Nahali Bible
यहेजकेल 7
इस्राएलान डेन्ड आहने हे
पोशो बोगवानान ज्य वचन मार फाय पोचनो, “एय माणहान सोरा, मालीक बोगवान इस्राएलान बुईन बाराम इह किथे; काय सेवोट आवो; चार कोपरा हेऱ्या देसान सेवोट आव लागेल हे।”
“तारो सेवोट बी आव लागेल हे, एने मी मारो राग तार पोर बोड़कावीन तारी चाल चलन ने गेत तुवाह डेन्ड आपु; एने आखा खाराब कामान फोल तुवाह आपुह। मी तार पोर गिण नाय केरू; मी तुवाह नाय सोडु, मी जोरूर तारा चाल चलनान एने तारी विचीम खाराब कामान तार हिऱ्यो बुदलो लेह, तेवी तु जाण जाहे काय मी बोगवान हे।”
मारो मालीक बोगवान ज्यी वातु कियेल हे, एकान पासाण एक पिढ़ा आवती। सेवोट आवणे बाज रिनोह एने जुलूम उतवाल्यो आव लागी। एय इस्राएल वाला माणहे, काय तुमू सेटा नाह होमलेल सोता, दुसमोन आवणे बाज रिनोह, ता देन्डान टेम उतवाल्योह आवणे बाज रिनोह! दुसमोनान राग बोयड़ा पोर वोदार वोदार वोदते जाणे बाज रिनोह। मी चालोच देखाड़ देह काय मी कोलोक रागा माय हे, मी तुमरी विरूद मारा पुरा रागाह, मी ता खाराब कामान केरता डेन्ड आपुह जा तुमू किरेल हेते, मी ता सोब बिवाड़नार कामान तुमूह बुगताण केरावुह जा तुमू किरेल हेते। मी तुमू पोर जारीक बी गिण नाय केरू मी तुमरी केरता पाचतावो नाय केरू, मी तुमूह खाराब कामान केरता डेन्ड आपणे बाज रिनोह। तुमरा खाराब कामान बुदलो लेह, तेवी तुमू जाणहो काय ज्यो मी बोगवान हे, जो तुमू डेन्ड बी आपथु।
दिखो, ता दिह्याह दिखो, तो आवेह! चेक्रो फिर चुकनो, अन्याय ने डेंगी फुल गियी, एने तारी मोठाय वोद जायेल हे। सेताव वोदते वोदते पापान डेन्ड बोण गीयो; ता माय रेन कुण बी नाय वोची, एने नाय तान बिड़ बाड़, नाय मालदेना माय रेन काय बी रेय; एने नाय ता माय रेन कुणीन केरता रेड़नो होमलाय। टेम आव लागो, दिह आहने आव लागेल हे; नाय ते वेचातो लेणार मोज केरी एने नाय वेचणार नाराज एय, काहाकाय तान आखी बिड़ पोर राग बोड़की उठेल हे। ता जीवताला रेती, तीबी वेचणार काल्ली बी वोस्तुन जागे केदी नाय फिरीन आव सेकी; काहाकाय रागान ज्यी वात देसान आखी बिड़ी पोर गेटी, कुण नाय फिरीन आवी; काल्लो बी माणुह जो पापा माय जीवतालो रिथे, ताकेत नाय देर सिके।
ता बिरो फुक्या एने आखो काय तियार केर देना; पुण लेड़ाय माय कुण नाह जात काहाकाय देसान आखी बिड़ी पोर मारो राग बोड़केल हे।
इस्राएलान पापान डेन्ड
बाहेर तालवार एने माय मोंगाय एने बेमारी हे; जो मोयदाना माय रेय, तो तालवारी केरीन मोरी एने जो हेयरा माय रेय, तो बुख एने बेमारी माय माराय जाय। ता माय रेन जो वोच जाय, ता वोचती ते खोरा पुण जिव जिवान पापा माय फासाय खोयरा माय रेणारे पेरवान गेत बोयड़ा पोर रेड़ती रेती। आखान आथ डिल्ला एने मांडा जुलूम कमजोर एय जाती। ता तान कोमरा माय गोंटान फाड़का पेरती, एने ता बिन कापणे बाज जाती, आखान मुय हुक जाती, एने सोब मुंडे वोल जाती। ता तान चांदी सेड़की पोर टाक देती, एने तान होनो एठी वोस्तु बोण जाय; बोगवानान रागान दिह तान होनो चांदी ताह वोचाड़ नाय सेकी, नाय ता पोर जिव राजी रेय, नाय तान पेटे बोराती। काहाकाय ता तान गुनान ठोकरान कारेण इयेल हे। ता तान हाजाला गेयणा पोर मोठाय किरेल हेते, एने तान वापेर खाराब मुरता बाणावणेन केरता किरेल हेते, ता केरीन ता विण कामान मुरत्यु बाणायेल हेते; केरीन मी तान केरता एठी वोस्तु बाणाव देह। मी तान होनो चांदी पाराया देसावाला माणहाह लुट लेणेन केरता आपुह, आखी देरतीन माणहे लुट लेती एने होनो चांदीन मुरत्युह एठी केर देती। मी तान उगे रेन मारो मुय फिराव लेह, एने लुटारा मारा चोखाला जागाह एठो केरती, ता माणहे ताम रिगती एने एठो केर टाकती।
ता ताह ठाल्लो केर देती, आखो देस एने यरूशलेम हियोर लुयाल्लो एने देंगान कामा माय बोराय जाईल हे। मी दिहरा देसान खाराब माणहाह लावुह, जा तान गेरान मालीक बोण जाती; एने ताकेत वालान मोठाय तोड़ देह एने तान चोखाला जागा एठाला केराय जाती। दुख पिढ़ा आवणे बुखेत, तुमूह हुक जुड़ीन बी हुक नाय सापड़ी।
पिढ़ा पोर पिढ़ा आवती उड़ताली चेरचा पोर चेरचा होमलाय जाय; एने माणहे जाणकारा फाय देरसेनान वातु फुसती, पुण चाकऱ्या फाय नेम, एने डायडाया फाय रेन सेला आपणेन ताकेत नाय रेय। राजा ते दुखा माय रेती, एने मुखी माणहे नाराज ने फाड़का पेरती, एने देसान माणहान आथ डिल्ला पोड़ती, मी तान चाल चलनान गेत ता हिऱ्यो वेवार केरूह, एने तान कामाईन गेत ताह डेन्ड आपुह; तेवी ता जाण लेती मी बोगवान हे।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.