Nahali Bible
उत्पत्ती 39
युसूफ एने पोतीपरान बायकु
इश्माएली माणहे युसूफाह मिस्र देसाम ली जायीन पोतीपर नावान एक मिस्रीह जो फिरोन राजान आदिकारी एने राखवाल्यान मुखी इतो, ताह वेच देना। युसूफ तान मिस्री मालक्यान गेरा माय रेतालो, एने बोगवान ता हिऱ्यो इतो; केरीन तो हाजो एदमी बोण गीयो1। एने युसूफान मालीक दिख्यो काय बोगवान ता हिऱ्यो रिथे, एने जो काम तो किरेह ताह बोगवान पुरो कर दिथे। केरीन पोतीपर युसूफा पोर जुलूम खुस इतो, एने तो तान चाकरी केरनेन केरता ठेराय गीयो; एने तो ताह तान गेरान आदिकारी बाणावीन तान आथाम आखो कारबार होप दिनो। जेवीह रेन पोतीपर ताह तान गेरान एने तान आखा मालदेनान आदिकारी बाणायो, तेवीह रेन बोगवान युसूफान कारेण ता मिस्रीन गेराम बोरकेत आपणे बाज गीयो; खेतीवाड़ीम जो काय एतो, सोबा पोर बोगवान बोरकेत आप्यो। केरीन तो आखो कारबार युसूफान आथाम न्या वोर सोड़ दिनो काय तान खाणेन रोटाह सोड़ीन तो तान मालदेनान हाल नाह जाणतालो। युसूफ हाजो एने गाटालो इतो। थोड़ाक दिह्यान पासाण ओहलो काय तान मालक्यान बायकु युसूफा उगे डुलो टाक्यो एने ताह केयी, “मार हिऱ्यो हुव।” पुण युसूफ ओहलो केरनेन नाकार केरीन तान मालक्यान बायकुह केयो, “देख ज्या गेरान आखो कारबार मार पोर बुरहो केरीन मारो मालीक मार आथाम होप दियेल हे, एने ताह मारो मालीक कायच नाह जाणेत। ज्या गेराम माहु रेन मोठो कुण नाय मिले, एने तुवाह सोड़ीन, जो तान बायकु हे; एने तो मार हिऱ्यो रेन कायच नाह मिलेल सुतो आखो मार आथाम हुपेल हे; केरीन मी ओहलो मोटलो खाराब काम केरीन बोगवानान गुनेगार काहा बोणु?” पोतीपरान बायकु दाड़ीन ता हेरी वातु केरती रेनी, पुण युसूफ तीन वात नाह हुमल्यो एने तीह हिऱ्यो हुवणेन नाकार केर दिनो।
पुण एक दिह ओहलो एनो काय युसूफ तान काम-काज केरनेन केरता माय वाला गेराम गीयो, एने ती टेम माय ता गेराम काल्लाच पावोर नाह एता एने तो एखालोच इतो। तेवी ती बायकु तान डेगलो देरीन केयो, “मार हिऱ्यो हुव” पुण तो तान डेगलो तीन आथाम सोड़ीन नाहनो एने बाहेर निकली गीयो। ज्य देखीन काय तो तान डेगलो मारा आथाम सोड़ीन बाहेर नाह गीयो, तेवी ती बायकु तीन गेरान पावराह हादिन केयी, “दिखो तो एक इब्री पावोर आमरी ईजुत लेणेन केरता आमु फाय लेन आयेल हे, तो मार हिऱ्यो हुवणेन केरता गेराम रिगेल इतो, पुण मी जोरेस आयड़ी उठनी। एने मारो मोठोच आयेड़नो होमलीन तो तान डेगलो मार फाय सोड़ीन नाहनो, एने दोवड़ीन बाहेर निकली गीयो।”
एने ती तान डेगलो तान मालक्याह गेर आवता वोर तिच फाय मेल राखी। तेवी ती ताह इह केरीन वातु केयी, “तो इब्री पावोर जाह तु आपु फाय लेन आयेल हे, तो माहु देरनेन केरता मार फाय आयेल इतो; पुण मी ताह मार हिऱ्यो आवताच जोरेस आयड़ीन उठनी, तेवी तो तान डेगलो मार फाय सोड़ीन बाहेर नाह गीयो।”
तान बायकुन ज्यी वातु होमलीन काय तारो पावोर मार हिऱ्यो ओहलो-ओहलो काम किरेल हे तेवी युसूफान मालक्यान राग बुड़कनो। एने युसूफान मालीक ताह देरीन जी जेलीम राजान केयदी कोंडायेल एता ती जेलीम कोंडाड़ दिनो; एने युसूफ ती जेलीम रिनो। पुण बोगवान युसूफान आरही आरही रिनो, एने ता पोर गीण किऱ्यो, एने जेलीन आदिकारीन गीणीन निजेर ता पोर एनी।2 केरीन जेलीन आदिकारी ता सोब केयदिह, जा जेलीम एता, युसूफान आथाम होप दिनो; एने जा जा कामे ता ता केरताला, तो ताच ने उकुम से एतालो। युसूफान ताबाम जो काय एतो ता माय जेलीन आदिकारीह काल्ली बी वोस्तु देखणे नाह पोड़ताली; काहाकाय बोगवान युसूफा हिऱ्यो इतो; एने जो काय तो केरतालो, बोगवान ताह ता माय सफलता आपतालो।
Source notes (2)
- Cross-reference प्रेरितान काम 7:9
- Cross-reference प्रेरितान काम 7:9
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.