Nahali Bible
यहेजकेल 23
दुय सिनाल्यु बोण्युख
बोगवानान ज्य वचन मार फाय पोचनो, “एय माणहान सोरा, दुय बायकु एत्यु, ज्यु एकुच आईख ने बेट्युख एत्यु। त्यु आत्युच ने वेश्यान काम मिस्र देसाम केरने बाज गीयु; त्युन सात्यु, कुवार पोणाम पेलुच ने दाबाय गीयु। त्युन कुवारला पेटा पोर आथ टाकाना। त्यु सोऱ्युम रेन मोटलीन नाव ओहोला एने तीन बोणीख ने नाव ओहोलीबा एतो। ती मारी बोण गियी, त्युन सोरा सोऱ्यु पायदा एन्यु, त्युन नावा माय रेन ओहोला ते शोमरोन, एने ओहोलीबा यरूशलेम हे। ओहोलीबा जेवी मारी एती, तेवीच सिनाली बोणीन तीन हाती पोर मोन लागाड़ ने बाज गियी जा आहने वाला अश्शुरी बाहदुर एता। राज्यपाल एने सेनापती एता, ज्या सोब ने सोब होबाता जुवान एता, एने गोड़ा पोर बोहीन फिरताला। ते ती ताच हेरी सिनालो केरी जा आखाम रेन हाजा अश्शुरी एता; एने जा कुणी पोर मोनवाय गियी, एने तान मुरत्यु केरीन सोताह एठी केर लेदी। जो सिनालो ती मिस्र देसाम हिकेल एती, ताह बी ती नाह सोड़ी; काहाकाय सोरा पोणाम माणहे ती हेऱ्या खाराब कामे केऱ्या, एने तीन सात्यु पोर आथ टाक्या, एने मोन लागाड़ीन ती हेऱ्या सिनालो किरेल एता। केरीन मी तीह ताच अश्शुरी हातीन आथाम केर दिनो, जा पोर ती मोनवाय जायेल एती। ता तीह उगाड़ली केऱ्या; तीन सोरा सोऱ्युह सांडाड़ीन ताह तालवारी केरीन माऱ्या; इह केरीन तान आथा केरीन डेन्ड सापड़ावीन ती बायकु माय गाज गियी।”
“तीन बोणीख ओहोलीबा ज्य देखी, तीबी ती मोनवाएन सिनालो केरनेम तीन बोणीख रेन बी वोदार एय गीयी। ती तीन अश्शुरी आहने रेणारा पोर मोनवाताली, आखान आखा जुलूम हाजा फाड़का पेरनारे एने गोड़ा दोवड़ावणारे जुलूम हाजा, जुवान मुखी एने आखी बातीन मुखी एता। तेवी मी दिख्यो काय ती बी एठी एय जायेल हे; त्यु दुयू बोणह्युख ने एक सोबाव इतो।”
“पुण ओहोलीबा वोदार सिनालो किरते गीयी; ते जेवी ती बितड़ा पोर एदम्यान चित्रो देखी, जा माय बाबिलोन ने रातला रेंगाम बाणायेल एता। एदम्यान कोमराम पुट्टो बांदेल इतो एने तान मुंडी पोर आलताली पागड़ी एती; ता सोब चित्रा बाबिलोन माय रेणारान एता, जा करात देसान आदिकारीन गेत लागताला। ओहोलीबा ताह देखी, एने ती ता पोर मोनवाय गीयी, ती बाबिलोन देसाम तीन खोबर्याह मोकली। एने बाबिलोन वाला माणहे ती फाय खाटला पोर आवा, एने ती हेऱ्या सिनालो केरीन तीह एठी केऱ्या; एने जेवी ती एठी एय गियी, तेवी तान मोन तीन उगे रेन सेटो एय गीयो। तीबी जेवी ती डिल उगाड़ताली एने सिनालो किरते गियी, तेवी मारो मोन तीन बोणीख ने उगे रेन सेटो एय जायेल एतो, तिहेच केरीन तीन उगे रेन बी सेटो एय गीयो। तीबी ती दाड़ीन सिनालो किरते रेनी, ती तीन मिस्र देसान सोरा पोणान दिह्याह एर केरीन वेशान काम केरताली, एने वोदार सिनालो किरते गीयी; ताहरी ती ओहला जोड़ीदारा पोर मोनवानी, जान माह गेदड़ान गेत, एने उमेरपाणी गोड़ा हारको एतो।” तु इह केरीन सोरा पोणान टेमान, ता मोटला पापाह एर केरावेह; जेवी मिस्री माणहे तारी सात्युह दाबताला।
आतली बोणीख बोगवाना उगे रेन डेन्ड
केरीन एय ओहोलीबा, बोगवान यहोवा तुवाह इही किथे, “देख मी तारा जोड़ीदाराह तार विरूद बोड़कावुह, जाह तु नफरत किरते लेन सेटी एय जायेल एती, एने मी ताह चार चोमखेर रेन तार विरूद लावुह। मतलब बाबेलोनी एने सोब कसदी, एने पेकोद, शोआ एने कोआन एदमी, एने ता हेऱ्या सोब अश्शुरी, जुवान्याह तार विरूद लावुह, ता माय सोबान राज्यपाल एने सेनापती, आदिकारी एने मुखी माणहे, आखान गोड़ा पोर बोहणारे हेते। माणहे आथ्यार, टांगा, वाहेन एने देस देसान माणहान टोल्यु लेन तार पोर चेड़ाय केरती; ढाल एने टोपा पेरीन तार विरूद कावदेन पालथी बांदती; एने मी तान आथाम न्यायनिवाड़ान काम होपुह, एने ता तान नेमान गेत तारो न्यायनिवाड़ो केरती। एने मी तार पोर मारो राग देखाडुह, एने तुमरी बोदेल तान वेवारो जुलूम रागाम रेय, ता तुमरा नाक एने कान काट टाकती, एने तुमरे माय जा वोच जाती, ता तालवारी केरीन माराय जाती; ता तुमरा बेटा एने बेट्युख राख लेती, एने तुमरे माय जा वोच जाती, ता आक्ठाम हेलगीन खेतेम एय जाती। ता तारा फाड़का बी काड़ लेती, एने हाज हाजा गेयणो सांडाड़ लेती। इह केरीन मी तारो मुटलो पाप एने वेश्यान काम तु मिस्र देसाम हिकेल एती, तुवाह ता माय रेन बी सोड़वुह, ओलोक काय तु पोशी तारा डोला तान उगे नाय लागाड़हे एने मिस्र देसाह पोशी एर नाय किरहे।”
काहाकाय बोगवान यहोवा तुवाह इही किथे, “देख, मी तुवाह तान आथाम होप देह, जा पोर तु दुसमोनाय मिलेह, एने जा से तारो मोन सेटो एय जायेल हे। एने ता तार हेऱ्या दुसमोनायीन वेवारो केरती, एने तारी आखी कामायीह विस लेती, एने तुवाह उगाड़ली सोड़ देती, एने तारा डिल उगड़ी जाय ता माय तारो सिनालो एने मुटलो पाप देखाय जाय।”
ज्य सोब तार पोर एनो, काहाकाय तु देस देसान माणहान पासाण वेश्यान गेत पोड़ गियी, एने तान मुरत्युह पुजीन तु सोताह एठी किरेल हे। तु तारी बोणीख ने वाटी पोर चालेल हे; केरीन मी तीन वाटको तारा आथाम केर देह।
बोगवान यहोवान ज्य केणो हे,
“तुवाह तारी बोणीख ने वाटका माय पिणे पोड़ी,
जो मुठो एने उंडालो हे;
केरीन तु आहणेन एने चिहटान कारेण बुणहे,
काहाकाय ता माय जुलूम होवटो होमाथे।
तु साकवाली एने दुखाम बोराय जाहे,
ज्य खेतेम एने उजाड़ एणेन वाटको हे,
ज्यो तारी बोणीख सामरीयान वाटको हे।
तु ज्याह पिन ठाल्लो केर दिहे,
एने ज्यान तुकड़ाह चावहे
एने ताऱ्यु सात्युह जेखमी किरहे, ज्य बोगवान यहोवान बोल हे।”
“तु जो माहु विहराव दियेल हे, एने तारो मुय मार हेऱ्यो रेन फिराव लियेल हे, केरीन तु सोताच तारा मोटला पाप एने सिनालान बार विस।” बोगवान यहोवान ज्य वचन हे।
दुयू बोण्युख बोगवाना उगे रेन डेन्ड
बोगवान माहु केयो, “एय माणहान सोरा, काय तु ओहोला एने ओहोलीबान न्यायनिवाड़ो किरहे? ते ओवतो त्युन खाराब काम त्युह केय दे। काहाकाय त्यु सिनालो किरेल हेत्यु, एने त्युन आथाम खुन चोपड़ाय रेनोह; ता तान मुरत्यु हेऱ्या सिनालो केऱ्या, एने तान सोरा पोऱ्या जा पायदा इयेल एता, ता मुरतान ओंगाण खेतेम एणेन केरता चेड़ायेल हेते। ओवता ता मार हेऱ्या ओहलो वेवारो केऱ्या काय ताच हेऱ्या मारा चोखाला जागाह बी एठो केऱ्या एने मारा विहेवणेन दिह्याह एठो किरेल हेते। जे दिह ता तान सोरा पोऱ्याह तान मुरतान सामने बोली चेड़ावीन, ते दिहच मारा चोखाला जागाम रिगना एने ताह एठो केऱ्या, ता मारा मोंदिर माय ज्योच किरेल हेते।”
“उंजु पोशा ता खोबऱ्या मोकलीन जुलूम सिटे रेन माणहाह हादाड्या, एने जेवी ता आव लागा, ते तुमू तान केरता तुमरा उंगलेल पांगलेल, डोलान हिंगार केऱ्या एने तुमरा गेयणाह पेऱ्या। तेवी तु एक हाजाला सोफा पोर बोह गियी, जान सामने एक पाटलो मिलेल एतो, जा पोर तु दुणी एने जेतुनान तेल मिलेल एतो, जो मारो एतो। तेवी ता हेऱ्या लापारवाय माणहान बिड़ीन गेगदो होमलातालो; ता सादा माणहा फाय जेंगलाम रेन हादाड़ेल दारूड्या माणहे बी एता; ता त्यु दुय बोण्युख ने आथाम बांगड्यु पेराया, एने त्युन मुंडी पोर होबाता मुकूट मेल्या। तेवी जी सिनालो किरते किरतेन डायी एय जायेल एती, तीन बाराम बोलने बाज गीयो, एवी ते तीच हेऱ्या सिनालो केरहु। काहाकाय ता ती फाय ओहला गीया जीह केरीन माणहे वेश्या फाय जातेह, तिहेच केरीन ओहोला एने ओहोलीबा नावान मोटल्यु पापी बायकु फाय गीया। ते देरमी माणहे सिनाल्या एने खुनीन लायकीन त्युन न्यायनिवाड़ो केरी; काहाकाय त्यु सिनाल्यु हेत्यु, एने त्युन आथाम खुन चोपड़ायेल हे।”
केरीन बोगवान यहोवा इही किथे, “एक मोटली गेरदीन माणहान उगे रेन ता पोर चेडाय केरावीन त्युह ओहलो केरूह काय त्यु मोऱ्यु मोऱ्यु फिरती एने लुटाय जाती। एने बिड़ीन माणहे त्युह देगड़ाठीन तान तालवारी केरीन काट टाकती, तेवी ता त्युन सोरा पोऱ्याह मारती, एने त्युन गेराम आक्ठो हेलगाड़ देती। इह केरीन मी मोटला पापाह देसाम रेन सिटो केरूह, एने आख्यु बायकु हिक सापड़ावीन तुमरी गेत मुटलो पाप केरने से वोचीन रेती। तुमरो मुटलो पाप तुमरी मुंडी पोड़ी; एने तुमू जोरूर तुमरा मुरती पुजान पापान बार उखेलहो; एने तुमू जाण लिहो काय मी बोगवान यहोवा हे।”
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.