Nahali Bible
यहेजकेल 22
यरूशलेम ने गुनान नियाव
एने बोगवानान ज्य वचन मार फाय पोचनो, “एय माणहान सोरा, काय तु ता खुनी हेयरान न्यायनिवाड़ो किरहे? ताह तान खाराब काम केय दे, एने के, बोगवान यहोवा इही किथे, एय हियोर तु तार विचीम खुन किरेह जा माय तारी टेम आवी, एने तारो नुकसान केरने एने एठो एणेन केरता मुरता बाणावीह। जा खुन तु किरेल हे, तु गुनेगार ठेरानी, एने जा मुरता तु बाणायेल हे, तान कारेण तु एठी एय जायेल हे; तु तारा सेवल्या दिह्याह आहने केर लेदी, एने तारा पासाणल्या वोरह्या वोर पोच गियी, केरीन मी तुवाह जाती जातीन नावदारीन एने सोब देसान आहतायीन कारेण केर दियेल हे। एय, बदनाम हियोर! एय गेगदा माय बोरायेल हियोर! जो देस तारी आहने हे, एने जा देस तुवाह रेन सेटा हेते, ता सोब तारी मोजाक उड़ावती। देख, इस्राएलान मुखी माणहे जिव जिवान ताकतीन गेत तार माय खुन केरनारे बुणेल हेते। 1 तार माय आहख आबोख खाराब सोमजाय गीया; तार विचीम दिहरा देसावाला पोर अत्याचार इथे, एने विखावाला एने रांडायेल बायकु तार माय देलाय जायेल हेत्यु। तु मारी चोखाली वोस्तुह खाराब जाण्यो, एने मारा विहेवणेन दिह्याह एठो किरेल हे। तार माय लुच्चा माणहे खुन केरनेन तियार एना, एने तारा माणहे बोयड़ा पोर खाणो खायेल हेते; तारा विचीम मोटला पाप केराय जायेल हे। 2तार माय आबाख ने बायकु हेऱ्या सिनालो केरतेह, एने तार मार फाड़को आयेल बायकु हेऱ्या सिनालो केराय जायेल हे। एगदो तार माय आहने रेणार बायकु हेऱ्यो खाराब काम केऱ्यो; एने एगदो तान वोवड़ीख बिगाड़ीन मोटलो पाप किरेल हे, एने एगदो तान खाज बोणीख एठी किरेल हे। तार माय ओहला माणहे हेते, जा ता खाराब काम केरीन पोयशा कामावतेह, जा वियाज लेतेह एने गेरब्याह लुटतेह, एने आहने रेणाराह जोर केरीन सांडाड़ीन लुटणेन कामाय केरतेह, एने ता विहरी जातेह, ज्यो बोगवान यहोवान बोल हे।”
“तुमू लुच्चाय केरीन जी कामाय किरेल हेते एने तुमू तुमरी विचीम जो लुय वोयाड़ेल हे, ता पोर मी मारा दुयू आथ एक्ठाच उठावुह। ते दिह काय तुमरे माय ईमोत रेय, नाहते तुमरा आथ मोजबुत रेती; जुलबुखे मी तुमू फाय लेखो लेह? मी यहोवा कियेल हे एने मी ज्य केरीच ने रेह। मी तुमूह राज्य राज ने माणहान विचीम पुरी रिती से खोवली देह एने बाती बातीन देसाम पोसराव देह; एने मी तुमरी एठायीह खेतेम केर देह। जुलबुखे तुमू राज्या राज ने माणहान नेजरीम एठा एय जाहो, तुमू जाणहो काय मी यहोवा हे।”
बोगवानान राग
तेवी बोगवानान ज्य वचन मार फाय पोचनो, “एय माणहान सोरा, इस्राएलान माणहे मार केरता सिकल्यो बोण जायेल हेते, ता सोब बाठी माय टाकायेल तांबो, पितेल, चांदी, सिसो एने लोड़ा हेते, ता पोर सिकल्यो जोम जायेल हे। केरीन बोगवान यहोवा इही किथे, काहाकाय तुमू सोब सिकल्यो बोण जायेल हेते, केरीन मी तुमूह यरूशलेम माय टुलो केरूह। जीह केरीन होनार चांदी, पितेल, लोड़ो, एने जेरमेन, सिसान टुकड़ा बाठी माय टुलो केरीन देदेकताली आक्ठीम पिगालाय जाथे; तिहेच केरीन मी तुमूह मारो राग केरीन टुलो केरूह एने तुमूह हेयरा माय टाकीन पिगलाडुह। मी तुमूह टुलो केरूह एने तुमू पोर मारा मोटला रागाम आवीन फुकूह, एने तुमू हेयराम पिगली जाहो। जीह केरीन चांदी बाठा माय पिगली जाथे, तिहेच केरीन तुमू ता माय पिगली जाहो, एने तेवी तुमू जाणहो काय मी यहोवा तुमू पोर मारो राग बोड़कायेल हे।”
इस्राएलान मुखीन पाप
बोगवान यहोवान ज्य वचन पोशो मार फाय पोचनो, “एय माणहान सोरा, यरूशलेमाह इही के, तु एक ओहलो देस हे, जो चोखो नाह इनो नाहते जा पोर रागान दिह पाणी नाह पुड़ेल सुतो। जीह केरीन सिंहो तान सिकाराह वेसड़ी दिथे, तिहेच केरीन यरूशलेमान मुखीन, एक हुमच्यो हे; ता माणहाह मार टाकतेह, एने तान मालदेन एने मोंगाल्यु वोस्तुह राख लेतेह; एने यरूशलेम माय जुलूम वाराड़ावाल्यु बायकुह रांडायेल बाणाव देतेह। एने ता देसान चाकऱ्या मारो कायदो तोड़तेह एने मारी चोखाली वोस्तुह एठा केरतेह; ता चोखाल्यु एने साद्यु वोस्तुन विचीम काय फारेक नाह केरते; ता हिकाड़तेह काय चोखो एने एठा माय काय फारेक नाय मिले; ता मारा विहेवणेन दिह्याह माणनेन ओग्या पोशा एतेह, केरीन मी तान विचीम एठो सोमजाय जायेल हे। एने ता मायवाला मुखी तान सिकाराह वेसड़ी खाणार कोलवान गेत हेते; ता लुच्चायीन फायदान केरता लुय वोयाड़तेह एने खुन केरतेह। तान जाणकार जुठा देरसेन एने हुगोणा केरीन तान केरता ज्या कामा पोर निप्या थाब्या केरतेह, ता केतेह, बोगवान यहोवान ज्य केणो हे, पुण मी ताह काय केतुच नाह। देसान माणहे जोर केरीन सांडाड़तेह एने डाको टाकतेह; ता गेरीब एने गिरेजवाला माणहाह ठेगीन खातेह एने पाराया देसान माणहा बी ठेन खायीन ता हेऱ्या खाराब वेवारो केरतेह। मी तान विचीम ओहला माणहाह होदणे बाज रियेल इतो, जो, बितड़ो बाणावी एने ता देसान उगे रेन डोसाम मार सामने उबरेय, काय मी ताह खेतेम नाय केरू, पुण माहु ओहलो काल्लो बी माणुह नाह जुड़नो। केरीन मी ता पोर मारो राग टाकुह एने जुलूम रागाम हेलगाड़ीन खेतेम केर देह, एने तान सोब केराय जायेल काम ताच ने मुंडा पोर टाक देह।” बोगवान यहोवान ज्यो बोल हे।
Source notes (2)
- Cross-reference निर्गमन 20:12; 22:21; व्यवस्था 5:16; 24:17
- Cross-reference लेव्यवस्था 18:7-20
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.