Nahali Bible
उत्पत्ती 11
बाषा माय गेरबेड़
आखी देरती पोर एकुच बाषा, एने एकुच बोली बोलाताली। ती टेम माणहे पुर्व उगे निकेलना तेवी जाता जाता शिनार देसान एक चोवगान सापड़ावीन ता माय वोह गीया। तेवी ता आपसाम हुमच्यो केऱ्या, “आवो आपु ईटड़ा बाणावी बाणावीन हास केरीन आक्ठाम पाकाड़ता।” एने ता देगड़ान जागा पोर इटड़ा, एने चुनान जागे माटड्यान गारा केरीन काम केऱ्या। ओवता ता केया, “आवो आपु एक हियोर एने खाम्ब बाणाव लेता, जान चुटो जुगा हिऱ्यो वातु केरी, इह केरीन आपु आपणो नाव गाजाड़ता, ओहलो नाय एणे जुवे काय आपुह आखी देरती पोर पोसरने पोड़ी।”
जेवी ता माणहे हियोर एने खाम्ब बाणावणे बाज गीया, तेवी ताह देखणेन केरता बोगवान उरतीन आवो। एने बोगवान केयो, “मी काय देखथु, काय आखा एकुच टोलान हेते एने तान बाषा बी एकुच हे, एने ता ओहलो काम बी चालु केर रेनाह; एने एवी जो काय केरनेन कोसीत केरती, ता माय जो काय बी ता केरने होदतेह तो केर लेती। तान केरता आवो, आपु बुंदे उतरीन तान बाषा माय गेरबड़ी टाकता, काय ता एक दिहरान बोलीह सोमजी नाय सिके।” इहकेरीन बोगवान ताह तारेन आखी देरती पोर पोसराव दिनो; एने ता हियोर बाणावणे सोड़ देना। केरीन ता हेयरान नाव बाबिलोन 1पोड़नो; काहाकाय आखी देरतीन बाषाम जो गेरबड़ी हे, तो बोगवान ताच रेन टाकेल इतो, एने ताच रेन बोगवान माणहाह आखी देरती पोर पोसराव दिनो।
शेम ने वोस
(1 इतिहास 1:24-27)
शेमान गेराणान वोस ज्यी हे : मुहोल दाऱ्या पाण्यान दुय वोरह्यान पासाण जेवी शेम एक होव वोरह्यान इनो, तेवी तान अर्पक्षद नावान सुरो पायदा इनो। अर्पक्षद ने जेल्मान पासाण शेम पाच होव वोरह्या जिवतालो रिनो; एने तान पोशा बी सोरा सोऱ्यु पायदा एना।
जेवी अर्पक्षद पोचतीस वोरह्यान इनो, तेवी तान शेलह नावान सुरो पायदा इनो। एने शेलहान जेल्मान पासाण अर्पक्षद चार होव तीन वोरह्या पुशो जीवनो, एने तान पोशा बी सोरा सोऱ्यु पायदा एना।
जेवी शेलह तीस वोरह्यान इनो, तेवी तान एबेर नावान सुरो पायदा एनो। एबेर ने जेल्मान पासाण शेलह चार होव वोरह्या पुशो जीवनो, एने तान उंजु बी सोरा सोऱ्यु पायदा एना।
जेवी एबेर चोवतीस वोरह्यान इनो, तेवी तान पेलेग नावान सुरो पायदा इनो; पेलेगान जेल्मान पासाण एबेर चार होव तीस पुशो जीवनो, तान उंजु बी सोरा सोऱ्यु पायदा एना।
जेवी पेलेग तीस वोरह्यान इनो, तेवी तान रऊ नावान सुरो पायदा इनो। रऊन जेल्मान पासाण पेलेग नोव होव वोरह्या पुशो जीवनो, एने तान पोशा बी सोरा सोऱ्यु पायदा एना।
जेवी रऊ बत्तीस वोरह्यान इनो, तेवी तान सरूग नावान सुरो पायदा इनो। एने सरूगान जेल्मान पासाण रऊ दुय होव सात वोरह्या पुशो जीवनो, एने तान पोशा बी सोरा सोऱ्यु पायदा एना। सरूग तीस वोरह्यान इनो, तेवी तान नाहोर नावान सुरो पायदा इनो। एने नाहोरान जेल्मान पासाण सरूग दुय होव पुशो जीवनो, एने तान उंजु बी सोरा-सोऱ्यु पायदा एना।
जेवी नाहोर एकोनतीस वोरह्यान इनो, तेवी तान तेरह नावान सुरो पायदा इनो। एने तेरह ने जेल्मान पासाण नाहोर एक होव एकोनतीस वोरह्या जीवनो, एने तान पोशा बी सोरा सोऱ्यु पायदा एना।
जेवी तेरह सेत्तेर वोरह्यान इनो, तेवी तान अब्राहाम, नाहोर एने हारान नावान सोरा पायदा एना।
तेरह ने वोस
तेरह ने वोस ज्यी हे, तेरह ने अब्राहाम, नाहोर, एने हारान ज्या तान सोरा पायदा एना, एने हारान ने लुत पायदा इनो। एने हारान तान आबोख तेरह जीवतालो इतोच ने, तीच टेम माय तान जेल्मो देस कसदीन ऊर नावान हेयराम मोर गीयो। अब्राहाम एने नाहोर ज्या दुयू बी जाणे वाराड़ केऱ्या। अब्राहामान बायकुन नाव सारे, एने नाहोरान बायकुन नाव मिल्का एतो। ज्यी ता हारान ने बेटीख एती, जो मिल्का एने यिस्का दुयून आबोख इतो। सारे ते वान्ठी एती; तीन सोरा नाह एना।
एने तेरह तान सोराह अब्राहाम, एने तान नातण्याक लुत, जो हारान ने बिटोख इतो, एने तान वोवड़ीक सारे, जी अब्राहामान बायकु एती, न्या आखाह लेन कसदियान ऊर हेयराम रेन निकलीन कनान देस जाणेन निकेलनो; पुण हारान नावान देसाम पोचीन ताच रेणे बाज गीयो। जेवी तेरह दुय होव पाच वोरह्यान इनो, तेवी तो हारान देसाम मोर गीयो।
Source notes (1)
- Footnote बाबिलोन गेरबड़ी
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.