Nahali Bible
इब्रानियो 13
मसीन गेत जिवाय जीवणेन निर्देश
बाय बोणहान मोंग बोणीन रेय। पावणाह नमस्कार केरनेन मा विहेरहो, काहाकाय ज्यान द्वारे कोलाक माणहे नाह सोमजीन हेरोगदुतान आदर नमस्कार किरेल हेते। केदीह इहकेरीन एर किरो सुमजो काय ता हेऱ्या तुमू बी बोंदी हेते, एने जा हेऱ्या खाराब ईथे, तान बी ज्यो सोमजीन एर किरो काय आपणो बी सेरीर हे। वाराड़ आखा माय आदर ने वात मानाणे जुवे, एने वाराड़ान आथरोण चोखाली मिलो, काहाकाय बोगवान सिनालो केरनारान, एने पाराई बायकु हेऱ्यो पाप केरनारान नियाव केरी। तुमरो सोबाव बिगेर लालुस वालो रेणे जुवे, एने जो तुमू फाय हे तास केरीन हुकेह जीवो; काहाकाय तो सोतास कियेल हे, “मी तुवाह केदी नाय सोडु, एने केदी नाय त्यागु।” केरीन आमु बिगेर बिन केतेह,
“मालीक मारो राखवाल हे,
मी नाय बिव;
माणुह मारो काय केर सिकेह।”
जा तुमरा अगुवा एता, एने जा तुमूह बोगवानान वचन होमलायेल हेते, ताह एर मिलो; एने हास केरीन तान बोलनो चालनो देखीन तान बोरहान होस किरो। यीशु मसी काल एने आज एने कायेम एक हारकोस हे। बात बातीन खाराब हिक केरीन मा बोटेक जाहो, काहाकाय मोनान गीण केरीन मोजबुत रेणो हाजो हे, नाह काय ती खाणेन वोस्तु जी पोर काम मेलनाराह काईच फायदो नाह ईनो। आमरी एक ओहली वेदी हे जी पोर रेन खाणेन आदिकार ता माणहाह नाह सुतो, जा तोम्बु माय सेवा केरतेह। काहाकाय जा जेनवेरान लुय मुखी चाकर्यो पापान बोलीन केरता चोखाला जागा माय ली जाणे, तान देड़ गावान बाहेर हेलगाड़नु। ज्यानकेरीन, यीशु बी माणहाह तास ने लुयीन द्वारे चोखा केरनेन केरता हेडान बाहेर दुख उखलेल। केरीन आवो, आमु ता फाय गावान बाहेर जाता, एने तान अपमान माय बागी एता। काहाकाय न्या आपणो काल्लोस जागावालो हियोर नाह सोतो, पुण आपु एक आवणारा हेयराह होदतेह। तानकेरीन आपु तान द्वारे स्तुती रूपी बोली, जो ता ओठान फोल हे जा तान नावाह स्वीकार केरतेह, बोगवानाह जेलेमक्यास चेड़ाया केरी। हाजो केरने एने उदारता देखाड़णेन मा विहरो, काहाकाय बोगवान ओहली बोली केरीन खुस एणे।
तुमरा अगुवान उकुम मानो एने तान ताबाम रिवो, काहाकाय ता तान गेत तुमरा जीवान केरता जाकता रेतेह जाह लेखो आपणे पोड़ी; ता ज्य काम खुसी माय केरती, नाह काय पेल्ली हाह ली लेन, काहाकाय ज्यी हाल माय तुमूह काय फायदो नाय एय।
आमरी केरता विन्ता किरते रिवो, काहाकाय आमुह बुरहो हे काय आमरो मोन चोखो हे: एने आपु आखी वातु माय हाजी चाल चालने होदतेह। विन्ता केरनेन मी तुमूह उंजु बी सोमजाड़थु काय मी जेल्दी तुमरी फाय पुशो आव सेकु।
आखरी विन्ता
एवी हुक वालो बोगवान, जो आपणा मालीक यीशुह जो मेंड्रान मुठलो राखवाल हे जेलेमक्यास लुयीन गुणा केरीन मुरेल माय रेन जिवाड़ेन लियावो, तुमूह एकेक हाजी वातु माय खेरो केरी, ताकेरीन तुमू तान आसा पुरी किरहो, एने यीशु मसीन द्वारे तो आपु माय त्यु आख्यु वातु पायदा केरी, जो ताह पुटेह। मसीन बोड़ाय जेलेमक्योस इते रेय। आमेन।
आखरी सोबदा
एय बाय बोणहा, मी तुमूह विन्ता केरथु काय ती हिक ने वातुह वेठ लिवो, काहाकाय मी तुमूह जुलूम सारांश माय लिखेल हे। मारी मोरजी ज्यी हे काय तुमूह मालुम पोड़ी काय तीमुथीयुस आपणो बाहख सुट जायेल हे, एने केदी तो जेल्दी आव जाय, ते मी ता हिऱ्यो मिलने आवुह।
तुमरा आखा अगुवाह एने आखा चोखाला माणहाह नमस्कार किवो। इटली वाला तुमूह नमस्कार केतेह।
तुमरे आखा पोर गीण इते रेय। आमेन।
Source notes (1)
- Footnote तान लुय; नाहते तान खुद ने अर्पण किरेल मोत केरीन।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.