Nahali Bible
इब्रानियो 12
बोगवान आमरो आबोख
ज्यानकेरीन जेवी काय गोवाय देणारान ओहलो मुठलो वादलो आपु कोंड रेनोह, ते आवो, एकेक रोकणार वोस्तु एने फासाड़नार पापाह सेटो केरीन, ती दुवेड़ जी माय आपुह दोवेड़नो हे, दिर केरीन दोवेड़ता, एने बोरहाह बाणावणार एने खेरो केरनार यीशुन उगे टिंगते रेता, जो ती खुसीन केरता जी तान ओंगाण दिरेल ईतो, लाज ने काईच चिन्ता नाह केरीन खुरूसखाम ने दुख विठेल, एने बोगवानान राजगादिन जीवड़े उगे जाय बुहेल हे।
तानकेरीन ता पोर मोन लागाड़ो, जो आपणा विरोदा माय पापीन ओलो विरोद वेठ लियेल काय तुमू नाराज एन ईमोत नाय सोड़ दिहो। पाप ने विरोद माय तुमूह ओलो वेठणे नाह पोड़नो काय तुमूह लुय वोयाड़ने पोड़नो एय; एने तुमू ती हिकेह, जी तुमूह बेटाख ने गेत जुड़ेह, विहरी जायेल हेते:
“एय मार सोरा, मालीकान सिक्शाह उदेड़ वात मा सोमजे,
एने जेवी तो तुवाह गुड़के ते ईमोत मा सोड़हे।
काहाकाय मालीक जाह मोंग केरने, ताह सिक्शा बी आपणे,
एने जाह बिटोख बोणाव लेणे, ताह चापका केरीन बी देणे।”
तुमू दुखाह सिक्शा सोमजीन विठ लिवो; बोगवान तुमूह बेटाख सोमजीन तुमू हिऱ्यो व्यवहार केरने। तो काल्लो बिटोख हे जाह आबोख सिक्शा नाह आपणे? केदी ती सिक्शा जान हाती आखा एतेह, तुमूह सिक्शा नाह जुड़नी, ते तुमू सोरा नाह, पुण सिनालान सोरा ठेराय। पोशो जेवी आपणो सारिरीक आबोख बी आपुह सिक्शा आपताला एने आपु तान आदर केऱ्या, ते काय जीवान आबाख ने उंजु बी ताबाम नाय रिज्यो जाकेरीन आपु जीवताला रेहु। ता ते आपणा आपणा सोमेज ने गेत थोड़ास दिह्यान केरीन सिक्शा आपताला, पुण तो ते आपणा फायदान केरता हे, आपु बी तान चोखालान हाती बोण जाहु। चालुकाला माय बात बातीन सिक्शा खुसीन नाह सोती, पुण दुखास ने देखाथी; तीबी ताह वेठते वेठतेन पाका एय जायेल हेते, ओवतो ताह हुका हेऱ्यो देरमान फोल जुड़ेह।
हिक एने चेतावणी
केरीन डिल्ला आथाह एने कोमजोर गुटण्याह सिदा किरो, एने तुमरा पायान केरता सिदी वाट बाणावो काय लेंगड़ो बोटकी नाय पुण हाजो हुदरी जाय।
आखा हेऱ्या मेल किरो, एने ता चोखालाह होदणारे बुणो जान बिगेर कुण मालीकाह केदीच नाय देख सेकी। हास केरीन देखती रिवो, ओहलो नाय एय काय कुण बी बोगवानान गीणीह रेन एंजाणल्यो रेय जाय, नाहते ईखेह मानलो मुल फुटीन तेकलीत देय, एने तान द्वारे मोकतास माणहे एठा एय जाती। ओहलो नाय एय काय ईखेह जाण सिनालो केरनार, नाहते एसाव ने गेत विण देरमी रेय जो एक टेमान रोटान बोदले तान पेल पायदा एणेन पोद वेच दिनो। 1तुमू जाणतेह काय पासाण रेन जेवी तो बोरकेत लेणे हुद्यो ते नेचो गेणाय गीयो, एने रेड़ रेड़ीन बोरकेत सापड़ावणे हुद्यो, पुण तो तान किरेल ने पासतावो नाह किर सीक्यो।
तुमू ते ता बोयड़ान आहने, जो सापेल सेकताला, एने आक्ठा केरीन उजालो ईतो, एने काल्ली गटा, एने आंदारो, एने वादोणान आहने, एने पावलीन आवाज, एने बोलनारान ओहला बोलान आहने नाह आवा, जाह होमेलनारे विन्ता केऱ्या काय एवी आमु हेऱ्या उंजु वातु नाय केरने जुवे। काहाकाय ता ता उकुमाह नाह वेठ सेकना: “केदी काल्लो जेनवेर बी बोयड़ाह सापली ते ताह देगड़ा केरीन देती।” एने तो दर्शन बियावी ओहलो एतो काय मुसा केयो, “मी जुलोम बिथु एने कापथु।”
पुण तुमू सियोन बोयड़ान आहने, एने जीवताला बोगवानान हियोर, हेरगा मायवालो यरूशलेम एने एजारो हेरोगदुत ने खुसीन सबा माय पुचेल हेते। एने ता पहिलोठान सादो पुंचो एने मोंडली, ज्युन नावे हेरगा माय लेखायेल हेते, एने आखान नियाव केरनार बोगवाना फाय, एने खेरा ईयेल देरमीन जीव, एने नोवाला वायदान विच माय यीशु एने हितेड़नेन ता लुय ने आहने आवाह, जो हाबीलान लुयाह रेन हाजी वातु किथे।
हास केरीन रिवो, एने ता केणाराह हेऱ्या रेन मुय मा फिरावो, काहाकाय ता माणहे देरती पोर चेतावणी आपणाराह रेन मुय फिरावीन नाह वोच सेकना, ते आपु हेरगा माय रेन चेतावणी आपणाराह रेन मुय फिरावीन किहीक वोच सेकहु? तुलबूखे ते तान बोल देरतीह आलाड़ दियेल एतो, पुण एवी तो जो वायदो किरेल हे, “एक वार पुशो मी देरतीह उलोस नाह पुण जुगाह बी आलाड़ देह।” एने ज्य वाक्य “एक वार पोशो” ज्यी वातुह देखाड़ीह काय जी वोस्तु आल जाथे, ती बुणेल वोस्तु हेत्यु तानकेरीन टेल जाती; काहाकाय जी वोस्तु आलेत नाह, मोजबुत बोणीन रेय। जेवी आपुह एक ओहलो राज जुड़ने बाजरेनोह जो केदी आलेस नाय। ते आवो आपु दन्यवादी एय जाता, एने बोक्ती, एने बिय हेऱ्या बोगवानान ओहली आरादना केरता जाकेरीन तो खुस ईथे; काहाकाय आपणो बोगवान खेतेम केरनार आक्ठो हे।
Source notes (1)
- Footnote तो ताह हुद्यो; नाहते तो बोरकेत सापड़ावणेन केरता कोसीत किऱ्यो।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.