ईसो आपी, केरीन यहोशु कालेबाह तो हियोर आप्यो जान केरता बोगवान उकुम आपेल इतो, यहोशु ताह किर्यतर्बान हियोर आप्यो, जो हेब्रोन बी केवाथे। अर्बा अनाकान आबोख इतो। एने कालेब ता रेन शेशे, अहीमन, एने तल्मे नावान अनाकान तीनु सोराह निकाल दिनो। ओवतो ता रेन कालेब दबीर माय रेणारे माणहा हिऱ्यो लेड़ानो, पेल दबीरान नाव किर्यत्सेपेर एतो। एने कालेब केयो, “जो किर्यत्सेपेराह आरवी देय, ता हिऱ्यो मी मारी बेटीख अकसान वाराड़ केर देह।” तेवी कालेबान बाहख कनजीन बिटोख ओत्नीएल ता हेयराह आरीव दिनो; केरीन कालेब तान बेटीख अकसाह वाराड़ केर दिनो। जेवी ओत्नीएल अकसाह केयो काय तीन आबाख फाय थोड़ीक वोदार जागो मांगे, अकसा तीन आबाख फाय गियी; जेवी ती तीन गेदड़ा पोर रेन उतेरनी, तेवी कालेब तीह फुशो, “तुवाह काय जुवे?” अकसा केयी, “माहु बोरकेत आप; माहु पाण्यावालो जागो जुवे, जो जागो आमुह तु नेगेब माय आपेल हे, ती जुलूम हुकेल हे, केरीन माहु ओहलो जागो आप जा माय पाण्यान कुवा एती।” तेवी कालेब उपेरल्या एने नेचाला कुवा बेल जागो आप्यो।
यहुदा गेराणान गाव
यहुदान कुटूमान ईसो तान वोचीन पारमाणे ज्योस इतो। यहुदा गेराणान देड़ेवाला जा हियोर देक्षिण देसाम एदोमान एद्दीन उगे एता, ता ज्या हेते, कबसेल, एदेर, यागुर, किना, दिमोना, अदादा, केदेश, हासोर, यित्नान, जीप, तेलेम, बालोत, हासोरहदत्ता, करियोत हेस्रोन मतलब हासोर, एने अमाम, शेमा, मोलादा, हसरगद्दा, हेशमोन, बेत्पालेत, हसरशुआल, बेर्शेबा, बिज्योत्या, बाला, इय्यीम, एसेम, एलतोलद, कसील, होर्मा, सीकलग, मदमन्ना, सनसन्ना, लबाओत, शिल्हीम, ऐन, एने रिम्मोन; ज्या आखा हियोर एकोनतीस हेते, एने तान गाव बी हे।
बुंदेवाला देसाम ज्या हेते, मतलब एश्ताओल, सोरा, अशना, जानोह, एनगन्नीम, तप्पुह, एनाम, यर्मुत, अदुल्लाम, सोको, अजेका, शारेम, अदितेम, गदेरा, एने गदेरोतेम; ज्या आखा चोवदा हियोर हेते, एने तान गाव बी हेते।
ओवतो सनान, हदाशा, मिगदलगाद, दिलान, मिस्पे, योक्तेल, लाकीश, बोस्कत, एग्लोन, कब्बोन, लहमास, कितलीश, गेदेरोत, बेतदागोन, नामाह, एने मक्केदा; ज्या सोला हियोर हेते, एने तान गाव बी हेते।
ओवतो, लीबना, एतेर, आशान, यिप्ताह, अशना, नसीब, किला, अकजीब एने मारेशा; ज्या नोव हियोर हेते, एने तान गाव बी हेते।
ओवतो हेयरे एने गावा बेल एक्रोन, ता एक्रोन ने आहनेवाला एने पश्चिमान अश्दोद ने उगेवाला हियोर बी सापड़ाया।
ओवता आप आपणा हियोर एने गावा बेल अश्दोद एने गाजा, एने मिस्रान खोदरे वोर एने मोटला देरीयान देड़े वोर जोला हियोर हेते।
यहुदान माणहाह बोयड़ावाला देसाम बी हियोर आपाना, मतलब शामीर, यत्तीर, सोको, दन्ना, किर्यत्सन्ना, जाह दबीर बी केतेह, अनाब, एश्तमो, आनीम, गोशेन, होलोन एने गीलो; आखा मिलीन ईग्यार हियोर एने तान गाव बी हेते।
यहुदान माणहाह ज्या हियोर बी आपायेल एता; अराब, दुमा, एशान, यानीम, बेत्तप्पुह, अपेका, हुमता, किर्यतर्बा, जो हेब्रोन बी केवाथे, एने सीओर; ज्या नोव हियोर हेते, ज्या नोव हियोर हेते, एने तान गाव बी हेते।
यहुदान माणहाह ज्या हियोर बी आपायेल एता; माओन, कर्मेल, जीप, युत्ता, यिज्रेल, योकदाम, जानोह, केन, गीबा, एने तिम्ना; ज्या आखा दोह हियोर एने तान गाव बी हेते।
हलहुल, बेतसुर, गदोर, मरात, बेतनोत एने एलतकोन; ज्या आखा सोव हियोर एने तान गाव बी एता।
यहुदान माणहान दुय हियोर रब्बा एने किर्यतबाल, ज्याह किर्यत्यारीम बी केताला आपायेल एता।
जेंगलाम ज्या हियोर हेते बेतराबा, मिद्दीन, सकाका; निबशान, मिठान हियोर एने एनगदी, आखा मिलीन सोव हियोर एने तान आखा गाव एता। 2
यहुदान सेना यरूशलेम माय रेणारे यबूसी माणहाह निकाल नाह सेक्या; केरीन आज वोर यबूसी माणहे यरूशलेम माय यहुदा माणहान विचीम रेतेह।
Source notes (2)
- Cross-reference न्यायियो 1:20
- Cross-reference न्यायियो 1:21; 2 शमुएल 5:6; 1 इतिहास 11:4
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.