Nahali Bible
उत्पत्ती 2
इह केरीन जुग एने देरती एने जो काय ता माय हे बाणावणो पुरो एय गीयो। एने बोगवान तान काम जाह तो केरतालो सातवी दिह निवराव्यो एने तो तान किरेल ता आखो कामा माय रेन सातवे दिह आराम किऱ्यो।1 एने सातवा दिह्याह बोरकेत आप्यो एने चोखालो ठेरायो; काहाकाय बोगवान केल बाणावणेन तान आखा कामाह निवरावीन तो आराम किऱ्यो।
माणहाह बाणावणो
जुग एने देरती बाणावणेन व्रतान्त ज्य हे काय जेवी ता बोणना मतलब जे दिह यहोवा बोगवान देरती एने जुगाह बाणायो : तेवी तान पेल देरती पोर काल्लोस जाड़ नाह एतो, एने खेताम बी कायच नाह उगेल एतो, काहाकाय यहोवा बोगवान देरती पोर पाणी नाह पाड़ेल इतो, एने बुय पोर खेती केरनेन केरता काल्लो बी माणुह नाह एतो; तीबी देरती पोर ओहटो पोड़तालो ता माय आखी बुय बिज जाताली।
तेवी यहोवा बोगवान बुईन माटड्या केरीन आदमाह2 बाणायो, एने तान नाकपुड्याम जीवणान हाह फुक दिनो; तेवी आदम जिवतालो माणुह बोण गीयो।3 एने यहोवा बोगवान पुर्व उगे अदन माय एक बोगीचो लागाड्यो एने आदामाह जाह तो बाणायेल इतो, मेल दिनो। एने यहोवा बोगवान बुय पोर सोब बातीन जाड़े, जा देखाणेम जुलूम हाजा एने जान फोले खाणेम हाजो हेते उगाड्यो, एने बोगिचान विची माय जीवणान जाड़ाह एने हाजा बाकतान एकलीन जाड़ाह बी लागाड्यो।4
ता बोगिशाह बिजवणेन केरता एक मोठलीनेद अदन उगे रेन निकेलनी एने तारीन वोयीन चार नेदीम माय वाटाय गियी।5 पेल्ली नेदीन नाव पिशोन हे; ज्यी तीच हे जी हवीला नावान देसाह जा होनो सापड़ेह तान कावदिन हे। ता देसान होनो हाजो रिथे, ता मोती एने सुलेमानी दिगोड़ बी सापड़तेह। एने दुसरी नेदीन नाव गीहोन हे, ज्यी तीच हे जी कुश देसाह कावदेन कोंड रेनीह। एने तीसरी नेदीन नाव हिद्देकेल हे; ज्यी ती हे जी अश्शुर ने पुर्व उगे वुयेह, एने चोवथी नेदीन नाव फरात हे।
तेवी यहोवा बोगवान आदामाह लिजाईन अदन बोगिशाम मेल दिनो काय तो ता माय काम केरी एने ताह देखरेत केरी। एने यहोवा बोगवान आदामाह ज्यो उकुम आप्यो, “तु बोगिचान आखा जाड़ान फोल खाय सिकेह, 6पुण हाजा बाकतान एकलीन जो जाड़ हे, तान फोल तु केदी मा खाहे : काहाकाय जेदिह तु तान फोल खाहे तेदिस जोरूड़ मोर जाहे।”
उवतो यहोवा बोगवान केयो, “आदामाह एखालो रेणे हाजो नाय मिले; मी तान केरता एक मुदेक केरनार हाती बाणावुह जो ता हेऱ्यो मेल खाय।” एने यहोवा बोगवान बुय पोरल्या आखी जातीन जेनवेराह एने जुगाम उड़नारे आखी बातीन चिड़ाह बाणावीन आदम फाय लेन आवो काय आदम तान काय-काय नाव मिलेह; एने आदम जा-जा जिवताला जेनवेरान जो-जो नाव आदम मिल्यो तोच तान नाव पोड़ गीयो।7 तेवी आदम आखी जातीन पालन्या जेनवार एने जुगाम उड़नारे चिड़ा, एने आखी जातीन जेंगली जेनवेरान नाव मिल्यो; पुण आदम ने केरता ओहलो काल्लो मुदेक केरनार नाह सापड़नो जो ता हेऱ्यो मेल खाय सेकी।
तेवी यहोवा बोगवान आदामाह बोर निंदी माय गार दिनो, एने तो हुव गीयो, तेवी तो तान एक पाहलो काड़ीन तान जागे माह बोर दिनो। एने यहोवा बोगवान ता पाहलीन जो आदामा माय रेन काड़ेल इतो, तान बायकु बाणाव दिनो; एने तिह आदम फाय लेन आवो। तेवी आदम केयो,
“एवी ज्यी मारा आड़ा माय रेन आड़ एने माहाम रेन माह हे;
तान केरता ज्यीन नाव नारी रेय,
काहाकाय जी नर माय रेन निकालाय जायेल हे।”8
तान केरता एदमी तान आईख आबाख सोड़ीन तान लाडी हिऱ्यो मिलीन रेय एने ता दुयू एक डिल बोणीन रेती।9
आदम एने तान बायकु उगाड़लाच एता, पुण लाजवाताला नाह।
Source notes (9)
- Cross-reference इब्रानियो 4:4,10
- Footnote आदमाह आदम, मतलब पेल्ला माणहाह बाणायो
- Cross-reference 1 कुरिंथीयो 15:45-47
- Cross-reference प्रकाशितवाक्य 22:2,14
- Cross-reference यहेजकेल 47:11
- Cross-reference रोमीयो 6:23
- Cross-reference बजन 8:6
- Cross-reference उत्पत्ती 29:14; 2 शमुएल 5:1; 1 कुरिंथीयो 11:8; 1 तीमुथीयुस 2:13
- Cross-reference मत्ती 19:5; 1 कुरिंथीयो 6:16; इफिसीयो 5:21
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.