Nahali Bible
उत्पत्ती 44
चांदीन वाटको
तेवी युसूफ तान गेरान आदिकारीह उकुम आप्यो, “न्या माणहान थेयलाम खाणेन वोस्तु होमाय सेकी तोली बोर दिवो, एने एक एक जाणान पोयशाह तान थेयलान मुयाला पोर मेल दिवो। एने आखान आतल्या बायाख ने थेयलान मुयाला पोर मारो चांदीन वाटको, एन एने पोयशा हेऱ्या मेल दिवो।” युसूफान उकुम मानीन तो तिहेच केरीन किऱ्यो। दिहरी दिह वेगाच उजालो एताच ताह तान गेदड़ा हेऱ्याच वाटे लागाड़ाय गीया। ता हेयराम रेन निकलेल ओलाच एता, एने सेटा नाह जाय सिकेल एता, काय युसूफ तान गेरान आदिकारीह केयो, “ता माणहाह पासाण वाह लाग, एने ताह सापड़ावीन ताह के, ‘तुमू बोलायीन बोदले खाराब काम काहा केऱ्या एने तुमू काहा मारा मालक्यान चांदीन वाटको चोऱ्या? काय ज्यी ती वोस्तु नाय मिले जी माय मारो मालीक पिथे, एने जा केरीन तो लिकायेल वातुह दिखेह? एने तुमू ज्य जो किरेल हेते तो खाराब काम केऱ्या।’ ”
तेवी तो ताह जायीन सापड़ाव्यो, एने ओहलीच वातु ताह केयी। पुण ता ताह केयो, “एय आमरा मालीक, तु ओहली वातु काहा किथे? आमु सुगोण खातेह काय आमु ओहलो काम नाह केऱ्या, देख जा पोयशा पेल आमरा थेयलान मुयाला पोर सापड़ेल एता, तेवी आमु ताह कनान देसाम रेन लेन आवीन तुवाह फिराव देना, ते केदी, तारा मालक्यान गेराम रेन आमु काल्लो चांदीन निह ते होनान वोस्तु किहीक चोरी केर सेकतेह? तारा पावराम रेन जा कुणी फाय निकली, तो मार टाकाय जाय, एने आमु बी तारा मालक्यान पावोर बोण जाहु।”
गेरान आदिकारी केयो, “तुमरोच केणो बाराबोर, जा फाय तो सापड़ी तो मारो पावोर बोणी, एने तुमू निर्दोस ठेराहो।” ओवता आखा बाहख चालुच थेयलाह उताऱ्या एने बुय पोर मेलीन ताह सोड़ने बाज गीया। तेवी तो होदणे बाज गीयो, एने मोठलान रेन ते आतल्यान थेयलाम वोर हुद्यो : एने वाटको बिन्यामीन ने थेयलाम सापड़नो। तेवी ता जिव जिवान फाड़का फाड्या, एने पोशा गेदड़ा पोर थेयला लादीन हेयराम फिर गीया।
जेवी यहुदा एने तान बाहख युसूफान, गेराम पोचना, एने युसूफ तुलबुखे गेरा मायच इतो, तेवी ता तान ओंगाण बुय पोर पोड़ना। तेवी युसूफ ताह केयो, “तुमू ज्य कोहलो काम किरेल हेते? काय तुमू नाह जाणताला काय मार सारको माणुह लिकायेल वातु बी जाणे सिकेह?”
तेवी यहुदा केयो, “एय मालीक एवी आमु काय किन सोताह निर्दोस ठेरावज्यो, बोगवान तारा पावरान पापाह देर लियेल हे, आमु एने जा फाय वाटको जुड़नो तो बी आमु आखान आखा आमरा मालक्यान पावोरच हेते।”
पुण युसूफ ताह केयो, “ओहलो मी नाह केर सिकेत, पुण जा फाय मारो वाटको सापड़ेल हे, तोच मारो पावोर रेय; एने तुमू हाजी हुकेच तुमरा आबाख फाय जात रिवो।”
बिन्यामीनान केरता यहुदान विन्ता
तेवी यहुदा तान आहने जायीन केयो, एय मालीक तार पावराह एक वात केणेन मुको आप, एने तारो राग तारा पावरा पोर नाय बुड़के, काहाकाय तु ते फिरोन राजान बाराबोर हे। पेल मारा मालीक तु आमुह फुचेल इतो, “काय तुमरो आबोख एने दिहरा बाहख बी हेते?” एने आमु मालक्याह कियेल एता होव, आमरो डावालो आबोख हे, एने तान डायावारान एक आत्योच सुरो बी हे, पुण तान बाहख मोर जाईल हे, केरीन तो एवी तान आईख ने एखालो सुरो रेय जाईल हे, एने तान आबोख ता पोर मोंग किरेह। तेवी तु आमुह कियेल इतो, “ताह मार फाय लेन आवो काय मी ताह देखु।” तेवी आमु मालक्याह कियेल एता, “तो सुरो तान आबाख सोड़ नाह सिकेत; नाह ते तान आबोख मोर जाय।” एने तु तारा पावराह कियेल इतो, “केदी तुमरो आतल्यो बाहख तुमरो हिऱ्यो नाय आवी, ते तुमू मार सामने पोशा नाय आव सिकहो।”
केरीन आमु आमरा आबाख फाय जायीन मालक्यान वात ताह केयो। तेवी आमरो आबोख केयो, “पोशा जायीन आपणी केरता खाणेन वोस्तु लेन आवो।” तेवी आमु ताह केया, “आमु नाह जाय सेकते, होव केदी आमरो आतल्यो बाहख आमरी आरही रेय, तेवी आमु जाहु; काहाकाय केदी आमरो आतल्यो बाहख आमरी हिऱ्यो नाय रेय, ते आमु ता एदम्यान सोमोर नाय जाय सेकहु।” तेवी आमरो आबोख आमुह केयो, “तुमूह ते मालुमच हे, काय मारी बायकुन दुय सोरा पायदा इयेल एता। एने ता माय एक ते माहु सोड़ीच ने गीयो, एने मी जाण लिदो, काय ताह जेंगली जेनवारे मार देना एती; एने तेवीह रेन मी तान मुय नाह देख सिक्यो। एने केदी तुमू ज्याह मार डोलान आड़ावे लेन जाहो, एने ज्या पोर काह पिढ़ा आव पोड़ी, ते तुमरी वोजेसे मी ज्या डायावाराम दुखा हिऱ्यो आंदारीकेलीम उतरी जाह।”
केरीन जेवी मी मारा आबाख फाय पुचनो, एने ज्यो सुरो आरही नाय रेय, ते तान जिव जो ज्याच पोर एटकी रिथे।
केरीन, ज्य देखीन काय आमरो आतल्यो बाहख आमरी हिऱ्यो नाह सुतो, ते आमरो आबोख चालुच मोर जाय। तेवी तारा पावरान वोजेसे, आमरो आबोख जो डायावाराम हे दुखाम आंदारीकेलीम उतरी जाय। एने तारो पावोर मारा आबाख ज्य किन जामीन इयेल हे, केदी मी ज्याह तार फाय नाय पोचाडु, ताहार मी कायेम ने केरता तारो गुनेगार रेह। केरीन एवी माहु ज्या सोरान बोदले, मालीक माहु तारो पावोर बोणीन रेणे दे, एने ज्या सोराह तान बायाख हेऱ्या जाणे दे। काहाकाय ज्या सोरा बिगेर मी मारा आबाख ने सोमोर किहीक जाय सेकु; एने ओहलो नाय एणे जुवे काय मारा आबाख पोर जो दुख पोड़ी तो माहु देखणे पुड़े।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.