Nahali Bible
उत्पत्ती 43
बिन्यामीन हेऱ्या मिस्र देसाम जाणो
कनान देसाम काल उंजु बी होवटोह इती गीयो। जेवी याकुबान सोरा मिस्र देसाम रेन लायेल तो एन आखो निवरी तेवी तान आबोख ताह केयो, “पोशा थोड़क खाणेन वोस्तु वेचाता लेन आवो।”
तेवी यहुदा ताह केयो, “तो माणुह आमुह दोमकी दिन केतालो, केदी तुमरा बायाख तुमरी हेऱ्या नाय लावहो, ते तुमू मार सामने आव नाय सिकहो। केरीन तु केदी तु आमरा बायाख बिन्यामीनाह आमरी हिऱ्यो मुकले, ते आमु जायीन आपणी केरता खाणेन वोस्तु वेचाता लेन आवहु। पुण केदी तु ताह नाय मुकेलहे, ते आमु नाय जाहु, काहाकाय तो एदमी केतालो, केदी तुमरो बायाख तुमरी आरही नाय रेय, ते तुमू मार सोमोर आव नाय सिकहो।”
तेवी याकुब केयो, “तुमू ता एदम्याह आमरो एक उंजु बाहख हे, इही काहा कियेल? एने मार हेऱ्या खाराब काम काहा केऱ्या?”
ता केया, “जेवी तो एदमी आमरा एने आपणा गेरल्यान बाराम इह केरीन फुसतालो, काय तुमरो आबोख एवी वोर जीवतालोच हे काय? काय तुमरो एगदो उंजु बाहख बी हे? तेवी आमु ज्या सावालान गेत ताह जापाप आप्या; ओवता आमु काय जाणताला काय तो केय, तुमरा बायाख न्या लेन आवो।”
ओवतो यहुदा तान आबाख याकुबाह केयो, “ज्या सोराह मार हिऱ्यो मोकली दे, काय आमु जाज्यो; ता माय आमु, एने तु, एने आमरा बाल-बोचा मोरने नाय जुवे, पुण जीवताला रेय। मी तान जामीन रेथु, माराच आथा केरीन ताह पुशो लाव देह, एने केदी मी ताह नाय लावु ते जेलेमक्योच तारो गुनेगार रेय। केदी आपु वार नाय लागाड़, ते एवी वोर दुय वार फिरीन आव लागता।”
तेवी तान आबोख याकुब ताह केयो, “केदी खेरीच ओहली वात हे, ते इह किरो; ज्या देसावाली हाज-हाजी वोस्तुम रेन थोड़ थोड्यु तुमरा थेयला माय ता एदम्यान केरता बेट ली जावो, जीहे काय थोड़ोक डिक, एने थोड़ोक मोवाल, मासालो एने थोड़ोक गेंदाण्यो तेल, पिस्ता, एने बादाम। एने तुमरी हेऱ्या डोबल्या पोयशा लियाव ज्यो; एने जा पोयशा तुमरा थेयलान मुयाला पोर मेलीन फिर वाय जायेल एता, ताह बी लेता जावो; केदी ज्य विहरीन एनो एय। तुमरा बायाख बी आरही ली जायीन ता एदम्या फाय पोशा जावो। एने आखी ताकेतवालो बोगवान ता एदम्याह तुमू पोर गिणातो केरी, ता माय काय तो तुमरा दिहरा बायाख एने बिन्यामीनाह बी पुशो आवणे देय; ओहलो नाय एय ते मी मारा सोरान केरता रेड़ती रेह।”
तेवी ता ती बेट, एने डोबल्या रूप्या, एने बिन्यामीनाह आरही लेन चाल देना एने मिस्र देसाम पोचीन युसूफान सोमोर उबरेय गीया।
बाहख युसूफान गेर पोचणो
ता हिऱ्यो बिन्यामीनाह देखीन युसूफ तान गेरान आदिकारीह केयो, “न्या माणहाह गेर पोचाड़ दिवो, एने जेनवार मारीन खाणो तियार किरो; काहाकाय ता माणहे हिराण पोर मार हेऱ्या रूटो खाती।” तेवी तो आदिकारी युसूफ कियेल तिहे ता माणहाह युसूफान गेराम लेन गीया।
जेवी ता युसूफान गेर पोचाड़ाय गीया, तेवी ता बिन आपसाम केणे बाज गीया, “जा पोयशा पेल्ली वार आपणा थेयला माय फिराव दियेल इतो, ता माय आपु गेराम पोचाड़ाय जायेल हेते; एने तो आपुह गुनेगार ठेरावीन आपणा गेदड़ाह सांडाड़ लेय, एने आपुह ताबाम केरीन तान पावोर बाणावी।” तेवी ता युसूफान गेरान आदिकारीन आहने जायीन गेरान बायणा पोर इह केरीन केणे बाज गीया, एय आमरा मालीक, जेवी आमु पेल्ली वार एन वेचातो लेणेन केरता आयेल एता, तेवी आमु गेर जाणे बुखेत आमु देरेमसालाम पोचीन आमु आमरा थेयलाह सोड़ीन देख्या, काय आमरा आखा जाणान पुरा-पुरा पोयशा थेयलान मुयाला पोर मिलेल एता; केरीन आमु ता पोयशा दिहरी वार बी लेन आवाह। एने जी फेराह पोशा एन वेचातो लेणेन केरता वोदार पोयशा, लायेल हेते; एने आमु नाह जाणते, काय आमरा पोयशा आमरा थेयलाम कुण मेल दियेल एतो।
पुण युसूफान आदिकारी ताह केयो, “बिवो मा; तुमरा आबाख ने बोगवान, जो तुमरो बी बोगवान हे, तोच तुमरा थेयलाम देन आप्यो एय, तुमरा पोयशा ते माहु जुड़ जायेल एता।” उवतो तो शिमोनाह काढ़ीन ता आरही केर दिनो।
ओवतो तो आदिकारी ताह युसूफान गेराम ली जायीन; ताह पाय दोवणेन केरता पाणी आप्यो, एने ता तान पाय दोया; उवतो तो तान गेदड़ान केरता चारो आप्यो। तेवी ता ज्य होमलीन, काय आज आपुह न्याच रूटो खाणे पोड़ी, एने ता युसूफा आवणेन टेम वोर ताह आपणेन केरता बेट तियार केरीन मेल्या। एने युसूफ गेर आवो तेवी ता ती बेटीह, जो तान आथाम एती, तान सोमोर गेराम लेन गीया, एने ताह आपीन बुय पोर पोड़ीन ताह वोंद्या। तो तान हाल फुसीन केयो, “काय तुमरो डावालो आबोख जान बाराम तुमू माहु कियेल एता, तो हाजो हे एने एवी वोर जीवतालोच हे?”
ता केया, “होव तारो पावोर आमरो आबोख हाजो हे एने एवी वोर जीवतालोच हे।” तेवी ता मुंड नेचा केरीन पोशा वोंद्या।
तेवी तो निजेर टाकीन तान खाज बायाख बिन्यामीनाह देखीन फुशो, “काय तुमरो आतल्यो बाहख जान बाराम तुमू माहु कियेल एता, तो ज्योच हे?” ओवतो तो केयो, “एय मारा सोरा बोगवान तार पोर गीण केरी।” ओवतो तो तान बायाख पोर जुलूम मोंग केरतालो केरीन तान मोन बोराय आवा केरीन ज्यो सोचीन काय मी का जायीन रेडु, युसूफ चालुच तान मायवाला गेराम जायीन रेड़ पोड़नो। ओवतो तान मुय दोवीन बाहेर निकलीन आवो; एने तान मोनाह ठावको केरीन केयो, “रूटो वाटो किरो।” तेवी ता तान केरता आंगेच एने तान बायाख ने केरता आंगेच एने जा मिस्री ता हेऱ्या खाताला, तान केरता बी आंगेच खाणो वाटो किऱ्यो; केरीन काय मिस्री माणहे इब्री माणहा हेऱ्या रूटो नाह खाय सेकताला, पुण मिस्र ओहलो खाराब सोमेजताला। युसूफान बायाख तान सोमोर मोठा-मोठा पेल, एने आत्या-आत्या पासाण तान-तान वोयीन गेत रांगी माय बोहाड़ाय गीया; ज्य देखीन बोंगलायीन ता एक दिहरा उगे देखणे बाज गीया। तेवी युसूफ तान सोमोर रेन खाणेन वोस्तु विस विसीन ता फाय मोकेलने बाज गीयो, एने बिन्यामीनाह तान दिहरा बायाख रेन पाचवाटा वोदार खाणेन वोस्तु सापड़नी, एने ता युसूफा हेऱ्या पुटे तोलो खादा पिदा।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.