Nahali Bible
गलातीयो 2:20
Verse 20 is marked below, with the whole chapter around it. Read from the start
दिहरा प्रेरितान द्वारा पौलुसाह मान्यता
चोवदा वोरह्या बाद मी बरनबासा हिऱ्यो पोशो यरूशलेम माय गीयो, एने तीतुसाह बी आरही ली गीयो। बोगवानान मारो जाणो बोगवानान गेत एनो, एने जी हाजाली खुबेर मी बिगेर यहुदि माय पारचार केरथु, तीह मी ताह केय दिनो, पुण कुवालोच ताह जा मोटला सोमजाय जाताला, काहाकाय इही नाय एय काय मारी ज्यी टेमीन नाहते पासाणली दोवेड़ फालतुक ठेराय। पुण तीतुसाह बी जो मारो मोदेक केरनार हे, एने जा बिगेर यहुदि हेते, खेतना केरावणेन ता पोर दाबाव नाह टाक्यो। एने ज्यो ता जुठा बायह्याख ने वोजेसे एनो जा लिकाएन रिग जायेल एता, काय आपणी ती स्वतंत्रान जा मसी यीशु माय आपुह जुड़ेल हे, जाणकारी लेन आपुह गुलाम बाणावी। आमु तान आदिन ता माय गुटण्या नाह टेक्या, ज्यानकेरता काय हाजाली खोबरीन खेराय तुमरे माय बोणीन रेय। पुण जा माणहे खाज लागतेह ता कोहलाक बी एता माहो ताहसे काय फारेक नाह फुड़ीत बोगवान कुणी बाहेरल्यो रूप देखीन कुणी नियाव नाह केरने ता से जा आपणे आपणा खाज केवाताला ता से माहु काय फायदो नाह ईनो। पुण ज्यान उलटो जिहकेरीन यहुदि माणहाह हाजाली खुबेर केणेन काम पतरसाह होपायेल, तिहेच केरीन बिगेर यहुदि माणहान केरता माहु हाजाली खुबेर होमलावणेन होपायेल हे। काहाकाय जो पतरस खेतना वालान माणहाह प्रेरिताईन काम मोटलो प्रबावा बेल केरायो, तोस माहु बी बिगेर यहुदि माय प्रबावशाली काम केरायो, एने जेवी ता ती गीण माहो बोगवाना फाय रेन जुड़ेल एती, ओलख्या जी माहु ते याकुब, केफा एने योहान जा मोंडलीन खाम सोमजाय जाताला, माहु एने बरनबासाह सेंगेतीन जीवड्यो आथ आप्या काय आमु बिगेर यहुदि माय एने, ता खेतनावाला माय काम केरी। 2फोक्तो आमु जाह जोरवुत हे ताह आपणो, ओहली तान मोरजी एती; एने ज्यास कामाह केरनेन मी खुद कोसीत केरतालो।
पौलुसान द्वारा पतरसान विरोद
पुण जेवी पतरस अन्ताकियाम आवो, ते मी आखान सामने तान विरोद किऱ्यो, काहाकाय तान गेलती साप साप एती। काहाकाय याकुबान द्वारे मोकलायेल थोड़ाक माणहे न्या आवणेन पेल पतरस बिगेर यहुदि बुरहो केरनारा हिऱ्यो खाणो खाया केरतालो, पुण जेवी ता माणहे आवा पतरस बिगेर यहुदि बुरहो केरनारा हिऱ्यो रेन सिटो ईनो एने ता हिऱ्यो खाणे पिणेन सोड़ दिनो ज्यो तु ता माणहान बिय माय किरेल काय ता होदताला बिगेर यहुदिन खेतना एणे जुवे। दिहरा यहुदि माणहे बी ज्या कोपेट माय पतरसान साथ देना, न्या वोर काय बरनबास बी ता माणहान कोपेट ने कारेण बोटेक गीयो। पुण जेवी मी दिख्यो काय ता हाजाली खोबरीन खेराय पोर हुतरा नाह चालते, ते मी आखान सामने पतरसाह केयो, “जेवी तु यहुदि एन बिगेर यहुदिन गेत जीवनो जिवेह यहुदिन गेत नाह ताहार तु बिगेर यहुदिह यहुदिन गेत चालनेन काहा किथे?”
बोरहान द्वारा देरमी ठेराणो
आमु ते पायदा सेस यहुदि हेते, एने पापी बिगेर यहुदि माय रेन नाह। 3आमु जाणतेह काय माणुह नेमान कामा केरीन नाह पुण मसी यीशु पोर बुरहो केरनेन द्वारा देरमी ठेराथे, आमु खुद मसी यीशु पोर बुरहो केऱ्या काय आमु नेमान कामा केरीन नाह, पुण मसी पोर बुरहो केरने से देरमी ठेराय; ज्यानकेरता काय नेमान कामा केरीन काल्लो बी माणुह देरमी नाय ठेराय जाय। आपु जा मसी माय देरमी ठेराणे होदतेह, केदी सोतास बिगेर यहुदिन गेत पापी निकल्या ते काय मसी पापान सेवक हे? केदिस नाह! काहाकाय जो काय मी पाड़ दिनो केदी ताहास पोशो बाणावथो, ताहार सोताह गुनेगार ठेरावथो। काहाकाय मी ते नेमान द्वारा नेमान केरता मोर गीयो काय बोगवानान केरता जीवो। मी मसी हिऱ्यो खुरूसखाम पोर चेड़ावाय जायेल हे, एने एवी मी जीवतालो नाह रिनो, पुण मसी मार माय जीवतालो हे; एने मी सेरीर माय एवी जो जीवतालो हे, ते फोक्तो ता बोरहा केरीन जीवतालो हे जो बोगवानान बेटाख पोर हे, जो माहु मोंग किऱ्यो एने मार केरता सोताह आप दिनो। मी बोगवानान गीणीह नाह नाकारणे। पुण केदी काल्लो माणुह नेमान द्वारा देरमी रेतो, ते ज्यान मतलब ज्यो हे काय मसीन मोरनो व्यर्थ रेतो।
Source notes (3)
- Cross-reference प्रेरितान काम 11:30; 15:2
- Footnote आहने हे; नाहते आहने ईतो।
- Cross-reference रोमीयो 3:20; रोमीयो 3:22
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.