Nahali Bible
यहेजकेल 6
बोगवानान उगे रेन मुरती पुजान चिहटा
पोशो बोगवानान ज्य वचन मार फाय पोचनो। “एय माणहान सोरा, तु तारो मुय इस्राएलान बोयड़ा उगे केरीन तान विरूद जाणाव केर, एने के, एय इस्राएलान बोयड़ा, मालीक बोगवानान वचन हुमलो! मालीक बोगवान बोयड़ाह एने बोयड्युह एने खोदरा एने चारान चोवगानाह इह किथे, दिखो, मी तुमू पोर तालवार चालाडुह, एने तुमरा पुजान उचाला जागाह खेतेम केरूह। तुमरी वेद्यु उजड़ी जाती एने तुमरा दिह्यान मुरती तोड़ाय जाती; एने मी तुमरे माय रेन मारेल ताह मुरतान ओंगाण टाक देह। मी इस्राएली माणहान देड़ाह तान मुरतान ओंगाण मेलुह, एने तान आड़ाह तुमरी वेद्युन आहने पाहने वेर देह। तुमरा जोला बाणायेल हियोर हेते, ता सोब उजाड़ एय जाती, तुमरी वेद्यु उजेड़ती, एने ओदाराय जाती, तुमरी मुरत्यु जात रेती एने तुमरा दिह्यान मुरता काटाय जाती, एने आखी कारागिरी मिटाड़ाय जाय। तुमरी विचीम मारायेल तान देड़ान डिगे लाग रेती, एने तुमू जाण जाहो काय मी बोगवान हे। तीबी मी थोड़ाक जाणाह वोचाड़ मेलुह। केरीन जेवी तुमू देसा देसाम खोवलाय जाहो, तेवी जाती जातीन विचीम तुमरा थोड़ाक माणहे तालवारी केरीन वोच जाती। ता वुचेल माणहे, त्यु जात्युन विचीम, ज्यु माय ता देराय रेती, एने माहु एर केरती एने ज्य बी काय आमरो सिनाल्यो मोन बोगवाना हेऱ्यो रेन किहीक सेटो एय जायेल हे, सिनाल्या माणहान गेत आमरी देशा आमरा डोला मुरता पोर किहीक लाग रेनाह, जा माय बोगवानान मोन टुटेल हे। इह केरीन त्यु खाराबीन केरता, जा ता खाराब कामे किरेल हेते, ता तान नेजरी माय खाराब गेणाती। तेवी ता जाण लेती मी बोगवान हे, एने तान आखी नुकसानी केरनेन मी ज्य कियेल हे, ताह वायबार नाह केयो।”
मालीक बोगवान ज्य किथे; काय तारो आथ फोकड़ीन एने तारो पाय जेटकीन के, इस्राएलान गेराणान आखा खाराब कामा पोर हाय, हाय, काहाकाय ता तालवार, बुख, एने बेमारी माय खेतेम एय जाती। जा सेटा एती ता बेमारी माय मोरती, एने जा आहने रेती ता तालवार केरीन माराय जाती; एने जा वोचीन हेयरा माय रेतालान कोंडाय जाती, ता बुखल्या मोरती। इह केरीन मी मारो राग ता पोर हास केरीन उतारूह। जेवी आख्यु उचाल्यु बोयड्यु एने बोयड़ान आख्यु चुट्यु पोर एने आखा निल्ला जाड़ान बुंदे एने आखा जाड़ला वांज नावान मोटला जाड़ान सावला माय, जाहरी जाहरी तान सोब मुरताह गेंदाण्यो तेल चेड़ावतेह, ताहरी तान मारायेल माणहे तान वेद्युन आहने पाहने तान मुरतान विचीम पोड़ रेती; तेवी तुमू जाण जाहो काय मी बोगवान हे। मी मारो आथ तान विरूद ओंगाण केरीन ता देसान आखा गेरा हेऱ्योच जेंगलाम रेन रिबला हियोर वोर उजाडुच उजाड़ केर देह। तेवी ता जाण लेती काय मी बोगवान हे।
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.