उत्पत्ती 49

याकुब ने आखरी सोब्दा

1उवतो याकुब तान सोराह ज्य किन हाद्यो, “टोलवाय जावो, मी तुमूह केह, काय आवता दिह्या माय तुमरो काय एय,”

2एय याकुबान सोरा तुमू आखा एकठा टोलवाईन हुमलो,

तुमरो आबोख याकुबान1 वाती पोर कान दिवो।

3एय रूबेन तु मारो डावालो सुरो हे,

मारी ताकेत एने एदमी एणेन नाते तु पेल्लो फोल हे;

तु आखा सोरा माय रेन मोजबुत एने ताकेतीन हाजालो बाग तुच हे।

4तु पाण्यान गेत उकेलनार हे,

पुण तु दिहरा रेन मुठो नाय बुणहे;

काहाकाय तु मार रखेल हिऱ्यो हुवेल इतो,

तु तारा आबाख ने आथरोणाह एठो किरेल हे;

5शिमोन एने लेवी जा बाहख बाहख हेते,

एने ता तान आथ्यारान वापेर दिंग्गो केरनेन केरतेह।

6मी तान लिकायेल वातु माय बाग नाय लेह, एने नाहते तान पोंचा माय बाग लेह,

काहाकाय ता रागा माय माणहाह मार देना,

एने तान मोरजी से खेल ने केरता बोयलाह जेखमी किरेल एता।

7तान राग हाराप हे;

एने तान राग बिगेर गीणीन एतो;

मी ताह याकुबा माय रेन आंगे आंगे केरीन ताह इस्राएल देसा माय खोवली देह।

8एय यहुदा, तारा बाहख तारो दन्यवाद केरती,

तारो सुरो तारा दुसमोनान बोची पोर पोड़ी;

तारा आबाख ने सोरा तुवाह वोंदती।

9यहुदा सिंहान पिलो हे,

एय मारा सोरा, तु सिंहान गेत हे;

एने तु सिकार केरीन गुफा माय जायेल हे;

एने तुवाह दुख देय ओहलो ताकेत वालो दिहरो कुण नाय मिले।2

10जाह वोर शिलो नाय आवी,

ताह वोर यहुदा राजा बोणीन तान गेराणा पोर राज केरी;

एने देस देसान माणहे तान ताबाम एय जाती।

11तो तान जुवान गेदड़ाह वेला माय

एने तान गेदड़ीन पिलाह हाजाला जातीन वेला माय बांद्या केरी;

तो तान फाड़का मोवाल माय एने तार पेरावोट अंगुरान रूहा3 केरीन दुयेल हे।

12तान डोला मोवाला से पिपलन्या एने तान दात दुदान गेत दोवल्या रेती।

13जबुलून देरीयान मीरे रिहे, तो डोंडह्यान केरता बंदरगाहान काम आपी,

एने तान बुईन हिल सीदोन हेयराम वोर पोची;

14इस्साकार जुलूम मेहनेत केरनार गेदड़ा हारको हे,

जो जेनवेरान वाड़ाम जायीन दाबाईन रिथे।

15तान विहेवणेन जागो देखीन काय हाजो हे,

एने एक देसान मोज हे, ज्यो तो दिख्यो,

एने बारलो वोजो उखेलनेन तो तियार एय गीयो;

एने मोजबुरी माय पावरान गेत काम केरने बाज गीयो।

16दान इस्राएलान गेराणो बोणीन

तान बायबोंदान नियाव निवाड़ो केरी।

17दान वाटीन दिड़े पुड़ रियेल गेयड़ेक रेय,

एने वाटी पोर वालो एक हाप हारको रेय;

जो गोड़ान पायाह चावेह,

ता माय ता पोर बोहणार पासाण पोड़ जाथे।

18हे बोगवान मी तुवाच फाय रेन सुटकारो सापड़ावणेन वाट जोवती आयेल हे।

19गाद पोर लुटारान एक टोला उगे रेन हामलो केराय जाय;

पुण तो ताह नाहाड़ देय एने तान पासाण पोड़ी।

20आशेर ने खेता माय जो एन पाकी;

तो हाजो रेय,

एने तो राजान लायकीन होवादलो खाणो आप्या केरी।

21नप्ताली सुटेल मेंदड़ीन गेत हे;

एने तो हाजाली वातु किथे।

22युसूफ ताकेत वाला वेलान एक डाल हे,

तो जिरान आहने उगेल फोलनार वेलान एक डाल हे;

तान डालख्यु बितड़ा पोर चेड़ीन पोसरी जात्युह।

23आखा माणहे तान विरूद माय लेड़ाना;

एने विंदणारे ताह बेलखा केरीन विंद्या, एने तान पासाण पोड़ रेनाह।

24पुण तान दोंदली वातड़ी रेनी,

एने तान खांदा एने आथ याकुबान ताह

आखी ताकेत वाला बोगवाना उगे रेन ताह ताकेत जुड़नी,

जा फाय रेन तो एक गोवाल आवी, जो इस्राएल देसान सापोर बी बोणी।

25ज्यो तारा आबाख ने ता बोगवानान काम हे,

जो तारी मुदेक केरी, तो आखी ताकेत वाला बोगवानान जो तुवाह उपेर रेन जुगावाली बोरकेत,

एने निड़ो उन्डाला पाण्या वाली बोरकेत एने दुदान,

एने गेरबान बोरकेत आपी।

26तारा आबाख ने बोरकेत मारा डायडायान

बोरकेतीह रेन वोदार वोद जायेल हे,

एने जेलेमक्या बोयड़ान पुटे ओहली वोस्तुन गेत बोणीन रेती,

ता युसूफान मुंडा पोर, जो तारा बायाख रेन आंगेच केराय जाईल एतो,

ताच ने मुंडा पोर मुकूट फुले फोलती।

27बिन्यामीन एक फाड़ खाणार कोलवान गेत हे,

उठ्यान तो सिकार केरी, एने वुचेल तो हांज पोर लुट वाट लेय।

28इस्राएलान बारा वोस ज्याच हेते, एने तान आबोख जा जा वचना से ताह बोरकेत आप्यो, ता ज्याच हेते; एक एकाह तान तान कामान गेत तो बोरकेत आप्यो।

याकुब ने मोत एने बुजणो

29तेवी याकुब ज्य किन ताह उकुम आप्यो, “मी मोरने माय हे, केरीन माहु हित्ती एप्रोन ने खेतावाली गुफा माय मारा डायडाया हेऱ्याच बुज दिज्यो, 30मतलब तीच गुफा माय जी कनान देसाम मम्रेन सोमोर वाली मकपेलान बुय हे; ती बुईह अब्राहाम हित्ती एप्रोन फाय रेन माहणान केरता वेचातो लियेल एतो काय तान सोतान बुय बुणे।4 31ता अब्राहाम एने तान बायकु साराह बुजेल एता; एने ताच इसाहाक एने तान बायकु रिबीकाह बी बुजेल; एने ताच मी लियाह बी बुजेल।5 32तो खेत हित्ती माणहा फाय रेन वेचातो लेवाय जायेल एती।” 33याकुब जेवी तान सोराह ज्यो उकुम आप दिनो, तेवी तान पाय खाटला पोर विसीन जिव सुड़ दिनो, एने तान डायडाया माय जाय मिलानो।6