Nahali Bible
निर्गमन 10
आठवी पिढ़ा टिड्यान हमलो
पुशो बोगवान मुसाह केयो, “फिरोन राजा फाय जा; काहाकाय मीच तान एने तान आदिकारीन मोनाह ज्यानकेरता वातड़ो किर दियेल हे काय मार चोमेत्कार तान विच माय देखाडुह, एने तुमू तुमरा सोरा एने नातण्याक किहो काय यहोवा मिस्रीह किहेक फोगा बाणायेल एने मारो काय काय चोमेत्कार तान विच माय देखाड़ील हे; तिहकेरीन तुमू ज्यो सोमजी जाहो काय मी यहोवा हे।”1
केरीन मुसा एने हारून फिरोन राजा फाय गीया एने केया, “इब्री माणहान बोगवान यहोवा तुवाह इह केरीन किथे, काय तु केदीह वोर मार ओंगाण दीन नाह इत? मारी बोक्ती केरनेन केरता मारा माणहाह जाणे दे। केदी तु मारा माणहाह जाणे नाह देत, ताहार हुमेल, हेकाले मी तार देसा माय टिड्या लेन आवुह। एने ता देरती पोर ओहला सावाय जाती काय कायच देखाय नाय; एने तुमरो जो काय गाराम रेन वुचील हे ताह खाय जाती, एने जोला बी जाड़े हेते ताह बी खाय जाती, एने ता तारी आवाली माय एने मिस्रीन तारा आखा आदिकारीन गेरा माय एने तारा आखा माणहान गेरा माय बोराय जाती। ओला टिड्या तारा डायला नाहते तान डाया जेवीह रेन देरती पोर जेल्मो लेदा एती, तेवीह रेन आज वोर केदी निही देख्या एती।” एने तो मुय फिरावीन फिरोन राजा फाय रेन बाहेर जात रिनो।
तेवी फिरोन राजान आदिकारी ताह केया, “ज्यो माणुह केदीह वोर आमरे केरता फासो बोणीन रेय? ता माणहाह जाणे दे, काय ता आपणा यहोवा बोगवानान बोक्ती केरी। काय तु एवी वोर नाह जाणेत काय आखो मिस्र खेतेम एय जायेल हे?”
केरीन मुसा एने हारूनाह पोशो फिरोन राजा फाय हादाय गीया, एने तो ताह केयो, “जात रिवो, तुमरा यहोवा बोगवानान बोक्ती किरो; पुण ता जा जाणारे माणहे हेते कुण कुण हेते?”
मुसा जापाप आप्यो, “आमु ते सोरा सोरी, मेंड्रा बोकड्या, गाय बुयेल हेऱ्या एने सोरा डावाला आखान आखा जाण्या हेते, काहाकाय आमु बोगवानान केरता एक तिवार वालन्या हेते।”
फिरोन राजा ताह केयो, “बोगवान तुमरी हिऱ्यो रेय, केदी मी तुमूह सोरा हिऱ्यो जाणे देथु; दिखो, तुमरा मोना माय गेलेत हे। नाह! ओहलो नाय एय; तुमू एदमी ओलास जायीन बोगवानान बोक्ती किरो, तुमूह ज्योस ते जोवतालो।” तेवी मुसा एने हारूनाह फिरोन राजान जागे रेन बाहेर निकालाय गीया।
तेवी बोगवान मुसाह केयो, “मिस्र देसान उगे तार आथ ओंगाण केर, तेवी टिड्या मिस्र देसा माय आवीन बुयीन जोलीक कामाय गाराम रेन वुचील हे, आखो चाट खाय जाती।” केरीन मुसा तान डिंगो मिस्र देसान उपेर किऱ्यो, तेवी बोगवान दिह एने रात बोर देसा पोर वारो चालाड्यो; एने जेवी वेगोस एनो तेवी ता वारा माय टिड्यान टुलो आव लागो। 2एने टिड्या आवीन मिस्र देसान आखी जागी बोराय गीया, तान टुलो जुलोम मुठो इतो, एने नाहते ताह रेन पेल ओहला टिड्या देखील एता, एने नाह तान पासाण पोशा देखाती।3 टिड्या आखी देरती पोर सावाय गीया, आखा मिस्र देसा माय आंदारो सावाय गीयो, एने तान आखो खाणो एने जाड़ान सोब फोल, एने जो काय गाराम रेन वुचेल एतो, तो सोब खाय गीया; न्या वोर काय आखा मिस्र देसा माय जारीक बी निल्लो नाह वोचनो खेता माय दाणा रियेल एता।
तेवी फिरोन राजा उतवाल्योह मुसा एने हारूनाह हादिन केयो, “मी ते तुमरो बोगवान यहोवान एने तुमरो बी पाप किरेल हे। केरीन एविन फेराह मार पाप माफ किरो, एने तुमरो बोगवान यहोवा फाय विन्ता किरो काय तो मार उपेर रेन जी मोतीन सेंकेट सिटो किरो।” एने तेवी मुसा फिरोन राजा फाय रेन जायीन यहोवाह विन्ता किऱ्यो। तेवी बोगवान दिह बुड़ता उगे रेन वारो चालाड्यो एने ता टिड्याह उड़ावीन रातला देरीया माय जुगार दिनो, एने मिस्र देसान काल्लीस जागे टिड्या नाह रेना। पुण बोगवान फिरोन राजान मोनाह वातड़ो केर दिनो, केरीन तो इस्राएली माणहाह जाणे नाह दिनो।
नोव्वी पिढ़ा आंदारो
पुशो बोगवान मुसाह केयो, “तार आथ जुगान उगे ओंगाण केर काय मिस्र देसान माय आंदारो सावाय जाय, ओहलो आंदारो काय आथा केरीन सापलाय नाय सिके।” तेवी मुसा तान आथ जुगान उगे ओंगाण किऱ्यो, एने आखा मिस्र देसा माय तीन दिह वोर आंदारो सावाय रेनो।4 मिस्र देसान माणहे तीन दिह वोर नाह ते कुणीह देख सेक्या, एने नाहते कुण सोतान जागे रेन उठ सेकनो। पुण आखा इस्राएली माणहान गेरा माय उजालोच एतो।
तेवी फिरोन राजा मुसाह हादिन केयो, “तुमू जावो, बोगवानान बोक्ती किरो; एने तुमरा सोराह बी आरही लेन जावो; पुण तुमरा मेंड्रा बोकड्या एने गाय बोयलाह मा ली जावो।”
मुसो जापाप आप्यो, “तुवाह आमरा आथाम मेल मिलाप बोली एने होमबोलीन जेनवार बी आपणे पोड़ती, ताह आमु आमरो बोगवान यहोवान केरता चेड़ावहु। केरीन आमरा जेनवारे बी आमु हेऱ्याच जाती, तान एक खुऱ्यो वोर नाय रेणे जुवी, काहाकाय तास माय रेन आमुह आपणो यहोवा बोगवानान बोक्तीन सोमान लेणे पोड़ी, एने आमु जाह वोर ता नाह पोच जाते, ताह वोर नाह जाणते काय काय काय लेन बोगवानान बोक्ती केरनो हे।”
पुण बोगवान फिरोन राजान मोन वातड़ो केर दिनो, एने तिहकेरीन तो ताह जाणे नाह दिनो। तेवी फिरोन राजा मुसाह केयो, “मार ओंगाण रेन जातरे; एने तारो मुय माहु पुशो मा देखाड़हे; काहाकाय जे दिह तु माहु मुय देखाड़हे ते दिहच तु माराय जाहे।”
तेवी मुसा केयो, “तु ठिक किथे; मी तार मुयाह पुशो केदी नाय देखुह।”
Source notes (4)
- Cross-reference व्यवस्था 4:9; बजन 44:1
- Cross-reference प्रकाशितवाक्य 9:2-3
- Cross-reference बजन 105:34; 78:46; प्रकाशितवाक्य 9:2
- Cross-reference बजन 105:28; प्रकाशितवाक्य 16:10
Nahali Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.