Nahali Bible
याकुब 1:5
Verse 5 is marked below, with the whole chapter around it. Read from the start
नमस्कार
मी याकुब मालीक यीशु मसीन चाकर्यो ज्यी चिट्ठी लेखणे बाजरिनोह, जा बोगवानान इस्राएल ने बारा गेराणा वेरासेर एन रेतेह, ताह नमस्कार पोची।
बुरहो एने इकेल
एय मारा बाय बोणहा, जुलबुखे तुमू बात बातीन पारेख माय पोड़हो, ताहार ज्याह जुलूम खुसीन वात सोमजो, जेवी तुमरो बुरहो ओहली पारेख माय जिक सापड़ावेह, तेवी तुमरो दिर बुणीह। पुण दिरीह तान पुरो काम केरने दिवो, काय तुमू पुरा एने पाका एय जाहो, एने तुमरे माय काल्ली वातीन कोमी नाय रेय।
पुण केदी तुमरे माय रेन कुणीह बी एकलीन कोमी एय ते बोगवाना फाय मांगो, जो आरोप नाह लागाड़ता आखाह खुसी एने गीण केरीन आपेह, एने ताह आपी। पुण बिगेर सेक माय बुरहो केरीन मांगो, काहाकाय सेक केरनार देरीयान जेलखान गेत हे, जो वारा माय वोयणे एने उसेलने। ओहलो माणुह ज्यो नाय सोमजे काय माहु मालीक फाय रेन काह जुड़ी, तो माणुह सेक केरनार हे, एने जो काय तो वातु किरेह आखी वातु माय चेतुर हे।
गेरीब एने मालदार
गेरीब बाय बोणहा ज्यी वाती माय खुसी केरने जुवे, जेवी बोगवान ताह उचो पोद आपी। जेवी बोगवान माणहाह गेरीबी माय लावेह, तेवी ता खुसी केरने जुवे; काहाकाय ता खेड़ान फुलान गेत खेतेम एय जाती। काहाकाय दिह उगताच बोर दोप पोड़ने, एने खेड़ाह हुकाड़ देणे, एने तान फुल ओदीर जाणे एने तान होबा जात रेणे इहीचकेरीन केरीन मालदार माणुह बी तान वेपार केरती केरतीन माटड्या माय मिलाय जाय।
पारेख एने लालुस
बोरकेतवालो हे तो माणुह जो पारेख माय मोजबुत रीथे, काहाकाय पारेख माय खेरो निकलीन जीवाय ने तो मुकूट सापड़ावी, जान वायदो मालीक ताह मोंग केरनारा हिऱ्यो किरेल हे। जेवी कुणीन बी पारेख एय, ते तो ज्यो नाय केय काय मारी पारेख बोगवानान उगे रेन ईथे; काहाकाय बोगवानाह कुण बी लालुस माय नाह टाक सिकेत, एने तो कुणीह बी खाराब वातुन लालुस माय नाह टाक सिकेत। पुण एकेक माणुह ताच ने खाराब लालुस माय पोड़ी एने फोसाईन पारेख माय पोड़ने। ओवती मोरजी पेठेरली एन पापाह जेल्मो देणे, एने पाप जेवी होवटो एय जाणे ते मोत पायदा केरने।
एय मारा मोंगाल्ला बाय बोणहा, दुको मा खावो। काहाकाय एकेक हाजालो वरदान एने एकेक हाजो दान उपेर रिस ने हेते, एने उजेड़ान आबाख ने उगे रेन जुड़ेह, जा माय नाहते काह बोदेल एय सिकेह, एने नाह हेरेकणार सावलान गेत तो बोदेलने। तो तास ने आसा माय आपुह खेरायीन वचनान केरीन बाणायेल, काहाकाय आपु तान बाणायेल वोस्तु माय रेन एक बातीन पेल्लो फोल रेहु।
होमलानो एने केरनो
एय मारा मोंगाल्ला बाय बोणहा, ज्यी वातु तुमू जाण लिवो एकेक माणुह होमेलने केरता तियार एने बोलना माय दिरो एने रागा माय बागे रेय, काहाकाय माणहान राग बोगवानान खेरली वातुह सापड़ाव नाह सेकते। तानकेरीन आखो गाण एने दुसमोनाय ने बोड़ती सिटो केरीन ता वचनाह गेरबोड़ाय माय लेय लिवो, जो मोना माय पेरायेल एने जो तुमरो सुटकारो केर सिकेह। पुण होमेलनारे नाह, जा सोताह दुको देतेह; पुण वचना पोर चालनारे बुणो। काहाकाय जो कुण वचनाह होमेलनार एय एने ता पोर चालनार निहे एय, ते तो ता माणहान गेत हे जो तान सोतान मुय आरसा माय दिखेह। तो सोताह देखीन जात रेणे एने चालोच विहरी जाणे काय मी कोहलोक ईतो। पुण जो माणुह सुटकारान खेरा कायदा पोर द्यान केरती रीथे, तो तान कामा माय ज्यानकेरीन बोरकेत लेय काय होमलीन विहेरने नाह पुण तोहलोस काम किरेह। केदी कुण सोताह बोकत्यो सोमजेह एने तान जिबी पोर लगाम नाय देय, पुण तान मोनाह दुको देय ते तान बोक्ती वायेस हे। आपणा बोगवानान एने आबाख ने सामने चोखी एने हुवाली बोक्ती ज्यी हे काय विखावालान एने रांडायेल ने दुखा माय तान कालजी लेय, एने सोताह दुनियाह रेन निष्कलंक मेली।
Source notes (1)
- Cross-reference मत्ती 13:55; मरकुस 6:3; प्रेरितान काम 15:13; गलातीयो 1:19
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.