Nahali Bible
उत्पत्ती 1
केल बाणावणेन वाराम वर्णन
पेलुच रेन बोगवान जुग एने देरतीह बाणायो। देरती बिगेर आकार एने हुनाहाड़ पुड़ेल एती, एने उन्डाला पाण्या पोर आंदारो एतो; एने बोगवानान जीव पाण्या पोर फिरतालो।
तेवी बोगवान केयो, “उजालो एय,” तेवी उजालो एय गीयो। बोगवान उजालाह दिख्यो काय हाजो हे; एने बोगवान उजालाह आंदाराह रेन आंगे किऱ्यो। उवतो बोगवान उजालाह दिह एने आंदाराह रात केयो। ते हांज पोड़नी एने पोशो उजालो एवो, इहकेरीन पेल्लो दिह एय गीयो।
उवतो बोगवान केयो, “पाण्यान विची माय ओहलो गालो पोड़ जाय काय पाणी दुय बाग एय जाय।” तेवी बोगवान एक गालो बाणावीन तान नेचाला पाण्याह एने उपेरल्या पाण्याह आंगे किऱ्यो; एने तो तोहलोच एय गीयो। एने बोगवान ता गालाह “जुग” केयो, एने हांज एवी एने पोशो उजालो एनो, इह केरीन दुसरो दिह एय गीयो।
उवतो बोगवान केयो, “जुगान नेड़लो पाणी एक जागे टोलवाय जाय, एने हुकेल बुय देखाय,” एने तोहलोच एय गीयो। एने बोगवान हुकेल बुईह देरती केयो, एने जो पाणी बोरायेल एतो ताह तो देरीयो केयो : एने बोगवान दिख्यो काय हाजो हे। उवतो बोगवान केयो, “देरती पोर निल्लो खेड़ एने बिजा वाला आत्या आत्या जाड़े एने फोलावाला जाड़े बी जान बिजा ताच माय रेतेह, एक एक जातीन गेत देरती पोर उगे;” एने तोहलोच एय गीयो। इह केरीन देरती पोर निल्लो खेड़, एने आत्या-आत्या जाड़े जा माय तान-तान जातीन गेत बिजा रेतेह, एने फोलनारे जाड़े जा माय बिजा एक-एक जातीन गेत ता माय रेतेह उगना; एने बोगवान दिख्यो काय हाजो हे। तेवी हांज एवी पोशो उजालो एवो, इह केरीन तिसरो दिह एय गीयो।
उवतो बोगवान केयो, “दिह्याह राती रेन आंगे केरनेन केरता जुगान गाला माय दिवा बाणायो; एने ता निसाणी एने ठेरायेल टेम, एने दिह वोरह्यान केरता रेय; एने ता दिवा जुगान गाला माय देरती पोर उजेड़ आपणारे बी ठेराय;” एने तोहलोच एय गीयो। तेवी बोगवान दुय मोटला दिवा बी बाणायो; ता माय रेन मोटला दिवाह दिह्या पोर आदिकार मेलनेन केरता, एने आतल्यो दिवाह राती पोर ताबो मेलनेन केरता बाणायो एने चांदण्याह बी बाणायो। बोगवान ताह जुगान गाला माय तान केरता मिल्यो काय ता देरती पोर उजेड़ आपी, तेवी दिह एने राती पोर आदिकार मिले, एने उजालाह आंदारा रेन आंगे केरी; एने बोगवान दिख्यो काय हाजो हे। तेवी हांज एनी पोशो उजालो एनो। इह केरीन चौथो दिह एय गीयो।
उवतो बोगवान केयो, “पाणी जीवाताला जेनवारा माय जुलूमच बोराय जाय, एने चिड़ा देरतीन उपेर जुगाम उड़ी।” केरीन बोगवान जाती जातीन मोट मोटला पाण्यावाला जिवाह एने ता सोब जीवताला जेनवेराह बी जा चालतेह फिरतेह जा माय पाणी जुलूमच बोराय गीयो, एने एक-एक जातीन उड़नारे चिड़ाह बी बाणायो, एने बोगवान दिख्यो काय हाजो हे। एने बोगवान ताह ज्य किन बोरकेत आप्यो फुलो फोलो एने देरीयान पाण्या माय बोराय जावो, एने चिड़ा देरती पोर हिंगले। तेवी हांज एनी पोशो उजालो एनो; इह केरीन पाचवो दिह एय गीयो।
उवतो बोगवान केयो, देरती माय रेन एक एक जातीन जीवताला जेनवार, मतलब पालन्या जेनवारे, एने लोलनारे जेन्तु, एने देरती पोर वाला जेंगली जेनवारे, जाती जातीन गेत बुणे; एने तोहलोच एय गीयो। इह केरीन बोगवान देरती माय रेन जाती जातीन जेंगली जेनवाराह, एने जाती जातीन पालन्या जेनवाराह, एने जाती जातीन बुय पोर लोलनार जेन्तुह बाणायो; एने बोगवान ताह दिख्यो काय हाजो हे।
उवतो बोगवान केयो, “आपु माणहाह आपणा वेहान गेतुच आपु हारको बाणावता;” 1 एने ताह देरीया वाला मासा एने जुगाम उड़नारे चिड़ा पोर एने पालन्या जेनवारे एने आखी देरती पोर, एने आखा लोलनार जेन्तु पोर जा देरती पोर लोलतेह, आदिकार मिले। तेवी बोगवान माणहाह तान वेहा माय बाणायो, ताच ने वेहान गेत बोगवान ताह बाणायो, एदमी एने बायकु केरीन तो माणहाह बाणायो।2 एने बोगवान ताह बोरकेत आपीन केयो, “फुलो फोलो एने आखी देरती पोर बोराय जावो, तीह ताबा माय केर लिवो; एने देरीया वाला मासा एने जुगाम उड़नारे चिड़ा पोर एने देरती पोर लोलनारे आखा जेन्तु पोर आदिकार मिलो।” उवतो बोगवान ताह केयो, “हुमलो, जोला बिजा वाला आत्या-आत्या जाड़े आखी देरती पोर हेते एने जोला जाड़ाम बिजा वाला फोले हेते, ता आखा मी तुमूह आपेल हेते; ता तुमरा खाणेन केरता हेते। एने जोला देरती पोर वाला जेनवारे, एने जुगावाला चिड़ा एने लोलनारे जेन्तु हेते, जा माय जिवान जिव हे ता आखान केरता मी आखा निल्ला निल्ला जाड़े खाणे आपेल हे;” एने तोहलोच एय गीयो। तेवी बोगवान जो काय बाणायेल इतो तो आखो दिख्यो, ते काय दिख्यो काय तो जुलूमच हाजो हे। तेवी हांज एनी पोशो उजालो एनो इह केरीन सोव्वो दिह एय गीयो।
Source notes (2)
- Cross-reference 1 कुरिंथीयो 11:7
- Cross-reference मत्ती 19:4; मरकुस 10:6
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.