Nahali Bible
उत्पत्ती 13
अब्राम एने लुत ने आलेग एणेन वर्णन
तेवी अब्राहाम तान बायकुह, एने तान आखो मालदेन एने लुताह बी आरही लेन मिस्र देस सोड़ीन कनान ने देक्षिण नेगेब ईलाकाम आवो। ती टेम माय अब्राहाम जुलूम मालमातो बोण जायेल इतो, ता फाय मेंड्रा बोकड्या, डोरे, होनो, चांदी जुलूम एतो। ओवतो तो देक्षिण नेगेब देसाम रेन फिरीन बेतेलान आहने तीच जागे पुचनो, जा तो पेल रोकायेल इतो, जो बेतेल एने आई ने विची माय हे। ज्यो जागो ती वेदीन हे जीह तो पेल बाणायेल इतो। एने ता अब्राहाम पुशो बोगवानान बोक्ती किऱ्यो।
लुता फाय बी जो अब्राहामा हिऱ्यो फिरतालो, जुलूम मेंड्रा बोकड्या, डोरे एने तोम्बु एता। केरीन ता देसाम ता दुयान केरता पुरतो चारू नाह एतो, काय ता एकठा रेय, काहाकाय ता फाय जुलूम मालदेन एतो। केरीन ता एकठा नाह रेय सेक्या। तेवी अब्राहाम एने लुतान मेंड्रा बोकड्या, डोरे चारनार गोवालान विची माय लेड़ाय एनी। ती टेम माय ता देसाम कनानी, एने परिज्जी माणहे रेताला।
तेवी अब्राहाम लुताह केयो, “मारी एने तारी विचीम, एने मारा एने तारा गोवाल्यान विची माय राड़ नाय एणे जुवे, काहाकाय आपु बायबोंद हेते। ते आपु आंगे एहु ते तो आपणी केरता हाजो रेय, एने तुवाह जो देस पुटे तो देस निवाड़ले, तु केदी डाखरे उगे जाहे ताहार मी जीवड़े उगे जाह, एने केदी तु जीवड़े उगे जाहे ताहार मी डाखरे उगे जाह।”
तेवी लुत नेजेर टाकीन दिख्यो काय आखी उखीर जुलूम पाणी एने निलोगार हे। ती टेम माय बोगवान सदोम एने अमोरा ज्या हेयराह खेतेम नाह किरेल इतो, सोअर ने वाटे वोर यरदन नेदीन खाडा बोगवानान बोगीचान गेत, एने मिस्र देसान गेत जुलूम हाजी उपजाव बुय एती।1 तेवी लुत तान केरता यरदन नेदीन आखी मेर निवाड़ीन पुर्व उगे गीयो, एने ता दुयू एक दिहरा हेऱ्या रेन आंगे एय गीया। अब्राहाम ते कनान देसाम रेय गीयो, पुण लुत ती यरदन नेदीन दिड़े वाला हेयराम रेणे बाज गीयो; तान पाड़ावो सदोम हेयरान आहने इतो। सदोम वाला माणहे बोगवानान नेजरीम जुलूम पापी एता।
अब्राहामान हेब्रोन माय जाणो
जेवी लुत अब्राहामा हिऱ्यो रेन आंगे एय गीयो तेवी तान पासाण बोगवान अब्राहामाह केयो, “निजेर टाकीन देख, जी जागे तु हे ता रेन उत्तर देक्षिण पुर्व पश्चिम चारो उगे देख। काहाकाय जोली बुय तुवाह देखाह, ती बोठी मी तुवाह एने तारी वोसीह जेलेमकोच आपुह।2 एने मी तारी वोसीह देरतीन माटड्यान गेत जुलूम वोदाडुह, ओलाक वोर काय देरतीन माटड्याह जो गेण सेकी तोच तारी वोसीह गेण सेकी। उठ ज्या देसान लांबाय एने चोवड़ाय माय चाल फिर; काहाकाय ज्य सोब एवी मी तुवाहच आपुह।” तान पासाण अब्राहाम तान तोम्बु उखालीन, हेब्रोन हेयराम जायीन मम्रेन चोखाला जाड़ान विची माय रेणे बाज गीयो, एने ताहरी बी बोगवानान एक वेदी बाणायो।
Source notes (2)
- Cross-reference उत्पत्ती 2:10
- Cross-reference प्रेरितान काम 7:5
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.