Nahali Bible
उत्पत्ती 40
युसूफान उगे रेन आरापीन होपनान आर्थो केणो
थोड़ाक दिह्यान पासाण ओहलो एनो, काय मिस्र देसान राजान पिवाड़नार एने रांदणार राजान विरूद तान आथा केरीन गुनो एय जायेल इतो। तेवी फिरोन तान ता दुयू आदिकारी, मतलब पिवाड़नारान आदिकारी एने रांदणारान आदिकारी पोर रागाईन, ताह देरीन राखवाल्यान मुखीन गेर तिच जेलीम जाहरो युसूफ कोंडायेल इतो, ता कोंडाड़ दिनो। तेवी राखवाल्यान आदिकारी ता दुय गुनेगाराह युसूफान आथाम होप दिनो, एने तो तान चाकरी केरने बाज गीयो; एने ता थोड़ाक दिह वोर जेलीम रेना।
मिस्रीन राजान पिवाड़नार, रांदणार जा जेलीम कोंडायेल एता, ता दुयू एकुच राती माय तान-तान एण्यान गेत होपनो देख्या। विगोच जेवी युसूफ ता फाय माय गीयो, तेवी तो ता दुया दिख्यो काय ता जुलूम चिन्ताम एने नाराज हेते। केरीन युसूफ फिरोन ने आदिकारीह फुशो, “आज तुमू ओला नाराज काहा हेते?”
तेवी ता ताह केया, “आमु दुय होपनो दिखेल हेते, एने तान आर्थो आमुह केणार कुणीस नाय मिले।”
युसूफ ताह केयो, “काय होपनान आर्थो केणो बोगवान काम नाय मिले? माहु आप-आपणो होपनो किवो।”
तेवी पिवाड़नारान आदिकारी युसूफाह तान होपनो केणे बाज गीयो, “मी होपना माय दिख्यो, काय मार सोमोर एक अंगुरान विलो हे; एने ता वेलान तीन डाल्यु हेत्यु; एने ता डिरा पोर फुले लागना एने तान गुमसाम अंगुर फोलीन पाक गीया। एने फिरोनान वाटको मारा आथाम इतो; एने मी ता अंगुराह विसीन फिरोनान वाटका माय निपटीन फिरोनान आथाम आप्यो।”
उवतो युसूफ ताह केयो, “ज्या होपनान आर्थो ज्य हे : त्यु तीन डाल्युन आर्थो तीन दिह हेते। एने ज्या तीन दिह्या माय फिरोन तारो गुनो माफ केरी एने तारो पोद उचो केरी, तु जा कामाह पेल केऱ्या केरतालो, तोच काम पुशो किरहे। एने जेवी तारो हाजो एय जाय, तेवी माहु एर किरज्ये, एने मार पोर गीण केरीन फिरोनाह मार बाराम वातु किरजे, एने माहु ज्यी जेलीम रेन सोड़वी दिज्ये। काहाकाय खेरीच माहु इब्री माणहान देसाम रेन बोलजोबरी लायेल हेते, एने न्या बी मी काल्लो ओहलो गेलेत काम नाह किरेल सुतो, जान केरता मी ज्यी जेलीम टाकाय जाव।”
ज्य देखीन काय तान होपनान आर्थो हाजो निकेलनोह, तेवी रांदणारान आदिकारी बी युसूफाह केयो, “मी बी एक होपनो दिखेल हे, काय मारा मुंडा पोर दोवल्या रोटान तीन टोपला हेते। एने उपेरली टोपली माय फिरोनान केरता आखी बातीन रांदेल वोस्तु हेत्यु, एने चिड़ा मारा मुंडा पोर वाली टोपली माय रेन त्यु वोस्तुह खाणे बाज रेनाह।”
युसूफ ताह केयो, “ज्यान आर्थो ज्य हे : तीन टोपल्युन मतलब तीन दिह हेते। एवी रेन तीन दिह्या माय फिरोन तारो मुंड काटाड़ीन तुवाह एक जाड़ा पोर टांगाड़ देय, एने चिड़ा तारो माह टोच-टोचीन खाती।”
एने तीसरे दिह फिरोनान जेल्मो दिह एतो, एने तो तान आखा कामगाराह खाणेन आप्यो, एने ता माय रेन पिवाड़नारान आदिकारी, एने रांदणारान आदिकारी दुयाह जेलीम रेन काड़ायो। पिवाड़नारान आदिकारीह ते पिवाड़नेन पोदा पोर पुशो पेलुन गेत मेल लिदो, एने तो फिरोनान आथा माय वाटको आपणे बाज गीयो। पुण रांदणारान आदिकारीह तो फाशी पोर टांग दिनो, जिह केरीन युसूफ तान होपनान आर्थो ताह कियेल इतो। तीबी पिवाड़नारान आदिकारी युसूफाह एर नाह मिल्यो; पुण ताह विहरी गीयो।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.