Nahali Bible
गलातीयो 3
नेम एने बुरहो
एय विणएकल्या गलातीयावाला, कुण तुमूह मोह लियेल हे? तुमरे डोलान सामने यीशु मसी ते खुरूसखाम पोर हुतरोच देखाड़ाय जायेल ईतो। मी तुमरे फाय रेन फोक्तो एक वात जाणने होदथु काय तुमू जीवाह काय नेमान कामा केरीन, काय हाजाली खुबेर होमेलने से एने बुरहो केरने से जुड़नो? काय तुमू ओला विणएकल्या किहीक बोणतेह! बोगवानान जीवान द्वारा सुरवात केरतेह; एने एवी तुमरी ताकेती केरीन पुरा केरने होदतेह? काय तुमू ओलो दुख बिगेर कामान वेठ्या? पुण खेरीच बिगेर कामान नाह। जो बोगवान तुमूह जीव आपेह एने तुमरे माय ताकेतीन काम किरेह, तो काय ज्यानकेरता किरेह काय तुमू नेमाह पालतेह, काय ज्यानकेरता काय तुमू हाजाली खोबरी पोर बुरहो केरतेह? 1
“जीहे अब्राहामान अनुबवान बाराम पुस्तेक माय लिखेल हे तो बोगवाना पोर बुरहो किऱ्यो एने ज्यो तानकेरता देरमी ठेरानो।” 2केरीन जाज्यो सोमजी लिवो काय जा बुरहो केरतेह, तास अब्राहाम ने सोरा हेते। एने चोखाली पुस्तेक पेलुस ज्यो जाणीन काय बोगवान बोरहान द्वारा बिगेर यहुदिह देरमी ठेरावी। पुस्तेक माय पेलुस रेन अब्राहामाह ज्यी हाजाली खोबरीन गोसणा केर दिनो: “काय तार माय जुलूम माणहाह बोरकेत जुड़ी।” तानकेरता जोला माणहे बुरहो केरतेह, ता विश्वासी अब्राहामा हेऱ्या बोरकेत सापड़ावतेह।
पुण जोलाक माणहे नेमान पालेन केरीन जीवतेह, ता आखा हारापान काबाम हेते। काहाकाय पुस्तेक माय लिखेल हे, “जो कुण नेमान पुस्तेक माय लेखायेल आख्यु वातु पालेन केरने माय स्थिर नाह रेत, तो बोगवानान हारापान ताबाम हे। केरीन ज्यो साप हे काय नेमान द्वारा बोगवानान नेजरी माय कुण देरमी नाह ठेरात काहाकाय पुस्तेक किथे देरमी माणुह बोरहा केरीन जीवतालो रेय।3 पुण नेमान बोरहा हेऱ्यो काय नातो नाह। पुण जो ताह मानी, तो तान साहारे जीवतालो रेय।” मसी आपणी केरता हाराप वालो बोणनो, काहाकाय आपुह वेचातो लेन नेमान हारापाह रेन सोड़व्यो काहाकाय पुस्तेक माय लिखेल हे, “जो कुण जाड़ा पोर लेटकाड़ाय जाथे तो हाराप वालो हे।” ज्यो ज्यानकेरता एनो काय अब्राहाम ने बोरकेत मसी यीशु माय बिगेर यहुदि वोर पोची एने आपु बोरहान द्वारा ता जीवाह सापड़ावे जान वायदो बोगवान किरेल हे।
नेम एने वाचा
एय बाय बोणहा, एवी मी तुमूह देयनदिन एक किस्सो आपणे जाणे बाजरिनोह जिहकेरीन एगदा दुय माणहा द्वारा एगदो वायदो केराणे पोर नाह ते ताह बोंद केराय जाथे, एने नाह ता माय गेटाड़ाय जाय सिकेह एने नाह काह वोदाड़ाय जाय सिकेह। केरीन बोगवान अब्राहाम एने तान वोचीह वायदान बाराम आपेल। तो ज्यो नाह केत, “वोचीह,” जीहे जुलूम जाणान बाराम केयो, पुण ज्यान बोदले एकास ने उगे “तारे वोचीह” एने तो एक मसी हे। पुण मी ज्यो केथु जो वायदो बोगवान पेलुस रेन पाकी किरेल एती, तीह नेम चार होव तीस वोरह्यान बाद आवणार नेम नाह बोदेल सिकेत काय वायदो बिगेर कामान ठेराय। 4काहाकाय बोगवानान उत्तर आदिकारान नेमा पोर रेन सापड़ेल हे ताहार ओवतो वायदो केरीन नाह, पुण बोगवान अब्राहामाह वायदान द्वारा आप दियेल हे।
ताहार ओवतो नेमान उद्देश काय ईतो? तो ते गुनेगारान वोजेसे बाद माय आपानो काय ती वोचीह आवणे वोर रेय, जाह वायदो आपायेल एतो; एने नेम हेरोगदुतान द्वारा एक मद्यस्थान वेहा माय मुसान मोदेकी केरीन आथे ठेराय गीयो। मद्यस्थ ते दुयान विचीम रीथे, पुण बोगवान एकुस हे।5
नेम ने उद्देश
ताहार काय नेम बोगवानान वायदान विरोद माय हे? केदिस नाह! काहाकाय केदी ओहलो नेम आपाय जातो जो जीवणो आप सिकेह, ताहार खेरीच देरमी पोण नेमा केरीन रेती। पुण चोखाली पुस्तेक आखाह पापान ताबाम केर दिनो, काहाकाय तो वायदो जो बोरहान द्वारा यीशु मसीम हे, बुरहो केरनारान केरता पुरी एय जाय।
पुण बोरहाह आवणेन पेल नेमान काबा माय आपणी देखरेत एताली, एने ता बोरहाह आवणे वोर जो देखाण्यो ईतो, आपु तास ने बोंदेन माय रेहु। तानकेरता नेम मसी वोर पोचाड़नेन केरता आपणो मास्तेर ईयेल हे काय आपु बोरहा केरीन देरमी ठेराहु। पुण जेवी बुरहो आव लागो, ताहार आमु एवी नेमान काबाम नाय रिज्यो। काहाकाय तुमू आखा ता बोरहान द्वारा जो मसी यीशु पोर हे, बोगवानान सोरा हेते। एने तुमरे माय रेन जोलाक मसी माय बपतीस्मा लियेल हेते, ता आखा मसी माय एक एय जायेल हेते। एवी नाह कुण यहुदि हे एने नाह बिगेर यहुदि, नाह कुण गुलाम हे एने नाह स्वतंत्र, नाह कुण एदमी हे एने नाह बायकु, काहाकाय तुमू आखा मसी यीशु माय एक हेते। 6एने केदी तुमू मसीन हेते ताहार अब्राहाम ने वोच एने वायदान गेत वारीस बी हेते।
Source notes (6)
- Cross-reference रोमीयो 4:3
- Cross-reference रोमीयो 4:16
- Footnote बोरहान द्वारे बोगवाना हेऱ्यो एक एणेन कारेण दुनिया माय ने; नाहते बोगवाना हेऱ्यो खेरो केराय जाणेन कारेण बोरहान द्वारे दुनिया माय ने।
- Cross-reference रोमीयो 4:14
- Footnote एने बोगवान एक हे; नाहते एने बोगवान एखालोच काम किरेह।
- Cross-reference रोमीयो 4:13
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.